THAWNGPANG TTHATUK TRUMP CAAH A CHUAK CANG HIH, BIDEN ALO CANG

Phungkalh an si tiah timi State pali hna cu tuchun ah fianternak tuah dingin an auh cang hna. Tuzanlei suimilam pathum ah an auh hna tiah langhter asi. Texas khuakhan lairelnak cu atuhi State 18 zong nih an dirpi cang hna i, Donald Trump zong nih a dirpi ve cang hna. Thimnak kongah lih le hrokhrawl in thil atuahmi state pali hna cu Texas nih direct bak in Supreme Court ah taza a cuai hna.

Hi konghe pehtlaiin Attorney General Ken Paxton nih a timi cu state cozah ai awh in thimnak kongah buainak angeimi state pali Pennsylvania le Georgia cun Michigan le Wisconsin state hna nih hin US phunghram ning loin thimnak an tuah. Cu ruangah thimnak result vialte hna cu ningcang loin an umter dih tiah a ti. Tutan ah Texas state cu state dang 18 nih an dirpi cang hna.

Texas state khuakhan lairelnak hi a hramthok ahcun state pali lawng nih an rak dirpi hna. Asinain tlawmpal state pahra nih an dirkamh tthan hna, Cun state kip an vun i chap chin lengmang i, atu hi state 18 an si cang. Mah hnu zongah state dang nih an dirpi thluahmah ko lai tiah an zumh. Hi konghe pehtlaiin Donald Trump zong a team pawl he an dirpi cang hna tiah NTD News nih alanghter.

Donald Trump le a team pawl hna cu direct in Supreme court ah kalnak nawl an ngei lo. Aruang cu phunghram nih a onh hna lo caah asi. An nih caah cun theihcio bangin state court ah kalpi dih hnu lawngah Supreme court hi aphan kho dingmi an si. Asinain Texas timhtuahnak tucu phungning tein a si caah Supreme Court hi direct in an kalpi khawh.

Tutan ah Texas State nih thimnak kongah buainak a um tiah an timi State pali Supreme Court ah taza acuainak a ruang bik cu America phunghram kalh in thimnak an tuah ruangah asi tiah abiapi in an langhter. Curuang ah thilsining fiang tein chim le phuan dingah mah state pali hna cu Supreme Court ah ning cang chim dingin tuchun zanlei suimilam pathum ah akal ding an si.

Kan theihcio bangin US Supreme Court ah hin Donald Trump lei attangmi tampi an um. Democrat nawlngeihnak cu state court pawl court hmetete hna khi an si. Curuangah a cung kan chim bangin Trump team pawl nih state tazacuainak an sunghnak aruang bik cu Democrats nawlngeihnak asi caah asi.

Tutan ah Texas state taza cuainak thawngin US thimnak result kong cu fiang tein a lang cang lai. Ning cang loin Biden a tling tiah an rak langhter mi vialte zong Supreme court ahcun biadik biahman ai thleng lai i, Donald Trump caah cun phan ding a um ti lo ti khawh asi. Ning cang loin vote a tuahmi State pali hna cu Trump legal team hna nih case 50 renglo in taza cuai an timh ti asi.

Vote an thlak ning siseh, vote thlaknak seh Dominion seh hmang in Donald Trump vote vialte hna cu Joe Biden vote ah an thlennawn dihmi le vote thlaknak ah minthut hman lo le a thi cangmi vote le umnak aithial cangmi vote, chawlet pawl vote etc.. vialte hna cu phozar in a um cang lai i, Joe Biden cu hmaichia in a um te ko lai tiah an ruah.

Tutan ah Texas nih taza cuainak atuah mi hi tthenkhat caah cun thawngpang chia taktak asi i, tthenkhat caah cun thawngpang tthatuk a chuak lai tiah an zumh. Thawngpang chia lei ah an ti duhnak cu State Pali Joe biden a dirkamhmi pawl a sawh duh mi asi i, Thawngpang ttha timi ah hin Trump adirkamhmi pawl a sawh duh ti asi. Zanlei nazi pathum cu hngakcio ko usih.

Be the first to comment

Leave a Reply

Your email address will not be published.


*