PRESIDENT DONALD TRUMP NIH THIL KALPHUNG A THLEN: BIDEN

President Elect Joe Biden nih zapi sin ah a chimmi cu America a rak kir tthan, Hnu soh loin vawleipi hruai dingah timhcia ka si cang. Hmunkhat thinkhat tein rian ttuan ahau i, Zawtnak coronavirus le khuacaan thlen kongkau zong a chim chih. Vawlei cung ram hruaitu hna nih US cu Pacific le Atlantic siseh vawlei cung hmunkip ah hruaitu asinak hi pehzulh dingin ruahchahnak kan ngei ko tiah a chim.

Hi konghe pehtlaiin Joe Biden nih NBC News ah a chim tthanmi cu President DOnald Trump nih hin thil kalphung a thlen i, America First, America khuahar bangin atuah caah kan ttuanpi hawi hna nih buainak an ton tiah a chim. Cun Irish ramri kongkau zong ah UK PM siseh hruaitu dang hna zong chimh ruahnak ngeih asi cang tiah a chim chih.

Joe Biden hi Irish ciruang asi caah ramri fakpi in kilven hi a duh lomi asi. Ramri chak le thlang khar hi ka duh lo i, adik lomi a si tiah a chim rih. Biden nih a chim tthanmi cu cozah hruaichung ah hin a voithumnak Obama term asi lai lo. Obama le Bush cozah chan lio thil sining le atu thil sining hi ai khat lo tiah a peh rih.

Hi konghe pehtlaiin Joe Biden nih Secretary of State ah Antony Blinken a thim i, Climate change envoy ah John Kerry, Director of national Intelligence ah Avril Haines, Secretary of Homeland Security ah Alejandro Mayorkas, White House national securtiy adviser ah Jake Sullivan le US ambassadro to UN ah Linda Thomas-Greenfield hna a thim. Hi pin ah Federal Reserve chair Janet Yellen zong treasury secretary ah a thim lai tiah zumh asi.

Tutan rian biapi ttuan dingah Joe Biden nih a thimmi hna chungah Kerry le Sullivan ti dah lo adang a thimmi vialte hna cu Senate nih cohlannak tuah ahau dingmi lawngte an si. Tutiang sining ahcun US President hna nih nominee an tuahmi hi cu cohlan lengmang an si i, cohlan lo timi cu a um thenglo caah tutan a thimmi hna zong fehter asi te ko lai ti asi.

Joe Biden cu phungning tein US president asi rih lo nain lawlawse atu cozah thar caah tangka hmannak nawl zong pek a si cang. Culawng siloin White House top secret zong theihkhawhnak nawl angei ve i, zeibantuk biathli zong atheih ve cang lai. Asinain thimnak result hi fiangtein alangh i, Trump nih teinak a hmuh asi ahcun ai thleng tthan lai. Nain Biden nih teinak ahmuh ko ahcun pehzulh asi lai.

Relchih aduhmi caah US Thawngzamhnak hi khuaruahhar ngaingai cu an si ko cang. Thawngzamhnak fami hna nih Pennsylvania biacaihtu nih Pennsylvania Governor le Secretary of state hna cu Biden nih teinak ahmuh timi cu pehzulh lo dingin nawl apek hna timi an langhter. Asinain CNN le BBC nih cun Trump legal team hna nih tazacuainak an tuahmi cu cohlan asi lo tiah an langhter ve hoi.

Zeiruangah dah asi timi zohtikah Mainstream media hna nih Donald Trump an haut tuk caah Trump dirhmun athatnak vialte hna cu pakhat te hmanh langhter le thanhnak tuah an duh lo ti i, a chiatnak lawngte hi mipi sinah an zamh tawn timi hmuh khawh asi. US thawngzamhnak ngan timi vialte chungah zakhat ah sawmkua hi Trump that lonak lawngte a langhter mi an si.

Donald Trump dirhmun athatnak konglam rel na duh asi ahcun Epoch Times siseh Justthenews siseh, Newsmax cun OANN hna nih an langhter mi pawl hi zohchih lengmang ahau. Tutan zongah Judge Patricia McCullough nih court nawl chuahmi konglam zong turleytalk.com ah alanghter. Amah hi thilsining biatak tein acuanmi le zumh atlakmi ngaingai mi asi tiah an chim.

Tutan zongah thawngpang thar alanghter mi cu Pennsylvania state legislature hna nih US constitution nih nawlngeihnak apek bantukin thimnak konglam ah hman dingmi Act 77 hi asi. Hi phunghram ah fiang tein thimnak kong alanghter mi cu thimnak tuahni november ni 3 zan suimilam pariat hnu ah ballot paper alut mi vialte hna cu rel ti lo ding tiah alanghter.

Sihmanhsehlaw thimnak tuah hnu nithum tiangah vote cu thong tampi relchih asi tiah an langhter. Tutan ah hi thil a vun si tikah phunghram ai kalhmi asi caah vote kongah zohtthan asi lai tiah an chim. Trump legal team hna nih US Supreme Court ah kalpi an timhnak aruang bik zong phunghram he aikalh mi asi caah tiah an i timhnak hi a si. Arauh hlan ah thawngpang thar a chuak chin lengmang ko lai hngakcio hna usih.

Be the first to comment

Leave a Reply

Your email address will not be published.


*