BAWMHNAK KONGAH AN RUAHNAK AI DANG CIO CANG HNA

Avoi 2nak Cozah Bawmhnak Stimulus Check.White House, Republican hruaitu hna le Democrats party hruaitu hna cu zetindah coronavirus ruangah harnak a tongmi hna bawmhnak pek kan pehzulh lai timi an ceih lio te a si. Rian ngei lomi, zarh khat ah US$ 600 lengmang pek chapmi hna cu kan peh zulh lai maw? kan dinhter lai” tiah an buai saling a si. Republican party chungah an ruahnak a khat thlu kho rih lo.

Rian ngei lomi,Unemployment benefit a hmumi hna cu zarh khat ah $ 100 lawng bawmh a duhmi, $ 200 lawng bawmh a duh cangmi le $ 400 lawng bawmhnak pe a duh cangmi tiin an in then. Cozah nih stimulus check bawmhnak zongah tuchun tiangah an ruahnak an fun kho rih lo. Pek an duh cio nain zeizet timi an khiak kho rih lo. Thaizing zongah ceihmainak an ngei rih lai. Tuzarh chungah hin biachahnak khawhmi an ngei lai tiah zumh a si.

Tuluk Nih Taiwan A Ngiar.Coronavirus ruangah Tuluk le US cozah iremlonak a sang I ramkhat le ramkhat an I renghnak a san tuk caah Tuluk cozah nih US hawikom tha bik a simi, Taiwan ram cu nai hrawng ah a va ngiar lengmang ti a si. Taiwan tikulh kam ah Tuluk raltuknak vanlawng le ralkap sangphawlawng pawl atu le tu an thlah hnawh hna I, hnahnawhnak a phunphun an pek hna.

Taiwan cu Tuluk nih atu tiang in an ram ah an I ruah peng. Asinain Taiwan nih cun Tuluk kan si lo an ti peng ve. US cozah nih Taiwan ah raltuk nak vanlawng a thatha a zuarh lengmang caah Tuluk pawl cu an aipuang lengmang. US le Tuluk an I tuk sual ahcun Tuluk nih Taiwan hi hawi hlan ah a tuk hmasa bik lai tiah an zumh. US nih Tuluk nih Taiwan a kah ahcun kan zoh sawh lai lo an ti ve.

Democratic Party aiawh in President a cuh dingmi Joe Biden nih US cozah sianginn ah Muslim biaknak kong kan cawnter hna ding a si ko tiah online in campaign a tuahnak Muslim Voters Summit ah a chim. Joe Biden cu Obama thuak aa rinhmi a si caah Obama policy ning in rian a tuan lai zumh a si.

Khrihfa zumhnak a hrawktu ding US president I an thim sual ahcun US a rawh lawng si loin khrihfa caah himnak a um lai lo.Catialtu Salai Lairamthang