RALZAM CAAH THAWNGPANG CHIATUK A CHUAK CANG, TRUMP NIH AA TIMHMI APHUAN

Trump nih Refugee Cohlannak Faktuk In Thumh a Timh. 2021 fiscal year i US ah luhter dingin refugee cohlan a timhmi miluzat hi 15,000 tiang tlawm in thumh a timhnak kong Wednesday ah khan Trump a cozah nih a langhter. Cucu chanthar refugee laknak tuanbia chuanthluak ah a tlawmbikmi milu thumnak a si.

A hleice in COVID-19 a tlun cuahmah lio caan a si caah, American mipi an himnak le sithatnak zawn a ruah caah a tu bantukin Trump a cozah nih a duhnak a langhter hi a si, tiah State Department nih a chim.Ni kum ah khan 18,000 tiang in a thumh cang i, cu hna lak zongah cun coronavirus ruangah le biahalnak a tamtuk caah 18,000 lakah a zatceo tluk hrawng lawng US ah an lut kho.

Fiscal year ai thok hrawnghrang paoh ah hin refugee kongah karhlannak thar tuah a hmang theu. US law ningah cun, cohlan dingmi Refugee miluzat khong hi President nih Congress an ruahnak a hal hna hrimhrim awk a si. Biachahnak a tuahtu belte cu White House hi a si te ko hnga.Biaknak ruangah hremmi asiloah hrem ding dirhmun a phanmi, Iraq ah a um i US a tanhtu refugees, El Salvador, Guatemala, Honduras, Hong Kong, Cuba, le Venezuela in a rami refugees pawl deuh lawng hi cohlan dingin an langhtermi a si.

November ah Trump ka tei a si ah cun, kum khat chungah refugees 125,000 tiang ka laak lai, tiah Joe Biden nih biakamnak a tuah.Trump nih refugee milu a tumhmi pawl vun siamremh thannak dingah kum tamlak a rau kho mi a si, tiin Democrats lei in aiawhtu pawl nih an chim. Cucaah, refugee milu thumnak hi zeitluk khulrang in dah ka remhsiam khawh lai, timi kongah Biden zong nih chim khawhmi zeihmanh a ngei kho rih lo.

US lei lut dingin refugee a thong le a sang in an i tlar lulh ko hna. Tam u le bang cu cohlan ding le an sining dothlat ding dirhmun in an i hlattuk rih.A tu bantuk i refugee lak ding muluzat thumh a si mi hi minung kan i ngeih dingmi ziaza a le kan ram nih kan i dirpi mi thil vialte a chiatchuah cikcektu a si, tiin Wednesday ah khan Lutheran Immigration and Refugee Service an president le CEO a si mi Krish Vignarajah nih Twitter ah a tial. Cattialtu. Chelsea Bawi

Be the first to comment

Leave a Reply

Your email address will not be published.


*