A POITUK, KAWLRAM DIRHMUN THINPHANG TAKTAK ASI CANG

Ralkap nih Myanmar ram uknak kan la lai lo tiah chim chung khawh a si rih lo, tiah Myanmar ralkap chimnak nawlngei Gen. Min Zaw Tun nih nihin Press Conference ah a chim. Press Conference ah a kaimi reporter pakhat nih, “Ralkap nih uknak nan lak lai lak lai lo hin chim khawh a si maw?” tiah biahalnak a tuah. Cu kong he pehtlai cun Gen. Min Zaw Tun nih, “Chim khawh a si lo. Ka chim ciami chung zong ah khan aa tel ko.

Ralkap nih cun Phunghrampi le atulio upadi ning in kan kal ko lai,” tiah a chim. 2008 Phunghrampi ning ah Myanmar ram nih buainak ngan a ton i Emergency in chimphoih a herhmi a si ahcun rampi President nih Nation Security Council (NCS) a auh lai i, rampi nawlngeihnak hi ralkap bawizik kut cung ah ap khawh a si, tiah aa tel. Sihmanhselaw, rampi President nawlpeknak loin ralkap nih uknak hi lak khawh a si lo tiah Phunghrampi nih a kham.

Phunghrampi he i kalh in ralkap nih nawlngeihnak an lak a si ahcun 2008 phunghrampi kan kilven lai tiah a titu ralkap nih cu phunghrampi cu anmah lila nih an buar a si lai i, 1962 le 1988 lio i ralkap nih rampi nawlngeihnak an lakmi bantuk kha a si ko lai,” tiah Myanmar ramkhel a cuantu upa hna nih an rauhnak an langhter. November 2020 thimnak ah vote ningcang loin thlaknak a um tiah USDP nih an aupi hnu in ralkap nih vote thlakmi check tthannak an ngei i, atu tiang peng/myone 300 leng an zohfelmi ah ningcang loin vote thlakmi ting 6 leng kan hmuh tiah an ti.

November 2020 thimnak result kong he pehtlai in USDP le ralkap a dirpitu pawl nih nai hrawng lamzawhnak an tuah i, ralkap nih uknak lak ding asiloah thimnak tuah tthan ding in an aupi.Asinain, NLD a dirpitu hna nih nizan thawk in Yangon le Mandalay khuapi pawl ah NLD cozah thar le Hluttaw thar fek tein kan dirpi tiah ralchanh in lamzawhnak an tuah ve. Credit:TCJ

Relchih:Joe Biden zong nih Israel dirkamhnak lam ahcun Donald Trump hnu zulh aa tim. US President Joe Biden hruainak tangah National Security Adviser Jake Sullivan nih Israel konghe pehtlaiin timhtuahnak an ngeihmi kong alanghter. National Security Council cu biaruahnak an ngei hna. NSC chim thanhnak atuahtu Emily Horne nih thil sining hna cu atanglei bantukin a langhter. National Security Adviser Jake Sullivan le Israel National Security adviser Meir Ben-Shabbat hna cu chawnh biaknak an ngei i, Israel kilven zohkhanhnak dingah Biden timhtuahnak cu a chim ruah tthan tiah a chim.

US le Israel hmunkhat rianttuan ttinak kongkau zong an i ruah tiah a langhter chih. Cu chungah Israel thawngpang atthat pengnak ding kong zong an i ruah chih.Hi konghe pehtlaiin US Secretary of State caah timtuahmi Antony Blinken zong nih ati ve mi cu Israel kilvennak kongah US timhtuahnak cu hrawh dingmi thil asi lo tiah ati pin ah Joe Biden nawlngeihnak tangah thawngpangttha a um khawh pengnak dingah rianttuan asi ko lai tiah apeh rih. Theihcia bangin aliamcia US President Donald Trump nih Israel hi adirkamh taktak mi asi.

Donald Trump le Israel Prime Minister Benjamin Netanyahu hna cu ai daw ngaingai mi an si i, Trump nih alamkip in adirpi hna. Culawng siloin Israel khuapi caah Jerusalem zong thanhnak arak tuah. Cun ahnu bik President rian in aidinh lai caan zongah Israel buainak tampi phisin dingin rian arak ttuan tthan. Israel adirkamhtuk ruangah Trump cu Palestine zong nih an rak huat.Tutan ah Joe Biden nih Israel cungah timhtuahnak angeihmi zong attha ngaingai ti asi. Donald Trump nih Israel cungah dawtnak le zawnruahnak angeih mi vialte hna cu pakhat hmanh tlawttlau lo tein tha chin lengmang in dirkamh le sersiam an i tim ve.

Be the first to comment

Leave a Reply

Your email address will not be published.


*