A LUNGKHONG TUK MI PRESIDENT TRUMP NIH FAK TUK IN JOE BIDEN A THANGCHIAT

Republican Party Aiawh Dingin Trump Namhnehnak an Tuah Lio ah Biden Fak Taktak in a Thangchiat. A lung khohcho takmi President Trump cu Thursday ah khan Republican party aiawh dingin namhneh a si. “November thimnak Democratic party lei nih an hmuh sual ah cun, kan ram ah miphun thleidannak thlichia a hrang lai i, coronavirus nih a kan thah dih te lai, tiin Biden cem pah in a chim.

White House hmunhma hi politics kong i tonnak hmunhma ah hman phung a si lo, tiin an soisel len ko nain, White House South Lawn ah cun Trump nih a mipi pawl cu a tom thup hna i, “Cozah rian ah Biden hi caansaupi chung santlaihnak ngei kho lo dirhmun in a um cang. Anih hi Democratic extremist a si i, America hi phung le hram ngei lo, tih a nungmi ram siter a timtu a si, tiin Trump nih a chim.

Tutan thimnak nih hin phungning tein khua a sami American mipi maw kan kelven lai, asiloah hruhru hranghrang in buaibainak chuahpi lawnglawng ai tim pengmi le kan rammi pawl thah le nawn dih a timtu pawl dah zalonnak kan pek hna lai, timi bia a khiaktu a si, tiin a zan linak RNC ah Trump nih a chim. Biden chan ah cun America ah hin ahohmanh an him lai lo.

Virus nih American mipi 180,000 lenglo a thah hna ko bu zongah cun, Trump nih cun American thanthar (Flag) ai ken i “Hihnu kum 4 in. USA!” tiin a aumi minung thongkhat hrawng sinah biachimnak cu hawptlo taktak in a ngei.2016 lio i party aiawhtu si dingin cohlannak an tuahpiak lio i a biakam phawh bantuk tein tutan zongah bia a chim ko rih.

2016 lio zong kha Texas le Louisiana i police officers 8 thah an ton lio le minak pawl kah an ton ruang i duhlonak an langhter salailing a si.Tutan ka biachimmi a zohtu American mipi nih hin kan lampi le kan community i buaibainak vialte hi an mithlam in an suaisam cio lai. Hi buaibainak vialte hna hi donghter dingin bia kan kamh hna, tiin Trump nih a chim.

A liamcia kum 4 lio i a hlawh a tling ngaimi Trump nih cun a tutan zongah White House hi uk i, buaibainak pawl hi keimah lawnglawng nih ka tawlrel khawh ding a si, ti phun in karhlannak a ngei. Sunday lio i police nih Kenosha, Wisconsin ah minakpa Jacob Blake an kahmi thawngpang cu Thursday ah khan Republican lei nih phelhsolh khawhnak lam an kawl. Biden nih cun police pawl hi defund (an rian ngolter) ai tim, tiin Rep lei nih an chim.

Biden belte nih cun cu bantuk in Defund tuah cu kai tim lo, ti a si ve. Joe Biden chan i America ah hin ahohmanh nan him lai lo tiin Trump nih a hei ka ti ve maw. Nan keh orh hun i mer u law nanmah le nanmah vun i hal ko u ca. Trump chan i America ah hin teh ka him tiin nai ruat el maw aih?, tiin a zan lila ah Biden nih Twitter in lehnak a tuah colh.

Trump nih Biden hi sual irlit democrats pawl i an naamtong a si, tiin a chim. Cun mipem kong, meithal kong, police kong, nauthlaknak kong le meitha chuahnak kong zongah Democrats pawl an policy hi Trump nih biataktein a chimchiat.Biden hi chantha nan pek sual ah cun, American i a lianhngannak a hrawktu a si ko lai, tiin Trump nih ralrin a pek hna.

Biden vial cu minung tel lo in inn nganbi chungah live broadcast in biachimnak a tuah lio ah Trump nih cun minung tamtuk he biachimnak a tuah. Trump biachimnak a dih le cangka Washington Monument velcheh ah pengphang cu vantawng in an puah hna i an convension cu hlunghlai ngaiin a donghnak an vun tuah. Ngandamnak lei tuanvo ngeitu nih ralrinpeknak an tuah len ko bu zongah cun White House tual i mipi ai bumi pawl cu lehmah (inche) tlawmtete lawng hlat khin an thu hna.

South Lawn i tonnak kan tuah lai, ti kan theih caah a hlankan in thatein timhlamhnak kan ngei ko, tiin Trump campaign a tuahtu pawl nih an i chim kanh diam.Cu ti i tonnak an ngeih lo ah cun White House pawngte tiangin cun Trump a duhlotu pawl nih hehchet tiin tawtawrawt in an rak au hnawh ve hna. Live video in Trump an zeihmi tiangah mipi tawtawrawt authawng cu ai thei.

Sualphawtnak a Chak an merh (SHIFTING BLAME). Avoihnihnak ai thim lai temmam ah pulrai thalo nih rampi a tlunh caah, mipi tampi rianlo in a chiah hna, minung a ting in a thah hna caah, New York ah inn puaisa mintha a rak si bal mi Trump nih cun campaign a tuah ning le cang a khupthal lehthlen ai tim peng cang. A chachap lo ah, campaign a tuah lio ah cun minak pakhat cu police nih meithal in an kah than hoi.

Zanthum chung cu duhlonak a langhtertu nih inn le lo an duah i thilri tampi an hrawh. Chungkhar lei belte nih dai dingin an nawl hna.Thursday i biachimnak a ngeih lio ah cun, pulrai kongah Trump nih China cu sual a phawt than i, avoihnihnak thim ka si rih ah cun, ramdang i American nih rian kan ser mi pawl hi kan rengh taktak cang hna lai, tiin bia a beuh hna.

Tuanbia chung i a nganbikmi economy ser chuah khawh kan i zuam lai. Biden belte nih cun virus a karhsomi khamnak dingah cun kan ram hmanh hi a ningpi in phih (shut down) tuah a duh te lai, tiin Trump nih a chim. Asinain, state tampi i rian an onmi ruangah ngandamnak lei tuanvo a latu pawl an thin a hung ngai.

Virus kong i Biden ai timhlamhnak hi a phi a si lo, a sunghkhaan bia a si, tiin Trump nih a chim. Party chung in Trump a tanhtu pawl cu an tha a tho ngai ko nain, a cheukhat cu lung awtawm in an um. Thursday le Friday i ca an chuah ningah, Republican minung 160 hrawng cu Biden lei ah an lung a um cang. Hi hna hi Bush, asiloah Mitt Romney le John McCain minung pawl an si hna. Hi kong hi NY Times le Politico nih thawng an thanhmi a si.

Thursday ah khan Democrats lei in Repulican lei ah ai mermi pawl biachimnak an ngei ve hna. US Representative Jeff Van Drew zong ai tel. Mail in vote pek i kan election hi Democrats pawl nih fir an timh. Hi hna hi American lainawng an si, tiin Monday ah Trump nih a chim.An party hnih ningin conventions an lim veve cang. Pulrai ruangah Biden nih cun mipi hrial in biachimnak a tuah. Pulrai lak zongah cun Trump cu heh law tiah state kip ah campaign tuah ah ai chok. Tamdeuh pal khawh ai tim ko rih. Cattialtu Chelsea Bawi.

Be the first to comment

Leave a Reply

Your email address will not be published.


*