PRESIDENT DONALD TRUMP HMANH NIH A BIAPI BIK BAK ASI TIAH A CHIM CANG

Donald Trump party pawl zong tuah hram an thok ve cang. Republican National Convention cu tuah hram an thok cang. US caan in cawn nikhat in khan Republican National Covention cu tuah an thok cang i, Hihi Nili chung an tuah dingmi a si. Tutan ah Republican National Convention hi Charlotte, North Carolina ah an thok.

Tulio president attuan cuahmah mi Donald Trump cu a ralaimi November thla US president thimnak ah i zuam tthan dingin candidate caah nominate an tuah tthan. Culawng siloin Vice president ca zong ah tulio US vice president attuan cuahmah mi Mike Pence cu a term hnihnak si dingin nominate an tuah tthan rih.

Tutan ah an tuahmi Republican National Convention hi duhning le ruahning bantuk in mipi an chuak kho hna lo. Aruang cu tulio zawtnak ruangah hin asi. President candidate caah Nominate atuah dingmi hi Party delegate 336 lawng an chuak kho tiah an langhter. Vote an thlak hnu ah Donald Trump cu party official candidate caah an thim.

Vote thanhnak an tuah hnu ah Donald Trump cu biachimnak zong angei colh. Donald Trump nih atimi cu a ralaimi November thla thimnak tuah dingmi cu kan ram caah abiapi taktak mi thimnak asi lai tiah a chim. Tutan Republican National Convention ah hin tlangtar an tuah mi cu Honoring the Great American Story tiah an hman.

Donald Trump cu tutan ah phungning tein thimnak an tuah mi konghe pehtlaiin a ralai mi Cawn Ningani zan ah hin White House South Lawn in biachimnak angei lai tiah an langhter chih. Donald Trump zong nih presidential candidate caah nominate an tuahmi cu a cohlan i, a cohlannak kong zong a chim lai tiah an chim.

Tulio US zawtnak kong relchih a duhmi caah. US ah akarh taktak mi Coronavirus zawtnak cu ttumchuk lei apanh cuahmah cang tiah thanhnak an tuah. Zarhpi zarh nga chung zawtnak akaining an zoh tikah zawtnak tlangrai ttihnung asimi Coronavirus zawtnak cu a ttum chung cang tiah an langhter cang. Dottletnak an tuahning ahcun US ah hin Zawtnak Coronavirus ruangah a nunnak aliammi hna hi Nifatin thongkhat lengmang cu an si ko lai tiah an ruah damh.

A liamcia zarh chung ah khan zawtnak ruangah a nunnak aliammi hi minung thongruk le zasarih renglo an si. Asinain zarh hmasa he tuak tikah a thimi hi 9% in a ttumchuk tiah an chim.Cu lawng siloin a liam cia mi zarh chung ah khan zawtnak angei thar mi hna hi minung tinghnih le thongsawmkua le thongsarih hrawnghrang an si.

Cun a liamcia thlacheu hrawng tiangah khan zawtnak angeithar mi hi Tingli, thongsawmruk le thongriat renglo an rak si tiah an chim chih. Aliamcia thla le tuthla an tuak tikah August thla hi an ttumchuk ngaingai cang.June thlathok in US ah coronavirus zawtnak angeimi hna hi nifatin minung thongsawmnga nak tlawm deuh an si cang tiah an tuak ning a si.

Aliamcia zawrh chungah zawtnak atam deuhnak hmun cu South Dakot asi i, A karhnak aruang bik cu August ni 7 in ni 16 tiang Motorcycle Rally an tuah caah asi tiah an langhter.Kha lio ah khan zawtnak hi an i chawnh caah atu bantuk in hi hmun le hma ah hin akarh deuhnak cu asi tiah an chim. Kan hnu zarh chungah nifatin Sample an lakmi hi abuaktlak in nifatin minung tingruk le thong sawmrih le thongnga hrawng an si.

July thla ah khan nifatin sample an lakmi hi minung tingriat renglo an si lai tiah an tuak rih. South Carolina State hi US ah zawtnak angeimi vialte chungah 22% an si i, Texas le Nevada cun Idaho hna hi zawtnak atamnak hmun le hma state an si. Theihcia le thanhnak tuah cang lengmang cang bantuk in US ah coronavirus zawtnak cu January ni 20 in khan aa thok. Zawtnak angei hmasa bik mi hi Tuluk ram Wuhan in arak tlungmi a si tiah an chim.

Be the first to comment

Leave a Reply

Your email address will not be published.


*