TUCHUN THILCANG CU LUNG AFAK HRINGHRAN KO, APOI TAKTAK SI

Kawlralkap le kawlram palik pawl thiltuah cu ngeih a chia chin lengmang ko cang. Tutan thil a cangmi hrimhrim cu lung a fak tuk hringhran ko ee, Dawei ah kawlralkap nih uknak an lakmi duhlonak alanghtermi hna cu Palik nih minung pali an nunnak an lak hna tiah thawngzamhnak nih alanghter. Hi konghi tuchun february ni 28 ah an langhter or an thlahmi thawngpang a si.

Tutan tah kawlram palik hna nih minung pali an nunnak an laknak hmun le hma asimi Dawei hi Tanintary Region ah aummi a si, Tuchun ah Dawei khuapi ah ralkap uknak lak mi duhlonak cu mipi hna nih an langhter. Lam zawhnak atuahmi minung hna cu kawlram palik hna nih meithal hriamnam in an kah hna caah minung pali an nunnak aliam pin ah minung tampi zong hliam an tuar tiah an chim.

Hi konghe pehtlaiin Zambu Thirih Emergency damlo aphurtu ambulance nawlngeitu minung pakhat nih a chimmi cu hliam a tuarmi hna hi minung tamtuk an si, minung 30 hliam atuarmi an um. Lamzawhtu hna cungah palik pawl nih hriamnam an hmanmi hi khairiat kuan le mitthli tlaknak gas siseh, cun meithal kuan taktak zong an hman hna.

Hi bantuk in palik pawl nih hriamnam an hman ruangah tutan ah hliamhma an tuarnak zong hi a si tiah a chim. Minung pali an nunnak a liam cang i, a rauh hlan ah a nunnak aliam dingmi thinphang ngaingai a simi zong minung parasih an um tiah a cunglei upa nih tuchun thil a cangmi le hliam tuar siseh thihlonak a tongmi kong he pehtlaiin thawng zamh nak fiang tein alanghter.

Culawng siloin tuchun ah lamzawhnak ah aitel vemi minung pakhat nih a chimmi cu ka theih khawhmi chungah hin minung pathum an nunnak aliam i, hliamhma a tuarmi hna hi minung sawmnga hrawnghrang an si tiah a chim ve, Cu lawng siloin palik hna nih an tleihmi hna zong chuah colh dingah kan va chimh hna lai tiah a chim chih.

Relchih: Ralkap Uknak thlak, hrawh vial lawng hi Chin miphun nih kan i hmuitinh lo. Ramchung lei ka hawile, unau nupa cawlcangh ning nitin ka cuan, ka upat tuk hna, thih ngamh in Meithal kuanfang lakah a vak mi an si. Miphun caah thih an ngamh nak a tak in ka hmuh. Chun ah din loin lam an zawh, zaan ah Police le Ralkap nih it thiam loin an tuah hna, chunzaan din loin nihin tiang an cawlcang. Kan unau, kan hawile tampi tlaih an si cang, Rangoon, Mandalay le Myanmar ram hmun tampi ah thisen le nunnak tampi a luang cang.

Ramchung ka unau hna lungre thei, vansang le tihphan in an um lio le, thih ngamh in an cawlcangh lio ah capo bia chim zong ka duh lo. Ka rawl ei kaa a thaw ve lo, zaan ah nuam tein ka it kho ve lo. Ramchung ka um lo tikah ka ti khawh tawk thil a um ve hnga maw timi tu in ka cawlcang. Ram chung lei an thazaang ka der ter sual hna lai ka ti i catial, biachim zong kaa sum. A si nain nihin tiang boruak ka cuanh tikah ka thinlung mei bang in a alh ve.

Ka facebook hi a thar a si, Friend zong tampi a um lem lo caah tiah ka lungduh, ka lung um tawite hi ka hin ka langhter duak ve bia asi. Chin miphun cu Ralkap kut taang ah caan sau pi kan um, hremnak le fahnak phuntling kan tuar, Kan Biaknak, kan Miphun sinak ruang ah cihmih timh lengmang mi kan si. Kum caan tawite Democracy phung kan tep, a puitling mi Democracy kan au pi lio le Federal uknak kan au pi cuahmah lio ah February 1, 2021 ah Min Aung Hlaing nih ram mipi uknak a chuh i a nawlngeihnak taang ah hramhram in rawn an kan timh.

Cu caah nihin tiang cawlcangh, doh le zalam ah chuah hi asi. Tutan thil kong he pehtlai in kei ka hmuh ning ahcun “Chin Miphun nih Min Aung Hlaing hruaimi ralkpa nawlngeihnak a tlaknak ding, a rawh nak ding vial lawng hi kan hmui tinh mi a si lo. Kum zabu tampi chung kan au pi mi, Federal uknak phungthar serchuah, Ralkap nih an mah duh tein an tial mi 2008 Constitution hrawh” hi kan i hmui tinh chih. Tutan ah Ram mipi kan i ruang cang, Ralkap uknak kan duh lo tiah au dih a si cang.

Chin mipi dihlak ngawt in zalam ah chuah a si ve cang. Cu caah kan hmuitinh, kan khel mi ah hin fianghlang chinchin in karhlang rih ko usih. A herh ahcun, Kan pale mifim hna nih Exile Chin Government zong kan dirh piak ko cang hna seh. Cozah rianttuan kip nih CDM in doh ve hna seh, Mipi dihlak nih a lam kip in cawlcang ve usih, CNF/A nih hriamnam he an si ve lai. Chin mipi kan i ruang, atu lio caan ah hin kan thisen a sa dih cio, a herh ahcun Independent zong Declare tuah ve ko usih.

A tlawmbik in 2008 Constitution hrawh le Federal tel cu nganh bak lo in, tutan ah kan sinak dih lak in doh lawlaw ko hna usih timi hi ka ruat ve. Kan hmuitinh a simi “Ralkap uknak thlak, 2008 Constitution Hrawh in Federal uknak phung ah a hram a bunh mi Constitution thar ser chuah” hi kan slogan a si cang bantuk in kan pale nih a herh ahcun kan pale mifim hna nih Exile Chin Government zong kan dirh piak ko hna seh ka ti nak asi.

Ramchung ah hmaisuang in a cawlcang mi, meithal kuanfang zeitik dah a rat lai timi karlak zong ah thih ngamh in a cawlcang mi ka unau, mipi dihlak kan upat tuk ve hna. Note: ka bia ka denh cang, ka cabia hi ramchung ah hmaisuang in a cawlcang mi kan unau thadernak si hram hlah seh, tulio boruak ah thazaang dernak cabia a si sual ahcun a rannak in ka hnawh tthan ko lai. Credit: Salai Cung Dawt.

Be the first to comment

Leave a Reply

Your email address will not be published.


*