KHABIB NIH APA THIH NAK KONG A CHIMMI CU LUNG ATTHA LO TUK

Khabib biachim cu lung attha lo taktak.Vawlei cung patthawng tiah theihmi Khabib a pa Abdulmanap cu Moscow khuapi sizung ah a nunnak aliam tiah thanhnak an tuah. Abdulmanap Nurmagomedov hi Khabib training ape tu zong a si. Amah coronavirus zawtnak a ngeih hnu ah heart attack zong a ngei rih ti a si. Hi ruangah sizung chiah a si i, sibawi te hna nih caan zeimawzat chung an zohkhanh nain a nunnak an chanh kho ti lo.

Khabib a pa hi aliamcia April in khan zawt hram aa thok i, pneumonia bantukin a hramthok ahcun a um. Cuticun a zawtnak a dam khawh hlei lo caah Moscow sizung ah aa zohter. Cuhnu ah coronavirus zawtnak angei timi an theih. Cuhnu tlawmpal ah Heart Attack angei tthan i, operation zong an tuah tiah an langhter chih tthan.

Operation an tuah hnu ah hin lungfimloin a um. Caan tlawmpal ah alung ahung fim nain biachim holhrel aa harh ngai ti a si. That lei panh loin a zual chin lengmang i, a nunnak tiang a liamnak hi a si tiah an chim. Hi konghe pehtlaiin Cechen leader Ramzan Kadyrov nih Khabib apa a thihnak kong hi aphuan hmasa i hitihin a chim.

Hawi le hna thawngpang chia nih aa ka tlak. Abdulmanal Nurmagomedov nih hi vawlei nunnak in mual aa kan liamtak tiah a chim. Kan sin ah um lo hmanhselaw a sunglawimi atthatuk mi aa kan chiahta. Thawngttha taktak a simi ro aa kan vuih tatiah an chim. Theihcia bangin Khabib le a pa hi aa daw taktak mi an si i, Khabib ahngakchiat lio tein hin apa nih Wrestling le Sambo a cawnter pin ah vomfa hna he a vuakter tawn hna ti asi.

Sizung a um chung zongah Khabib nih sizung ah apa cu nifatin a va zoh lengmang tiah an chim. Hi konghe pehtlaiin Khabib nih a timi cu nifatin ka pa ka va zoh peng i, Sii lei thil hriamnam an vuahtuk caah thatein kan i chawn in bialung kan phaitti kho bal lo. Asinain aa ka theih peng ko tihi ka fiang ko tiah a chim ve.

Suimilam cheu hrawng hi a pawngte ah ka um i, a kut hi ka tleih peng. Aka thei maw thei lo tiah ka hal tawn ah hin kan theih ko e timi langhternak dingah pakhatkhat in thil alanghter tawn tiah a chim chih.