PAKHAT LE PAKHAT AN I LEHNING CU ATURU KO CANG HIH

Donald Trump zong nih Joe Biden cu lehnak atuah ve cang. Naite ah khan thimnak result konghe pehtlaiin Joe Biden nih Donald Trump cu fak ngaiin a tthuat. Biden nih nizan ah a timi cu President Trump nih vawleipi theih in democracy kalphung fakpi in achiatchuahter i, American tuanbia ah president mawh phurhnak atlinh lo bikmi tiah theih asi asi lai.

Culawng siloin apeh rih mi cu Donald Trump Akhuaruah ning hi theihthiam ahar ngaingai ko, Acawlcangh ning hi thinhung ngai zong asi tiah Joe Biden nih atthuat.Donald Trump nih hin teinak ka hmu lai lo tiah a theih ko, asinain huam lo ngaiin cawlcanghnak atuahmi khi asi ko tiah Joe Biden nih Donald Trump cu fak ngaiin a tthuat.

Hi konghe pehtlaiin Donald Trump zong nih Joe Biden cu fak ngaiin lehnak a tuah ve. Vote hman lomi tampi thong tampi kan hmuh cuahmah lio ah zeiruang ko ahdah Joe Biden nih hin rianrang in cabinet ser hi ai hnawhnam? State pali ah hin fawite in thil ai thleng kho mi dirhmun a si i, teinak ding ahcun hihi a za ngaingai mi asi. Cun biacaihzung, phungphai hna nih raltha tein thimnak hi ahman tein khuakhan lairelnak an tuah ka zumh, Vawleipi nih aa kan cuanh cuahmah tiah ati ve.

Thawngpang thar Relchih. Pennsylvania i Vote Namhnehnak Tuah Rih lo Dingin Trump nih Tazacuainak a Tuahmi Biaceihbawi nih a Hnonpiak. Mail-in ballots kongah thil ai ningcanglo mi a um, tiin Trump campaign nih an chimmi cu PA federal biaceihbawi nih thalo in a mawhchiat hna hnu ah Saturday ah khan a hnonpiak hna i, Biden buan a comi hnahnawh a petu hauruang a hrawhpiak. Vote namhnehnak hi Monday ah khin tuah ding a si cang, tiah theih a si.

Vote petu million 7 lenglo hnung chittaak dingin Trump campaign nih Biaceihbawi Matthew W. Brann cu an chimh. “PA i vote results nan cohlan duh lo taktak a si ko ah cun, phungning tein tazacuainak le thil ai ningcanlonak tehte felfai te rak i ken u law biaceihzung ah rak chuak ngat hen u” tiin J. Brann nih a mawhchiat hna.Trump campaign nih tazacuainak an tuah mi hi hrih le hram pakhat hmanh langhter khawh tung lo in le tehte zong um tung lo in sungh lai tih ruang i tawnchommi a si, tiin J. Brann nih a hraan hnawh hna.

Electon phichuak a khupthal leh duh ruang i Key swing states – Michigan, Georgia, Nevada, Arizona le Wisconsin – i Trump nih tazacuainak a tuahmi vialte cu hnonpiak an si cang caah, hlawhtlinglo a si cang.Mail-in ballots nan tawlrel ning a dik lo, tiin Trump campaign nih Nov. 9 tein khan PA’s secretary of state Kathy Bookckvar siseh, cun Democratic an tamnak bik county pawl taza an cuai hna.

Ms. Boockvar lamhruainak tangah hin PA i Democratic counties pawl nih cun mail-in ballots a hung phanmi ah a tlamtlinglo mi an hmuh ah cun votepetu an chonh than hna i an remhter than hna. Asinain, kannih Republican kan tamnak PA chung county ah cun ai palhmi kongah thawng kan thanh ti hna lo, tiin tazacuainak an tuah hi a si.Cu ti thil tuah cu kan US Constitution chung ai tialmi rualrangtein kilvennak, timi nan buar a si, tiah Trump campaign nih an langhter.

Hi bia hi cu mithla lem cam chommi (Frankenstein’s monster) he ai lo. Trump Campaign nih hin dirhmun thitha nan i ngeih lo. PA chungum county cheukhat vial nih ballots an remhter than hna, a dang vialte remhter than an si lo tikah kan caah a faaktukmi a si, tiin nan chimmi zong tehte nan langhter kho fawn lo, tiin J. Brann nih a mawhchiat hna.Ms Boockvar fimcheuhnak thawngin a cheu county nih remhsiamnak an tuah, a dang nih cun an tuah lo, tiin nan chimmi bia nih hin rualrangtein kilvennak phung hi a hrawk lo, tiin a chim.

Tutan i PA i Trump campaign nih tazacuainak an tuahmi hnon an tonmi he hin cun Election Day hnu i tazacuainak an tuahmi hnonpiak an tonmi hi 30 lenglo a si cang. PA ah hin electors 20 Biden nih a co than cang lai. Election integrity ven duh ah tazacuainak siseh, a tomtom in vote firnak tehteh he langhter dingin tazacuainak kan tuah hrimhrim lai, tiah bia kan kamh hna” tiin Thursday ah khan Trump a pumpaak sihni Mr Rudolph W. Giuliani nih a chim.

Asinain, nihin tiangah cun cu tazacuainak cu an tuah rih lo. J. Brann nih a tawlrelmi tazacuainak hi a dang tazacuainak an tuahmi vialte nak hmanh in pungsan a tlai cem a si. Tacacuainak an tuah a zarh khatnak chung hmanh ah Trump campaign nih sihni 3 tiang an i thleng manh. Tuesday ah Mr Giulian nih nih leklak tiin a vun zuamhnawh. A pumpaaktein PA i Williamsport ah a ummi Federal District Court ah a vung kal i Mickey Mouse kong le, Chicago mayor thlun Richard M. Daley le Philadelphia mafia kong in biahram a thok.

Saturday i capar in tazacuainak an tialmi ah PA governor Tom Wolf a min spelling a palh fawn. PA pumpi ah le a dang state 9 ah Democratic party nih vote firnak nan tuah, tiin Mr Guiliani nih a bia a thok ko nain, J. Brann nih biahalnak a tuah hnu in cun ai phetchem than i, “Hihi cu keimah ka pumpaak in ka chimmi a si lo. Hihi cu dehhlennak case a si lo,” tiin a bia a leet than.

J. Brann nih biachahnak a tuahmi (nawl a chuahmi) hi capar in cun tlap 37 tlukin a tam i, Trump campaign nih tazacuainak a tuahmi le, “Kan mail-in ballots an rel chih lo,” tiin a chimtu Republican votepetu 2 hna nih an tuahmi tazacuainak cu ning le cang tein a hnonpiak hnanak thatien a tial chih dih. Hi tluk in hin tehte pakhat te hmanh a um lo bu ko zongah cun election results a khupthal lehpiak dingin Trump campaign lei nih an chimhmi hi J Brann nih ai zumh lei ai zumh kho lo bantuk khi a si. “US ah hin cun votepetu minung pakhat belnen hi kan cohlang kho lo. US ah minung a tamnak bik 6nak a si mi PA ah hin votepetu dihlak in pekter si ko seh. Kan mipi, kan laws, le kan peng le tlaang hna nih tamdeuh riantuan kan hau ko rih,” tiin a chim. Credit: Chelsea Bawi.

Be the first to comment

Leave a Reply

Your email address will not be published.


*