I RALRING CIO HNA USIH, TTIHNUNG NGAI ASI CANG, MUIHNAK CHUMPI A CHAH

Muihnak chumpi a hung chuak ruangmang ko cang. WHO nih thanhnak an tuahmi cu Vawleipi ah zawtnak akarh bik lio caan aphan cang tiah an thanh. Nikhat chungah zawtnak angei mi hi minung 307,930 asi tiah an langhter. Hihi zawtnak a chuah thok in atam bik lio caan asi. Hi konghe pehtlaiin UN Agency nih an ti tthanmi cu nunnak aliammi zong 5500 an si tiah an chim chih.

Zawtnak a tambiknak ram cu US le India cun Brazil hna hi an si. Zawtnak angeimi hi vawlei cungah 28 million an phan cang. Hi chungah a zatceo hi US ah a ummi lawngte an si tiah an chim. Nikhat ah zawtnak tambik asi lio caan hi aliamcia September ni 6 kha asi i, hi lio caan ah minung 306,857 an rak si. Asinain atu ahcun record thar a vun chuak cang tiah WHO nih an langhter.

Nizan Sunday ah khan India ah zawtnak angei tharmi hi minung 94372 an si i, US ah minung 45523 an si. Cun Brazil ah 43718 an um tiah an chim. A nunnak aliammi chungah thongkhat hrawnghrang veve hi India le US ah a si i, Brazil ahcun 874 asi. Hihi nikhat chungah a nunnak aliammi an si. An tuak ning ahcun nikhat ah hin india ram ah minung 64000 hrawng zawtnak an ngei.

Zawtnak hi Europe ram chungah atu hi akarh cuahmah caah an thinphang ngaingai cang ti asi. Cutik ah nawlngeitu hna nih phihkharnak zong athar in an tuah tthan pin ah hmaihuh nan i tuah dih lai tiah an ti tthan hna i, Social Distancing zong nan zulh hrimhrim lai tiah an chim cah rih hna. Zawtnak hi Peru le Israel cun South Korea siseh Australia hna zongah a karh ngaingai cang.

Nizan zongah Australia victoria state ah phungzul lomi minung 70 hna cu an tleih hna. Victoria hi Australia ahcun zawtnak akarh ngaingai nak hmun a si. Zawtnak angeimi chungah 70% hi Victoria ah a si i, cun a nunnak aliammi chungah 90% zong hi a si thiamtthiam tiah asi. Hi konghe pehtlaiin nizan ah New Zealand PM thanhnak atuah ve. Auckland ti dah lo cu phihkharnak hi thlahdorh asi lai tiah a thanh ve.

Zawtnak thar angeimi an karh ngai caah Israel zong nih rampi huap in lockdown an tuah tthan. Israel ahhin zawtnak angeimi hi minung 153000 renglo an si cang i a nunnak aliammi hi 1108 an si cang tiah langhter chih asi. Zawtnak hi nikhat hnu nikhat in akarh chin lengmang caah pumpak cio zong nih biatak tein i ralring cio hna usih.

Be the first to comment

Leave a Reply

Your email address will not be published.


*