TRUMP A LUNGTLIN LONAK ARUANG PA 5 AN LANGHTER CANG. LOH BAK ASI

Tukum 2020 US thimnak result thanhnak an tuah lai hrawngah Donald Trump le anau le hna nih vote result kongah aphunphun in thilsining an langhter. Donald Trump lei nih biapi ngai in an chimmi chungah thil biapi asimi cu panga hi asi. Cu panga cu pakhatnak ah Vote athla mi hi vote ape khomi minung nak in a tam deuh. Pahnihnak ah Aruang theih loin Biden nih vote a karh. Pathumnak, Trump vote hi Biden vote ah akal. Palinak, Vote thlaknak seh le vote relnak seh hi Democrat nih an control. Panganak, Athi cangmi vote thonghra leng an thlak.

Pakhatnak. Vote thlakmi hi vote ape khomi minung nak in a tam deuh maw? Hi konghi Donald Trump zong nih atu le tu ti awk in alanghter mi asi. Asinain evidence a um lo ti asi rih. Michigan state ah acangmi asi tiah an chim. Trump campaigner hna nih an chimning ahcun Michigan state hmun tthenkhat ah vote petu hi 100% an hlei tiah an chim.

Hi bia a chuahnak cu America Congress thimnak ah Candidate arak si vemi Republican party Rasramslan asi. Alanghter ning ahcun Township 19 ah vote arak thla mi hna hi 100% in an hlei i, Benville peng le bang cu 350% in an hlei tiah a chim. Mah a chimmi hna hi ataktak ahcun Michigan state chung ah a ummi an si lo. Minnesota state ah a ummi an si.

An dihlak in 100% tang in vote a thlami an si, Vote tambik a thlami tiah an timi Benville peng ah hin vote angeimi 71 ah 68 lawng nih vote an thlak i 89% lawng asi. Hitluk asi konain Donald Trump nih Michigan state khuapi asimi Detroit ah mipi nak in vote athlami an tam deuh tiah alanghter tthan. Ataktak ahcun vote athla mi hi 50% tang lawngte an si. Cun hibantuk thiamthiam in Wisconsin state zong asi ko ti asi.

Pahnihnak. Aruang theih loin Democrats Vote hi akarh maw? Vote an rel cuahmah lio ah Joe Biden caah postal ballot akarh tiah Trump legal team hna nih thanhnak an tuah. Hi konghi Trump sihni New York Mayor tthing Rudy Giuliani nih november ni 19 ah press ah a chim. Detroit khuapi polling pakhat ah chunhlan i, Postal ballot thong tampi a um ti asi. Cucu riantuantu pakhat sin in an theihmi asi.

Motor pahnih nih an phurh tiah an rak phurh ti asi. Cu thok suimilam pahnih a tlin hlan ah Michigan state ah vote pek mi cu tingkhat in akarh tiah an chim. Cu kong cu biacaihzung ah an chuahpi. Asinain District court nih asi kho lomi asi tiah an rak khirh hna. Michigan le Wisconsin state ah Democrate vote akarh tiah an chimcaih mi cu an khuapi pahnih Detroit le Milwaukee vote an rel dih ka ah a si.

Hi zawn ah theih aharh mi cu hi khuapi pahnih hi Democrats tthawnnak asi timi zong hi theih ahau. Hi konghe pehtlaiin Reuter News agency nih 2020 US thimnak kong biachokvai dottletnak an tuah. Cu ahcun Wisconsin le Michigan cun Pennylvania state i, postal ballot zankhat ah ai thlen in akarh tiah an chimmi hi ai keih kawh lo. Biden caa vote lawng asi lo tiah an chim.Ruah dingmi pakhat cu Michigan le Wisconsin siseh state dang hna zong vote thlak caan adih ah vote rel thok asi i, postal ballot hi rel hmasa asi. Cucaah vote a karh bantukin alangh nak zong hi asi.

Pathumnak. Donald Trump vote hi Joe Biden vote ah an kalter taktak maw? Vote kongkau an buainak state ah hin Voting Machine system hmangin vote million tampi hna cu Donald Trump vote asimi kha Joe Biden vote ah an canter tiah Donald Trump le a legal team hna nih an langhter. Asinain hithil ahhin evidence hmuh ding a um lo caah thilsining cu Trump lei zong nih zeihmanh an fianter lo ti asi.

Hi konghe pehtlaiin Donald Trump thanhnak atuahmi kha amah adirkamhtu OANN thawngzamhnak nih an langhtermi chirhchan in asi tiah an chim. Tutan thimnak ah rampi huap in Dominion Voting Machine hman asi i, mah voting system hi Edison Research hna nih zohfelnak an tuah i, vote million hna cu ningcang loin a um tiah OANN nih alanghter.

Hi konghe pehtlaiin BBC le America News agency minthang hna nih Edison Research Company president Larry Rosin cu ton biaruahnak an ngeih. Asinain zeihmanh report dik lo a um lo i, vote ningcang loin a kalmi hmuh asi lo tiah a chim. Dominion voting system company zong nih vote ningcang loin akal timi hi zakhat ah zakhat in ahman lomi asi tiah thanhnak an tuah ve.

Palinak. Vote peknak seh le Vote relnak seh hi Democrat nih an control mi asi maw? Dominion Voting System Company hi Left-wing hna kuttang ah a ummi an si tiah Donald Trump nih a puh hna. Cun Bill Clinton le Hilarry Clinton siseh Democrats hna he hi company cu hmunkhat an ttang tiah Trump legal team hna nih an ti rih. Dominion company nih atimi cu kannih cu zeibantuk political party hmanh he pehtlaihnak angei lomi kan si.

America company sawhsawh pakhat te khi asi ko tiah an chim. Cun House of representative president Nancy Pelosi siseh Bill Clinton te nupa hna he pakhat hmanh ttuanttinak kan ngei lo tiah thanhnak an tuah. Mah company hi politics he pehtlaihnak an ngeih lo zongah Democrats le Republican hna nih an bawmh thiamthiam mi asi tiah an chim.

Panganak. Mithi asi cangmi nih vote an thlak timi asi kho maw? Tutan thimnak ah hin zuamcawhnak fak a umnak state ah mithi asi cang mi vote thong tampi a um tiah Donald Trump dirkamhtu hna nih an chim. Cun Michigan state ah mithi hna vote thonghran leng a um tiah an chimmi kongah BBC nih cun a zum kho lem lo. Hi kong hi Trump dirkamhtu hna hmurka in a chuakmi asi.

Mithi thonghra min address code number, vote an thlak Ni cun an chuah ni siseh an thihni tiangin langhter asi. Hi langhtermi list cu Michigan state official website ah zoh khawh asi. Culawng siloin America ram death list website zong ah tampi alang i zohkhawh thiamthiam asi. Minung 328 umnak America ah hin min aikhat mi le chuah ni thla zong aikhat mi tampi an um lai.

Hi konghe pehtlaiin BBC nih dottletnak atuahmi chungah an fianhmi cu minung 31 chungah minung pathum hna cu a thi cangmi an si. Pakhat cu postal ballot vote a thlak hnu ah a nunnak aliammi asi i, adang pahnih zong min aikhat mi address zong aikhat mi fa pahnih angei cangmi an si veve i, cucu anmah zong an khuaruah ahar ngaingai. Athimi pakhat kha athimi pahnih ah an rak tuah tinak asi. Vun tuak tikah mithi vote hi atam cu asi lai lo tiah BBC nih alanghter.

Be the first to comment

Leave a Reply

Your email address will not be published.


*