BENJAMIN NETANYAHU A UMNAK INN HMAI AN AU HNAWH CANG

Israel Prime Minister Benjamin Netanyahu cu a rian in chuahseh tiah mipi nih an au hnawh cang. Israel PM cu a rian in chuah dingah minung tampi hna nih Jerusalem a umnak inn hmai ah an au hnawh. Mipi nih an timi cu zawtnak tlangrai kongah na rianttuan ning hi ahman lo tiah kan hnu zarh zongah duhlonak an rak langhter tthan.

Tutan ah duhlonak alanghtermi hna nih an timi cu kan ram caah a ttha lo taktak mi cu zawtnak tlangrai siloin ziknawh eihmuar hi a si. Cucaah Israel PM benjamin Netanyahu hi arian in chuak seh, i din seh tiah an langhter. Benjamin Netanyahu cu ziknawh eihmuarnak atuah tiah case pathum an rak tuahpiak cang.

Aliamcia May thla ah khan akonglam rak ceih asi i, tuthla thaizing kip July 19 ah hin Jerusalem District biacaihzung ah pehzulh a si tthan lai. Benjamin Netanyahu hi case a ngei mi a si ko. Asinain Israel ram phung ahcun Benjamin hi apalh bak tiah biachahnak an tuah hlan chungah cun rian dinh a ngah lo.

Curuang ah Prime Minister Benjamin Netanyahu konglam caihkhan hi caan saunawn arauh lai caah a rian cun a chuak colh dingmi asi lo i, pehzulh in attuan rih ko lai tiah an langhter. Israel ah hin tulio zawtnak hi akarh chin lengmang i, rampi sipuazi zong a hnursuan ngai cang ti asi.

Cun rian ngei lo zong hi 20% renglo a si cang tiah an chim. Israel ramchung ah coronavirus zawtnak angeimi hi minung thong 41 le zahnih an phan cang i, zawtnak in a nunnak aliammi hi minung 368 an si cang tiah an langhter chih.

Relchih:US President Donald Trump nih tuzarh nithum ni ah Order a chuahmi. Cu order a chuah mi cu Hong Kong he chaw leh chawhrawlnak ttinak an tuahmi vialte a ngol dih. Hi thil atuahnak a ruang cu Tuluk cungah alungtlin caah asi tiah an chim.Culawng siloin US President Donald Trump nih Tuluk official chawleh thalnak siseh bank lei ah US nih abawmhmi hna zong phihkharnak tuah ding in timhlamhnak zong an tuah.

US nih Hong Kong he chawleh thalnak a ngolnak a ruang cu atanglei bangin an langhter.Tuluk nih Hong Kong caah national security law ahman ruangah a si. Hi phunglam tuahmi hi Hong Kong mipi zalonnak hrawhhralnak asi tiah US President Donald Trump nih a chim.

Cun US nih Hong Kong caah thilttha or bawmhchanhnak a tuahmi vialte zong phunglam tuahmi nih a hrawh tiah tiah a chim chih.Tuluk nih Hong Kong caah phunglam a sermi National Security Law ruangah hin Hong Kong mipi zeimzaw zat hna nih an ram hi an chuah tak ngaingai te lai tiah US President Donald Trump nih a zumhning zong a chim chih.