LAINAWNG PHU NIH PHUNGKI ZONG THIL AN TUAHTER CANG HNA

Ralhrangbu Nih Phungki Pawl Gate Cong Dingin An Ti Hna Ralhrangbu nih Phungki pawl cu Mandalay khuachung check-gate congh dingin an ti hna tiah theih a si. Hi kong hi August ni 13 ah ralhrangbu hruaitu hna le Mandalay phungki phu pakhat Sangha Mahar Nayaka (သံဃာ့မဟာနာယကအဖြဲ႕) he an i tonnak ah hnatlaknak an ngeih mi a si. Ralhrangbu hna nih Mandalay peng 5 chung, ralhrangbu check-gate pawl ah phungki 30 congh dingin an ti hna nain phungki phu lei nih gate pakhat ah phungki 3 congh dingin kan lung a tling tiah an chim.

Hi kong he pehtlaihin ‘ka theih bal mi le a um bal mi thil zong a si lo.Runvennak lei a si zongah ralkap le palek an um, ngandamnak lei an ti zongah sii riantuan hna an um.Atu bantukin phungki hna nih gate an congh lai ti mi hi cu a si kho lo mi a si.Ralhrangbu nih hin kanmah phungki kar lawng si loin kanmah le mipi karlak ah i theihthiam lo nak le i rem lo nak dingah an tuah hramhram mi a si.

Gate congh le phungki cu zeihmanh pehtlaihnak a ngei lo.Meeting an tuah i biachahnak an tuah mi cu a si. Nain, kanmah nihcun kan duh lo mi le kan doh mi a si tiah Mandalay Masoyeing phungki inn in phungki pakhat nih a chim.Ralhrangbu nih zeitin phun in conghter ding le zeibantuk caah an hman hna lai ti mi belte cu fiangfai in theih khawh a si rih tiah theih a si. TCP

Thawngpang dang: Mindat Peng Meng 16 Kahdohnak ah SAC Ralhrang Mithi/Hliampu an Tam. Nihin (August 15) ah Mindat le Matupi karlak meng 16 ah SAC ralhrang le CDF-Mindat karlak kahdohnak fak ngaiin a chuak i ralhrang lei mithi le hliampu an tam, tiah CDF-Mindat chungtel pakhat nih a langhter.Nihin meng 16 kahdohnak ah SAC lei hliampu le mithi an tam. Kanmah CDF lei zong in hliam (fak lo) a pumi cheukhat an um ve,” tiah a chim.

Meng 16 zawn ah a ummi ralzaam inn pahnih SAC ralhrang nih an khanghpiak hna. August 13 kahdohnak ah CDF lei in minung 2 hliam (fak lo) an rak pu. Cun, nizan August 14 kahdohnak ah SAC ralhrang 7 an thi, tiah CDF-Mindat nih Mizzima ah an chim.SAC nih Mindat peng ah ralkap thazaang an chap chin i Mindat ralkap sakhaan ah miakpi tibantuk zong an hun chap caah aralaimi nicaan chung ah kahdohnak pehzul in a fak chinchin kho. Credit: The Chin Journal

Thawngpang dang: Nan khua kan khangh lai tiah ralhrang kawlralkap nih an hro hna pin ah inn an bauh i, tangka an fir. Cheuhra cheukhat tiangin an fir. Kalaymyo Sitha khua ah ralhrang kawlralkap hna cu umhmun an khuar hna. Khua chung chuahluhnak vialte an phih dih. Tuni ah inn an bauh i tangka an fir, cheuhra cheukhat zong an fir pin ah khuami hna cu nan khua kan khangh lai tiah an hrocer rih hna.

Nizan tihni Natchaung i kahdohnak an tuah hnu ah ralhrang kawlralkap hna cu Sitha khua ah an kal i khuami hna cu an hrocer hna. Khuami hna cu PDF pawl bomb an hmanhmi nan hmuh ko nain nan thlauh hna lo tiah an ti hna i, khuami hna cu lengchuak lo dingin an phih kham hna. Mizeihmanh lengah chuah an sianh hna lo. Chuah a duhmi nih an hmatpungtin apta dingin an ti hna.

Hi konghe pehtlaiin lamkam ah a ummi inn 40 hrawnghrang cu an zam hna. Inn ah a um lomi an inn hna cu ralhrang kawlralkap nih an bauh piak hna i, thawhlawm siseh cheuhra cheukhat tiangin an fir rih. Zeizat dah an lak timi fiang in theih a si lo. Khuachung ah a rak lutmi nu pahnih zong an tlaih hna nain an thlah colh hna. Nuva khuahkhat zong an tlaih hna i, an nu an thlah nain an pa cu an hren rih.

Cun lampawng ah a ummi chungkhar pakhat zong an auh i, an tlaih beh. Hi kongah khuami nih thlah dingin nawlnak an tuah ko hna nain an thlah duh lo. A hnupi zan suimilam pahra renglo ah an thlah tthan dih hna tiah khuami pakhat nih a chim. Ralhrang hna nih khuami pawl cu PDF he pehtlaiihnak nan ngeihmi voithum tiang kan in ngeihthiam hna.

Hi hnu pehtlaihnak nan ngeih tthan a si ahcun nan khua kan khangh dih cang lai tiah an hrocer hna. Asinain ralhrang kawlralkap hna nih mipi le PDF karlakah pehtlaihnak an ngei timi ah zeihmanh tehte an hmuhmi a um lo. An ruahnak in an puhmi hna asi tiah a chim chih rih. Tutan ah ralhrang kawlralkap hna nih an hrocermi khua Sitha khua hi inn 150 hrawng an si i, ralhrang an um ruangah siseh an hrocer hna ruangah thinphang in an um i, khuachung ah a um ngam lomi tampi an um tiah theih asi.

Be the first to comment

Leave a Reply

Your email address will not be published.


*