RALHRANG KAWLRALKAP NIH UN PALAI AN TINING CU APOI KO

Kawlralkap ralhrang hna nih UN Palai Christine Schraner Burgener an tining cu afak ngaingai. UN Palai Christine Schraner Burgener zong nih fiang tein bia a chim ve. Ralhrang kawlralkap nih UN palai sin ah an chimmi cu nangmah chawnh biak dingah kan i manh rih lo tiah an rak ti. Asinain UN palai nih ative mi cu kei cu hmaitonh in nanmah he chawnh dingin ka manh peng ko tiah ati ve hna.

Culawng siloin UN Palai Christine Schraner Burgener nih a ti tthan rih mi cu phung ning loin cawlcanghnak cu caan sau a nguh lo, Phungning loin cawlcanghnak nih caan saupi zalonnak a chuahter kho lo tiah a chimh ve hna. Kawlram buainak konghe pehtlaiin UN palai Christine Schraner Burgener cu ralhrang kawlralkap bawi hna he hmaitonh in tonnak ngeih dingin ramchung luh aa tim.

Sihmanhsehlaw April ni 9 in tutiang kawlram chung a lut kho lo i, Thailand ah a um peng. Aruang cu Ralhrang kawlralkap hna nih kawlram chung luh an sianh lo caah asi. Christine Schraner Burgener hi UN nih Myanmar palai caah an hmanmi asi. Ramchung buainak a chuah hnu zongah online in kawlralkap bawi hna he chawnhbiaknak an ngei tawn. Asinain hmaitonh in an i chawn kho lo.

Cun Christine Schraner Burgerner hi UN Security Council Meeting zongah kawlram konghe pehtlaiin biatak tein bia a chimtu zong a si. UN nih kawlralkap kong siseh kawlram cozah kongah amah hi an chawnh lengmang mi a si. Tutan ah Christine cu ralhrang ralkap hna nih ramchung luhnak nawl an pe lo. Ralhrang ralkap he hmaitonh biaruahnak ngeih aduh caah thailand tiang arak phan.

Sihmanhsehlaw Ralhrang kawlralkap nih ngeihchia ngaiin an tuah cang. Nangmah he i chawnh dingah kan i manh rih lo tiah lehnak an tuah. Keicu nanmah chawnh dingah ka manh peng ko. Phungning loin cawlcanghnak hi sau anguh lo i, caan saupi zalonnak a chuahter lo tiah ralhrang kawlralkap pawl hna cu a chimh ve hna.Christine cu kawlralkap cungah alungrawk ngaingai. Ramchung luhnak nawl an pek te ko lai tiah an ti nain zeitik ah dah timi theih asi lo.

Hopes for UN Security Council action against Myanmar coup 'waning' fast;  Special envoy - Saudi Gazette

Abiapi Mi: Hi thawngpang hi a biapi ngaingai mi thil a si caah thawngpang i thanhcio hna usih. Ralrinnak tluk in a ttha mi a um lo. Laitlang khuate kip ah Min Aung Hlaing hruaimi Ralhrang pawl an vak ngai cang. A cheu ralkap cu khuachung zong luh lem loin, khua a hel mi hna an um tiah Thantlang peng khuate pakhat sin in kan theih.Thantlang peng khuate cheukhat ahcun USDP party an tam, a poi khun mi cu USDP Party cheukhat cu khua ah bochan deuh mi hna an i tel caah khuami nih an ngamh tuk hna lo.

Ralkap lei ah a ttang mi an si ko tiah kan theih. Nai Ralkap nih rampi uknak hramhram in an lak bak khan Thantlang peng khuate tampi ah USDP thanthar (Flag) cu USDP party lutlai pawl nih an i thlai caah khuami cu an lau ngai ti asi.Khua nih bochan deuh mi an si fawn caah mino thinlung an zawt ter i cawlcang ngam loin a um mi an rak tam pi.Cun tutan zong ah Ralkap cheukhat cu khuachung ah an lut lo, nain thil sining an ngiat mi cu a um ko ti asi.

Cu caah USDP party nih kan thil tuah mi Ralkap sin an kan report lai ti an phan caah khua mino cheukhat cu a thinphang mi an um tiah kan theih fawn.Ralkap nih meithal nan ap dih lai timi thawngthanhnak an tuah bak in khua cheukhat ahcun Meithal a um zat a rel mi an um, USDP party nih khua ah Meithal zun zeizat dah a um timi a thli tein dothlat hna sehlaw a dawh ko ti asi fawn.Cu caah a biapi ngai mi cu: CNF/A, a si lo ah Tlangcung hriamtlai nih hmunkhat tein kan doh cang lai timi thawngpang a um hlan, CRPH nih Federal Army timi a phuan hlan ahcun Thantlang peng khuate dihlak zong nan meithal langhter rih hlah uh.

Cun pumpak in ramtaang kal, ram riah le ram lak ah kal ti bantuk tuah lo ah a ttha bik mi. Kan mah Laimi, khuami chung lila in Ralkap a dirkamh mi an um peng timi philh hna hlah usih law, thawngpang kan i thanh ning, kan cawlcangh le biachim ah tha tein kan pawngkam zoh hmasa lengmang hna usih.A bik in Meithal hrimhrim cu langhter rih hna hlah usih law, raldohnak a chuak cang, kan doh cang lai timi a um taktak hlan cu Ralkap cung ah Meithal puah hmasa lo ding zong a biapi ngai ngai.

Meithal a puahnak paoh ralkap nih a tomtom in an fuh, Kalay, Tamu ti bantuk zong meithal an puah bak in a tomtom in an fuh hna. Laitlang khuate zong ah cu bantuk cu asi ko lai. Cu aah rampi huap, Laitlang dih lak huap in kan doh cang lai timi biachahnak, thawngthanh le biakam a um hlan cu a cikpak in meithal puah lo ding, Meithal hrim langhter lo ding a si lai i meithal hrimhrim zong ap lo ding a si lai. Note: Hi thawngpang hi Thantlang peng khuate (security caah langhter a duh lo) pakhat nih an kan kuat mi asi. Na hawile sin ah share in kan bawm ve.

Be the first to comment

Leave a Reply

Your email address will not be published.


*