KHUARUAHHAR TAKTAK ASI, VOMKUA KHUA AH ACANG MI THIL CU

Tuzing thil ka theihmi Vomkua khua ah a cang mi thil cu khuaruah har ngai le Pathian thangthat ding a sinak fiang tein a lang. Pu Siang Kung a nupi hi Vomkua khua ah Sianginn cachim sayamah a rak tuanmi a si i Hakha ah an i thial cang. Pu Siang Kung cu Vom Kua a tlaihchan ngai i a rak tlawng. Lo riakmi sinah a va riak ve.

September ni 10,2020 zingka te ah meithel a put i sih a va bawh. Sakhi nih sih cu a vun din ah ka kap lai a tiah ah khin sakhi nih a tlik tak. Cu tlawmpal ah Pawpi a rak ra i sih a din lio ah meithal in a hei kah i Pawpi cu a bawk. Ka vun nolh than lai a vun ti ah Pawpi nih a lu a vun tun i a lu kha a hmetter chel a nganter chel in a hmuh. Cu lio ah kuanpi zunkhat in a vun kah than.

Cu vial bakah cun nan kan kah, kan in thah lai tiah minung sawmnga hrang nih an vun rat hnawh kha a hmuh. A meithal cu thingkung hram ah a tun i a mah cu a tihtuk ah tingkung cung ah a va kai. Mipi cu tingkung hram an vun phak cu a hmuh. A meithal hika ah a um ko amah cu khawika dah a zam manh dawi uh an ti zong kha a theih hna.

Chun tiang zong ah a rak lawi ti lo tikah loriak pawl cu an i sawm i an kawl. Meithal zunhnih a puah zong cu loriak in an rak theih ko. Meithal a puahnak lei ah an va kawl tik ah thinghram ah meithal a tun cu an hmuh. An auh len ko nain a hawi kho hna loh. A hraam thawng an theih thingkung cung an vun zoh cu a therh i a tla dengmang cang, thingkung cung ah an va lak zokzok.

A rak tihtuk cang caah a holh khawh tilomi a si. Cun an tlunpi. A riahnak ah cun mitampi nih an rak rat hnawh i na kan kah caah na kan nawl loah cun kan i thah lai an ti. Cu zan cu zan khuadei an tuan tam. A thaizing September 11,2020 zingka teah a hawipa pakhat a sawm i Vok-thau sumh (6) le Ar-khong sen an i phorh i Pawpi a kahnak lei ah va rem ding ah an kal.

Lam tanttim an phak ah khin nizan ah na kan rem ti loh, na tlai tuk cang. Rem kan duh ti loh an ti i nangmah na nunnak tu kan in lak lai an ti. A nawl lengmang hna. A hawipa a kalpi mi nih cun a hmu hna loh. A si nain a nawl lengmang hna tu cu a hmuh, vok cu a kal duh ti loh i a ke an vun khiah. An tih tuk cang i loriak kha phone in an hei chonh hna i loriak pawl cu an rak phan.

Loriak pawl nih inn lei ah kan tlunpi lai an ti tiakah an tlunpi kho loh. Minung tamnawn nih an dawh, an nam len zong ah pe khat zong an tthial kho loh. Minung tamtuk nih a kan kham i zeiti hmanh in pahkhawh ding an si loh, nan ka kalpi kho bal lailoh hih tiah Pawpi a kap tu pa nih cu a ti hna. A khup ai bil i ka nunnak cu ka zuah ko uh, ka vok le ka ar hi cohlang ko uh a ti cu mipi nih an hmuh ko.

Loriak pawl nih an kal pi len zongah minih dawhle kham bantuk in a hartuk cu an theih ve. Mi tamtuk nih a kan kham i nan ka kalpi kho lailoh hih a ti peng.Cu tikah loriak pawl nih inn lei kha phone an hei chonh hna i khuami cheukhat le Free Methodist pastor Kap Cin, UPC pastor Dawt Cung le Baptist pastor Zai Thluai Sung nih an hruaihna i khuami 15 hrawng an va kal.

An va phak tikah thil sining cu an va hmuh ve. Khuachia riantuan nak a si kha an theih tik ah Pastor Kap Cin nih bia a chim i thlacam nak he Jesuh Khrihmin in khuacha cu a tthawl, UPC pastor pa zong nih Pathian bia chimnak a ngeih. Chik khat te ah mitampi an tlik kha cu Pu Siang Kung nih cun a hmuh. Ei hi hna pawl hi Jesuh min in an ra i tei khawh ding an si loh an ti i an zam dih a ti i Halleluiah tiah a au. Mipi zong cu an au ve. Inn lei ah tluang tein an vun tlunpi i inn an phak in lomhnak biachimnak le Thlacam nak program an ngei.“Jesuh min an theih ah rulhreu mi an tli”. Credit:Pa Kep

Be the first to comment

Leave a Reply

Your email address will not be published.


*