AiBur Mino HngakChia Minung Pakua Nih Aa Kha An VelhNak Kongah Fianter Nak Le Nawlpat Nak

Aibur Mino Ngakchia Minung (9) nih Aa Kha An Velhnak Kongah Fianternak le Nawlpatnak (1/2020) Pakhat nak Aibur Youth Fellowship (Aibur, Hakha, Thantlang) tiin kum saupi aa rak hruai cangmi cu 2015 kum Aibur khua le mino a lamkip kan thancho khawhnak caah tiin Aibur Youth Organization (AYO) rak dirh a si.

2015 kum in kumtin Aibur Youth Camp, khua thanchonak Seminar le mino cawlcanghnak a ngei pengmi le Khua mino nuncaan ziaza dawh in an kal khawhnak hnga aa zuam pengmi bu kan si.Pahnih Nak, September 4, 2020 chun 1:00pm tluk Hnaring-Fangthen lei zudin ah aa thawhmi Aibur Ngakchia Mino (9) hna nih Hakha um Leipi khuami Motor mawng Aa Kha cu Sentung khua pawng ah an velh ti thawng kan theih caah Aibur khuami le mino dihlak kan ngaih a chia, Kan lung aa nuam lo. Aa Kha a velh tu hna zong an velh ni suimilam tlawmpal ah Aibur an si ti theih colh an si caah Aibur Mino Bu nih AYF (Aibur) Zungah an nu le pa dihlak auh in tlaih le hren colh an si.

Cu Zanlei lila ah Hnaring Palek Sakhan lei anmah minung (9), an nu le pa le khua nupa minung (18) cu Aibur fanau an palhmi, Aibur kan palh tiah Aa Kha nupa le chungkhar nawlpat dingin Hnaring khuapi phak dih a si. Hringtu a nu le pa Hakha an um caah atulio Aibur nupa, mino hruaitu dihlak Hakha an tlawn lio a si.Pathum Nak  Aibur ngakchia mino minung (9) nih Aa Kha an velh lio ah Leitak kan si tiah an chimmi cungah Leitak khuami nih nan kan ngaihthiamnak lai kan in nawl hna. Anmah ngakchia hrawkhrol duhnak lungput in ningcang lo in Leitak khua min an hmanmi a si i aho Leitak zong nih forhmi le fialmi an si lo ti kha kan nau le Aibur ngakchia mino (9) nih fiang tein an chim cang.

Pali Nak,Aibur ngakchia mino(9) nih Leitak min an hmanmi kong he pehtlai in “A veltu hna nih Leitak kan si, an i ti ca ah, Leitak khuami fial mi an si lai tiah Lautu Mino nih kan ruah. Leitak cung ah Lautu mino nih sualnak kan ngeih sual ahcun Lautu mino nih ngaihthiam halnak kan tuah lai. Midang fial in cun rak kan vel ti hna hlah seh! Sualnak kan ngeih ahcun i sikvelhnak si loin remnak tuah tu kan duh.” tiah Lautu Youth Organization (LYO) nih ngaihchiatnak an langhtermi cungah kanmah Aibur ngakchia mino minung (9) nih lih le hrokhrol in an chimmi a si caah Leitak le LYO kaphnih karlak theihthiamlonak nan ngeihnak hnga lo, Aibur mino palhnak a si hrimhrim ti kha ngaithiam hal bu in fianternak tuah kan duh.

Panga Nak , AYO cu Aibur Khuapi dihlak theihpimi in dirhmi le phung le phai he aa hruaimi bu kan si bantuk in khuami le a midang hawi cungah ningcang lo in fahnak a petu Aibur Ngakchia mino zong fakpi in dantatnak kan tuah hna lai. Aibur ngakchia mino (9) sualpalhnak an tuahmi cungah Aa Kha te chungkhar lei nih nan kan ngaihthiamnak lai zong kan in nawl hna.

Paruk Nak, Hi thil dawhcah lo kan tonmi a theimi Laimi phun unau dihlak zong nih hmailei Aibur lawng silo in peng le tlang, Lai mino nunchimtu, nunthlengtu dirhmun tu ah Pathian nih a canter i a bik in Aibur mino zong hmailei nuncan ziaza dawh he kar a hlang khomi kan sinak ding ca hrim ah thlacam nan kan bawm cio nak lai AYO nih toidornak he sawm buin nawlpat fianternak kan tuah.

Executive Committee
Aibur Youth Organization
September 7, 2020

Pehtlaihnak – 09456111581, 09265939887, 09259153892

Note, hi ca ti a nei tu permission lo in ka post ko a ruang cu mipi mih biafiang thei cio hna seh ti ruang le pakhat le pakhat larlak ah ngaihthiam nak a um ti theih cio hna seh

Crd, Aibur Youth Organization.

Be the first to comment

Leave a Reply

Your email address will not be published.


*