TRUMP A SUNGH AHCUN RAK ZOHTUAH UH A CHUAK DINGMI

US President a term hnihnak apek kho lomi pawl kan vun langhter lai. Tutan US president thimnak cu vote an relthlu rih lo caah ahodah a tling lai? Donald Trump maw asiloah Joe Biden dah timi theih khawh asi rih lo. Tutiang vote an relning ahcun Donald Trump dirhmun attha lo ngaingai. Cucaah tutiang sining cun Joe Biden hi atling ko lai tiah minung tampi an zumh.

Tutan thimnak ah Donald Trump a sungh asi ahcun aliamcia kum zakhat US tuanbia ah a term hnihnak president atlinglo mi chungah a panganak asi lai tinak asi. Aliamcia kum 1992 thimnak ah khan President asimi George HW Bush cu avoihnihnak ai zuam ah teinak a rak hmu lo. Kha lio ah khan George HW Bush cu Bill Clinton nih a rak tei.

Cuhnu ah President caah thimmi Bill Clinton le George W Bush (Junior) cun Barack Obama hna cu termhnih chung an ttuan kho dih. Acung vun langhter mi hlanpi aliamcia kum zakhat chungah khan President attuan liomi a voihnihnak zuamnak ah atling tthan tilomi hi minung pali an um cang. Cu hna cu George HW Bush le Jimmy Carter le Gerald Ford cun Herbert Hoover hna an si.

Herbert Hoover hi Republican a si i, aliamcia kum 1932, re-election ah Democratic Franklin D Roosevelt nih a rak tei. Herbert Hoover ateitu Franklin D Roosevelt cu a term hnihnak thimnak ah teinak a hmu tthan. Gerald Ford hi aliamcia kum 1976 thimnak ah a term hnihnak ah a sung tthan. Amah zong hi Republican a si. Amah hi Jimmy Carter nih arak tei. Jimmy Carter zong aterm hnihnak arak sung ve tthan i, Ronald Reagan nih nawlngeihnak arak lak.

Kum 1974 ah Watergate scandal ruangah President Richard Nixon cu arian in arak i zukphiat i, Vice president asimi Gerald Ford cu president caah rak thim asi. Amah hi Electoral College in thim lomi ahcun President attuanmi hi amah lawng asi. Jimmy Carter hi aliamcia kum 1980 ah Ronald Reagan arak tei lo atla vemi asi. Hi lio caan ah Reagan nih popular vote ah 50.7% in teinak a rak hmuh. Donald Trump a rak i langh hlan ah khan Reagan hi US PRESIDENT vialte lak ah kum upa bik asi.

George HW Bush hi republican chungah caan zeimawzat chung lutlai asi hnu ah kum 1992 presidential election ah a voihnihnak zuamcawhnak ah arak sung ve tthan. Thimnak ah hin BUSH cu teinak hmu dingah rak ruah asi i, rating zong 89% arak si. Asinain a tling lo. Clinton nih khan Popular vote ah 43% a hmuh i, Electoral college vote 370 arak si. Bush nih hin popular vote 37.3% le electoral college vote 168 lawng arak hmuh.

Tutan thimnak ah US President attuan cuahmah mi Donald Trump hi a term hnihnak tutan ah teinak a hmuh lo asi ahcun kum 28 hnu ah president aterm hnihnak apeh kho lomi ah tuanbia thar attialtu asi lai. Tutan thimnak ah hin Joe Biden nih Donald Trump hi atei taktak hnga maw zeitindah nan ruah cio ning asi. Thawngpang ngai cio ko hna usih.

Be the first to comment

Leave a Reply

Your email address will not be published.


*