LUNG AFAK KO. KHRIHFA NUTE MITTHLI HE BIACHAHNAK AN TUAHPIAK

Khrihfa nu hngakchia cungah biachahnak an tuahpiak mi cu lung afak ngaingai. Celh ding bak asi lo. Biachahnak an tuahpiak lio ahhin chungkhar zawnruahnak he a mitthli tiangin a tla. Khrihfa nute cu an fir i, biaceihtu hna nih a firtu sin ah nupi ca dingah um dingin biachahnak an tuah piak. Thil sining cu atanglei bantukin a si.

Pakistan ah kum 14 te lawng a sirihmi Khrihfa nu hngakchiate Maria Shahbaz timi cu aliamcia April thla ah khan rianttuan dingin akal. Cu ahcun Muhammad Naqash le a hawi le hna nih meithal he an hrocer hnu ah an fir. Culawng siloin hramhram in nupi caah atuahpin ah Islam biaknak ah hramhram ah an luhter rih.

Hi konghe pehtlaiin thilsining vialte hna cu Lahore biacaih zungah chuahpi a si. Biacaihtu hna nih cun kumtling lo hngakchianu te cu nupi caah a firtu hna sin ah um dingin biachahnak an tuahpiak. Cun a biaknak asimi zong Islam biaknak ah i thleng seh tiah an ti rih. Khrihfa nu hngakchia te cu nu zohkhanhnak tangah an umter rih.

Zohkhanh a si hnu ahcun a firtu hna chungkhar sin ah nupi dingah um dingin biachahnak an tuahpiak rih. Hi konghe pehtlaiin WION News nih alanghterning ahcun hi biachahnak court ah an tuah lio ahhin nu hngakchiate cu a mitthli atla tiah mithmutu hna nih an chim tiah an langhter chih ve.

A chungkhar cungah thilttha lo a chuak sual lai timi a phangtuk tiah an chim chih. Curuangah thilsining zong zeihmanh achim lo ti a si. Chungkhar lei nih nawlnak an tuahmi cu kumtling lo hngakchia asi i, va ngei dingah cun a hngakchiatuk rih tiah nawlnak an tuah mi zong biacaihzung nih a cohlan piak hna lo ti asi.

Hi bantuk thil sining hi Pakistan ahcun a tam ngaingai ti asi. Kumkhat chungah hibantuk case hi athong thong a um tawn. Curuangah Pakistan cu vawlei cung nuhrin covo a aupi tu hna zong nih sual an phawt ngaingai hna. Biaknak dang asimi nupawl kha an fir hnu i, Islam ah an luhter tawn hna tiah an chim.