THAWNGPANG TTHA TAKTAK RUSSIA PRESIDENT NIH ATHANH CANG

Russia president Putin nih nawl a chuah cang. Russia nih serchuahmi Covid-19 vaccine Sputnik V vaccine cu zarhkhawh in hman asi lai tiah nawl a chuah. Tutan ah an serchuahmi Sputnik V vaccine hi 2million dose an serchuah cang ti asi. Hi sii an sermi cu hneksaknak an tuahmi ah 95% bak rinh atlak tiah an chim pin ah adang an serchuahmi vialte nak in rinh atlak deuh tiah an chim.

Vaccine min ah Sputnik V vaccine tiah an timi hi Soviet Union chan ah an satellite minpu in an sak mi asi. Cun mah sii hi minung thong 40 ah hneksaknak an tuahmi zong asi. Hi konghe pehtlaiin Coronavirus Task Force lutlai asimi Deputy Prime Minister Tatiana Golikova le Putin chawnh biaknak an ngeih lio ah Putin nih zarh khawh in hman dingin a chim.

Cun mah sii hi cawnpiaktu hna le sii lei ah rian attuanmi nan pek hmasa hna lai tiah a chimh chih. Tutan ah an serchuahmi sii hi Russia minung caah cun alakka tein phawtzamh asi lai i, hi sii aduhmi le duhlomi tu cu anmah pumpak duhthimnak asi lai tiah langhter chih asi. Hi konghe pehtlaiin Health Minister Mikhail Murashko nih atimi cu minung tingkhat renglo hna cu vaccine hi pek an si cang tiah a chim.

Russi cu vawlei ram Covid angeimi chungah atam bik apalinak dirhmun ah a ummi an si. Zawtnak angeimi hi 2.3 million an si cang i, hi chungah a nunnak aliammi hi minung thong 41 an si. Sihmanhsehlaw Russia cu November thlathok cun zawtnak angeimi hi an ttumchuk chin lengmang cang ti asi.

Relchih Thawngpang Dang:Malaysia a ummi nih hithil a cannak hrawnghrang ahcun chuah langhtuk lo ah attha i, ralring tein um cio hna usih. Laimi tampi umnak hmun asi mi Bukit Bintang, Low Yat Plaza ah i sikvelh nak a chuak i, hi buainak ah pehtlaihnak angei timi minung 42 hna cu police pawl nih an tleih cang hna. Zeiruangah dah hi hithil achuah timi biatak tein dottletnak an tuah lio asi.

Hi konghe pehtlaiin minung tampi nih an chimmi cu hika an buainak hmun electronic thilri an zuarnak hmun asi i, kumdang zongah dawrngeitu hna le thilcawtu karlak ah buainak a chuak lengmang. Curuangah tutan zong hi cubantuk ruangah asi ko lai tiah an zumh. Hi buainak konghe pehtlaiin Dang Wangi District Police Chief ACP Mohamad Zainal Abdullah nih atanglei bangin a chim.

Hi thil achuah hi zan suimilam 7 hrawnghrang a si tiah a chim. I vuaknak a chuahnak hi miphun le miphun karlak buainak cu asi lai lo. Thilcawtu le Thil zuartu hna karlak ah buainak hi a chuah asi ko lai ti kan zumh. Cun tleihmi minung hna zong hi kum 20 in kum 35 karlak lawngte an si hna i, atu ah hin Dang Wangi police sakhan ah biahalnak tuah dingin chiah an si hna.

Tuan deuh te ahkhan Social Media ah minung pa pawl abu in Shopping mall hmai ah an i vuaknak video cu rak langhter asi cang. Hi an thlahmi video hmangin thilsining dottletnak ahrampi hi theih khawh asi men lai ti asi. Acunglei langhter cang bangin biatak tein dottletnak an tuah cuahmah asi lio ah kanmah Laimi zong iralring cio hna usih.

Aruang cu hibantuk buainak a chuahnak hmun le hma ah hin palek pawl an um lengmang caah chuahvah tik zongah ralring tein um cio hna usih. Acunglei ah kan langhter cang bangin tutan buainak a chuahnak hmun le hma hi Laimi tampi kan umnak hmun asi caah ralring te tuin um cio hna usih. Chirhchan: DMM

Be the first to comment

Leave a Reply

Your email address will not be published.


*