THAWNGPANG TTHATUK A CHUAK CANG BLM CU AN LO NE AI

BLM Nih Tazacuai An Timhmi Mirang Nuva An Luat.MISSOURI State, St Louis khua I a ummi, mirang nuva, Mark le Patricia McCloskey cu June 19 ah khan, minak ttantu, Black Lives Matter pawl nih an inn tual ah an au hnawh hna caah meithal an I chuah zau I an intual in an bawmh hna. BLM pawl nih an in area kulhnak zeimawzet zong an hrawh ti a si. Asinain ikahnak taktaknak a chuak lo.

Mah ruangah mirang nuva hna cu cozah sihni prosecutor nih tazacuai ding in court ah a file. Asinain Missouri state attorney general Eric Schmitt nih minung nunnak caah tih nunnak an tuah si loin BLM pawl nih nuva hna chungah political persecution” an tuah a si caah tazacuai lo dingah biachahnak a tuah caah tazacuainak in an luat.

Covid-19 Nih Amazon Boss/CEO Jeff Bezos A Rumter Chin. Coronavirus ruangah Amerian minung tampi cu riantuan ding hmanh a ngei lomi kan tam lio caan ah Amazon company ngeitu Jeff Bezos cu a rum chin lengmang. Cacawn nikhat ni lawngah a hmuhmi phaisa cu billion 13 renglo a si.

Atu cu a ngeihmi diklak US$ billion 189 a phan cang. US company nganpi pi a simi, Nike company ngeihmi, $149.7billion, McDonald company ngeihmi, $142.3billion, le Exxon Mobile ngeimi, $184billion nak in a ngeihmi a tam deuh cang.

Jeff Bezos nih tukum chung lawngah a hmuhmi phaisa cu US$ 74 billion a si. US minung tampi cu rian an tuan kho lo, an um hmun in amazon ah online in thil tam tuk an cawk pin ah Amazon stock a kai tuk caah atu bantuk a ngeihchiah a chap chin lengmangnak a si an ti.

US Cozah Bawmhnak Kong Ceihhmainak An Tuah.Senate Republican party hruaitu McConnell le Democrats hruaitu hna cu tuchun ah white house ah tonnak an ngei. Republican hruaitu hna nih avoi 2nak bawmhnak check pek dingah an lungtling. Asinain kum khat ah income 40000 in a tanglei a ngahmi kha pek an duh deuh hna.

Tutan ah Republican pawl nih chuahpi dingah an I tinhmi hi one trillion tluk a tammi bill a si. Mah chungah 100 billion cu state le local cozah caah hman an duh I, billion 70 cu sianginn him tein onnak caah hman a duh. Ceih hmainak a dih rih lo caah zetik ah biachahnak an tuah lai a fiang rih lo. August thla thawk ah hin ceihhmainak a dih lai tiah an zumh. Cucaah mipi sin chek a phak cu August zarh hnihnak lei lawngah a si lai ti a si.

Chinese Spy Pahnih US Cozah Nih Tazacuai Hna.US Department of Justice nih Tuluk miphun pahnih hna cu US cozah, private company le Covid-19 kherhhlainak an tuahmi pawl a thlithup in online an in fir, an hack caah DOJ nih taza an cuai hna. Tuluk cozah caah spy rian kum 10 renglo a tuan cangmi, Li Xiaoyu, 34, le Dong Jiazhi, 33 cu Tuluk ram I a ummi an si caah Tuluk cozah nih US ah an kuat lai an zum lo.

Maryland, Massachusetts le California ah Covid-19 research an tuahmi thilri le file zong fir an I zuam ti a si. Zeiltuk an fir cang timi chim khawh a si rih lo. Tuluk cozah nih hin US ah sianginn kaimi Tuluk singngakchia pawl asiloah Tuluk ram in computer hacker a thiammi pawl hna hmang in US cozah le private company pawl thil an sermi le research an tuahmi pawl cu an fir I, a ttuh tampi an serchuah ti a si.Credit:Salai Lairamthang