TTIHNUNG THIL A PUAKMI KHA ANMAH PALH BAK ARAK SI KO HIH

Beirut thilpuak mi kongkha anmah cozah nawlngeitu hna palh bak arak si diam ai, Nawlngeitu hna sin ah voitam pi an chim cang mi asi. Beirut Tilawng dinhnak hmun ah a puakmi kha Ammonium Nitrate asi lai tiah zumh dih asi. Hihi vawlei ah fawite in ati colh kho mi asi. Vawlei thatnak caah caan saupi chung an rak hman cangmi zong asi.

Culawng siloin a puak khomi thil zong ah rak hman lengmang cangmi asi.Aliamcia kum 2013 ah khan Texas ah vawlei thatnak caah tiin an rak sernak hmun ah a rak puak cang i, minung 15 an nunnak a rak liam. Hi lio caan ah hin hramhram in an puahter mi asi tiah an rak zumh. Cun kum 2001 zongah France khuapi pakhat asimi Toulouse ah Chemial lei an sernak hmun arak puak cang.

Cu lio ahcun minung 31 an nunnak a rak liam i, asinain hi lio a rak cangmi cu i palh sual ruangah asi tiah an rak ti. Anmmonium Nitrate timi hi a alh khomi oil hna he an cawh i atthawng ngaimi bomb sernak zongah hman khawh asi i, ralhrang hna nih an hman lengmang tawn ti asi. Aliamcia kum 1995 Oklahoma khuapi ralhrang nih an rak tuk zongah hihi an rak hman ti asi.

Ammoniun nitrate hi vawlei ah ati cawlh mi asi i, cuticun nitrogen achuahter caah thlaihnah thatnak caah an hman lengmang mi asi. Hi konghe pehtlaiin Labanese PM Hassan Diab nih atimi cu Beirut tilong dinhnak ah hin kum tampi chiahcang mi Ammonium nitrate ton 2750 apuah ruangah hi chiatnak hi a chuahmi asi tiah a chim.

Apuah ruangah minung zakhat renglo an nunnak aliam pin ah hliamtuar zong tampi an um. Cun umnak inn ngeilo hi minung tingthum hrawng an um tiah langhter chih asi. Ammonium Nitrate hi a himnak hmun ah chiah asi i, khangh asi lo ahcun amah te cun apuak lem lai lo tiah Professo Jimmie Oxley nih a chim.

Culawng siloin hi thil hi a hmun himnak bik ah chiah tawnmi zong asi tiah an chim. Dottletnak atuahtu hna nih cun i ralring lo caah apuakmi hi asi ko tiah nawlngeitu pakhat nih reuters ah a chim. Thil ttihnung taktak a chuak khomi asi timi hi nawlngeitu hna sin ah voitampi rak chim cangmi asi.

Sihmanhsehlaw pakhat hmanh rian an ttuan lo caah atubantuk in chiatnak achuah hi asi ko tiah an chim.Hi hmun ah an chiahnak hi kumpi kum ruk chung a si cang tiah an chim chih. An chiahnak hmun zong hi hmunhim a si ko tiah hnangam ngaiin ruahmi asi tiah PM le President nih an rak chim ve cang.

Hi thil konghi nawlngeitu sin ah voiruk theihternak kan tuah cang. Thialkam asi lo ahcun ttihnung thil achuak khomi asi timi zong kan theihter cang hna asinain zeihmanh an tuahmi a um lo tiah Lebanese Customs Department Director General Badri Daher nih a chim. Pawngkam aummi pakhat zong nih aliamcia thlaruk ahkhan an rak zoh i, hihi thialkam asi lo ahcun apuak dih lai tiah timi zong arak theihter cang hna tiah an langhter chih.