A FANU ATHAH NING CU CELH DING BAK ASI LO TUKSUM KHI SI

Cubantuk minung cu dah, Fangei ding zongah aa tlak lo. Rawlttam tihal tuar in a chungchuak fanu a chiah ruangah a fanu te cu a nunnak aliam. Hithil hi Maryland i, Silver Spring ah a cangmi asi. Kum 23 a simi nu pakhat Kiearra Tolson timi nih a fanu kumkhat le thlathum a simi cu a nunnak alak.

Hi konghe pehtlaiin thanhnak an tuahmi cu Kiearra Tolson nih kumkhat le thlathum te lawng asimi cu rawlttam tihal in a chiah caah a fanu Blair Niles cu a nunnak aliam tiah an langhter. Rawlttam in a chiahnak caan zong hi a sau ngai cang tiah an chim. Kiearra Tolson nih a fanu a thahmi konghe pehtlaiin Police nih hitihin an chim.

Hringtu a nu nih hin a fanu kumkhat le thlathum lawng asimi cu rawlttam chiah in a nunnak alak caah nizan ah khan tlaih a si cang tiah Montgomery County Police zung nih thanhnak an tuah. Afanu a thah nak konglam vialte zong aa phuang dih cang tiah an chim. Rawlttam in a fanu a chiahnak caan an chimmi hi a sautuk hringhran.

Kum khat le thlathum te lawng asimi a fanu hi rawlpe loin zarhpi zarh thum chung bak a chiah ti asi. Afanu te cu a rawlttam a celh ti lo ruangah a nunnak aliamnak hi a si tiah langhter a si. Afanu ruak cu hringtu a nu nih chanhtling kawr chungah a khumh hnu ah hnawmhlonhnak ah a hlonh rih ti asi.

Hi thihnak konghe pehtlaiin hringtu a pa nih nawlngeitu hna sin ah a chimmi cu ka fanu te hi a liamcia April 17 kha a donghnak bik ka hmuh a si tiah a chim. Tutan ah mithattu Tolson cu a ralai mi tuthla ni 16 ah a biacaihpiak dingin biachahnak an tuah tiah theih asi. Hringtu a nu nih hin zeiruangah dah a thah timi kong tu an langhter chih lo.