DONALD TRUMP NIH BIDEN AKIANH DING LE KIANH LO DING KONG A PHUAN

Donald Trump nih fiangko in a chim cang, Achimmi cu Electoral College vote afian hnu ah Biden nih teinak ahmuh an ti ahcun White House hi ka chuahtaak lai tiah a chim. Donald Trump cu biahalnak an tuah. EC Vote an fianh tikah White House hi na chuahtak lai maw tiah an hal. Lehnak atuahmi si chuak e, ka chuaktak hrimhrim ko lai tiah fiang pup in lehnak atuah.

Donald Trump nih apeh rih mi cu Joe Biden an thim asi ahcun an i palh taktak ko lai, teinak ahmu lomi asi timi ka cohlang kho lo tiah a chim chih. Teinak ahmu lomi ah i cohlan hi cu ahar taktak mi asi. Aruang cu ningcang lotuk in vote a um caah asi tiah a chim chih. Asinain tehte tu cu alanghter lo. Cun biahalnak an tuah tthan mi ah Biden riankhinhnak ah nai tel ve lai maw an timi tu ahcun lehnak atuah duh hna lo.

Atutiang thilsining an langhterning ahcun Electoral College vote ah Trump nih 232 a hmuh i, Biden nih 306 a hmu cang ti asi. US President sinak dingah vote 270 lawng ahaumi asi. Asinain vote result konghe pehtlaiin ningcang loin thil tampi a um an ti caah Donald Trump lei nih atuhi biacaihzung ah rian an ttuan cuahmah lio asi.

Hi konghe pehtlaiin Pennsylvania ah ningcang loin vote thlak a si tiah Trump legal team hna nih tazacuainak an tuahmi cu Federal Appeals Court, the 3rd US Circuit Court of Appeals nih cu reject atuah piak hna. Pennsylvania ah hin Joe Biden nih Trump cu vote thong 80 in a tei. Hi hmun ah hin Electoral vote 20 aummi i, cucu Joe Biden nih ahmuh dih.Hi konghe pehtlaiin US District biacaihtu Matthew Brann nih atimi cu ca an chiahmi hi tehte pakhat hmanh a um lo tiah a chim.

Tutan ah biachahnak atuahmi pathum hna hi Donald Trump nih akhanhmi lawngte an si hna. Trump nih a thimmi Judge Stephanos Bibas nih atimi cu thimnak thianghlim le a dikmi hi democracy ram caah abiapi taktak mi asi. Thimnak kongah thil dik lo aum tiah sualpuhnak hi thil asi serious ngaimi asi ko sihmanhsehlaw thimnak adik lo ti lawng hi biatling asi lo, thimnak diklo an timi hi biachokvai sawhsawh siloin tehteh a um hrimhrim ahau.

Ca an chiahmi ah hin tehteh pakhat hmanh kan hmu bak lo tiah cohlan lonak an tuahmi ah alanghter chih. Hi reject nak an tuah hnu ah Trump lei nih cun thildiklo tampi an thuhnawh tthan ko hita tiah an ti ve. Thil dik lo a ummi tehte siseh biadik hi PA State legislature sin ah theihternak kan tuahmi hi kan i lawm ngaingai. Supreme Court lei ah kan kal colh lai tiah an chim ve. Lungdongh an i tim hrimhrim lo.

Michigan siseh Wisonsin le Nevada cun Arizona le Georgia hna ah ca kan chiah rih lai tiah timhnak kan ngei tiah Giuliani nih a chim ve.Asinain SUPREME Court lo ahcun an hnawlpiak lengmang ko hna. Tutan thil asining cun Joe Biden nih electoral vote 306 ahmuh cang i, Donald Trump nih cun 232 lawng ahmuh tinak asi. Vote result kong buainak vialte hna cu December ni 8 hlan ah phisin dih in ti asi. Cun December ni 14 ah Electoral College tonnak an ngei cang lai i, US President cu ahodah thimtlin asi timi cu officials in thanhnak an tuah lai.

Be the first to comment

Leave a Reply

Your email address will not be published.


*