HODAH PRESIDENT ASI LAI TIMI A FIANG CANG HIH, RAK ZOH CIO UH

US thimnak kongah theih aharh taktak mi chungin tlawmpal zapi kan i fiannak dingah tlawmpal kan vun langhter. US thimnak ah hin party a hme deuh mi an um pah ngai ko nain party pahnih ah hin pakhat khat lengmang a tling tawnmi an si. Aliamcia kum 1792 kum thok in US President thimnak cu Kum 4 dan in tuah a si.

Tukum thimnak ah hin Donald Trump le Joe Biden cu presidential candidate caah fehter an si bangin atuhi vote an rel cuahmah liopi asi. Hodah aitei lai timi cu a hnu ah afiang te lai. US president thimnak konghe pehtlaiin thilsining an langhtermi tampi chungah US thimning cang cu atlangpi in a tanglei bantukin hin a si.

Party ngan pahnih asimi hna nih an party chungin President candidate ca an thim tawn i, Candidate thim ding ah a hrampi cu Primary le Caucus election ti a si. State tthenkhat ah Primary Election an tuah lio ah tthenkhat caucus an tuah ve. Primary ah hin Party chungtel hna nih Secret ballot hmangin delegate an thim i state tthenkhat ahcun Party ah chungtel sinak angei lomi nih vote thlak khawh asi lo.

Cun Caucus timi tu ahcun Party member hna topumhnak an tuah i vote thlak siloin delegate an thim ve tawn. Primary Election cu state le khuachung cozah hna nih an tawlrel tawnmi asi i, Caucus tucu Party nih an tawlrel tawnmi asi ve. Atlangpi in January thla in June thla karlak ah hin thimnak an tuah tawn. Tthenkhat state ahcun Primary le Caucus thimnak hi hmunkhat zongah an tuah.

Pahnihnak ah National Convention tiah an ti.Hihi a fawinak cun Party Khawmpi or Civui ti khawh asi. Atlangpi in hihi July thla ah an tuah tawnmi asi i, Tukum tu ahcun zawtnak ruangah sunglawi in an tuah kho lo. Hihi August thla lawng ah an tuah pin ah minung zong tampi an chuak kho lo. Tukum Republican Party in delegate thimmi hna nih minung 2550 an si.

Democrat in delegate thimmi hi minung 3979 an si ve ti asi. Hi an thimmi delegate hna nih hin thimnak caan an party president siseh vice president nominee an thim tawn hna. Party National Convention ah hin official in party presidential candidate hi thanhnak an tuah tawn. Tutan zongah August ni 19 ah khan Democrats nih Joe Biden an thim i, August ni 29 ah Republican zong nih Trump an thim ve, atuhi an dirhmun ai fiang rih lo. Hodah president asi lai timi cu..

Pathumnak ah Campaign tuahning hi asi. Hihi atlangpi cun July thla in October thla tiang zuamnak alutmi hna cu an cawlcangh lio caan asi. State kip ah rally an tuah pin ah TV hmangin voihnih asiloah voithum tel hi zuamcawhtu hna cu debate an tuah tawn. Palinak ah General Election ti asi. President thimnak hi November thla hramthok ahmasabik cawn nikhatni a vunchang cawn ni hnihni ahmasabik ah tuah tawn asi. Tutan cu theih bangin Nithum ah an tuah.

Cun kum 18 cunglei paoh nih vote an thlak lai i, vote angeimi hna nih thimtu elector an thim hna lai. Panganak ah Electoral College ti asi. General election ah mipi hna nih vote an thlak mi hna hi President a thim dingmi Electoral College member an thim tawn hna. State kip hna cu a minung tlawmtam zoh in member an ngeihmi zat ai dan caah elector an ngeih mi hi House of Representative le Senate ah anmah le state member ngeihzat he aa khat peng ti asi.

Elector hna hi minung 435 an si i, hi hna pawl hi US i, state 50 chungin an thimmi hna asi. US Congress ah hin upper house, senate an um hna i, hi hna pawl hi US state 50 chungin minung pahnih cio an si hna. Anmah pin ah hin District of Colombia i, elector pathum he electoral college member hi an dih lak in minung 538 an si. Hi hna pawl nih President le Vice president cu an thim tawn, Teinak hmuh dingah cun electoral vote 270 hmuh ahau ti asi.

Elector thim chuahnak ah mipi vote hi Popular vote tiah an ti i, Popular vote tam deuh ahmumi hi an tling tinak asi lo. Aliamcia kum 2016 president thimnak ah khan Democrats candidate Hillary Clinto nih khan Donald Trump cu popular vote in a rak tei ko. Asinain Trump nih electoral college vote in arak tei caah President a rak sinak kha asi.

Abiapi ngaimi pakhat cu Winner Take All System an timi hi asi. Mah thil hi Maine le Nebraka state ti dahlo cu state dangah hman dih asi. Hi system a sullam cu elector atam deuhnak Party kha party dang in atling mi elector hna zong nih dirkamh hrimhrim ahaumi asi. Tahchunnak ah California stae in elector 50 an um hnga, mipi nih an thim hna lai i elector 50 an thimmi chungah a zatceo nak tam 26 kha Republican an si ahcun a dang vialte eletor 24 nih khan Republican an dirpi cang lai.

Result, a cung langhter mi electoral college nih hin tukum December ni 14 ah US President ding le Vice president ding cu an thim lai i, vote an thlak hna lai. Cu hnu ah thimnak result an thanh lai. Cun thimtlinmi president cu January ni 20 ah sinak pek an si lai. President cohlannak hi Washington DC i, US Capitol innpi ah tuah asi tawn. Hihi January ni 20 tuah tawn asi. Asinain January ni 20 hi sunday asi ahcun January ni 21 ah tuah asi tawn.

US President ttuan khawhnak dingah a hau taktak mi cu US ah a chuak mi hrimhrim asi lai. Cun US president a ttuan dingmi hna cu kum 35 hrimhrim a tling cangmi asi lai. Cun kum 14 tal US ah a um hrimhrim dingmi asi. US ah a chuak lomi US citizen asimi hna cu president caah thim khawh an si lo tiah an chim.

Tutan ah hin tah atutiang dirhmun ahcun Biden nih Donald Trump cu avun thlau ngaingai ti asi. Asinain hi konghi fiangin theih asi lo. Trump nih Biden cu atei ngaingai tiah an ti. Sihmanhsehlaw afiang rih lo. Result fiang taktak cu arauh hlan ah kan theih cang lai. Hi konghe pehtlaiin US president thim ning cang cu acunglei langhtermi ah hin a vun fiang ngaingai lai dah. Hodah nan zumh cio?

Be the first to comment

Leave a Reply

Your email address will not be published.


*