US RALKAP THAH DIH DINGIN RUSSIA NIH RIAN ATTUAN CANG

US Ralkap pawl Thah Dih Dingin Russia nih Afghan Tapung (Militants) Hriamnaam Tor le Cheng a Pek Hna.Caansautuk chung a tho cangmi raal daihter dingin thazaang an chuah lio pi ah, Afghanistan ah a ummi American le a ramdang ralkaphawi (coalition) pawl thah dih dingin Russia nih a thlithup tein Taliban he pehtlaihnak a ngeimi tapung pawl hriamnaam tor le cheng a bomh hna, tiah American intelligence officials nih fiangtein namhnehnak an tuah cang.

Ramdang ramuktu bawi pawl a thli in thah (assassinate) le Western ram vialte tuaitam dih dingin karhlaannak a tuahtu misual phu pakhat he Russian rakap hi pehtlaihnak a ngei ko. Bawi le tlaang a thattu misual pawl cu an hlawhtlin ruangah ni kum ah khan Russia nih laksawng tam taktak a pek hna, ti theih a si.Islamist tapung, asiloah anmah he pehtlaihnak a ngeimi pawl hi Russia sinin phaisa tor le cheng hmu hna sehlaw a dawh in an chim.

2019 chung i Afghanistan i a thimi US ralkap hi 20 an phan cang. Asinain, Russian he pehtlaihnak a tuahtu tapung pawl nih an thahmi zeizat an si cu ai fiang lo.US intelligence nih an theihmi thawngpang cu President Trump sin an phaakpi cang i, March dih lei sangah khan White House National Security Council zong nih hi kongah ton biaruahnak an ngei cang.

Avoikhat karhlannak ah cun, Russia he diplomat in pehtlaihnak i ngei ta u sih law, a tuahsernak hi a maak colh hna hnga a cungah phihkharnak le a herh ningin lehrulhnak tuah dingin khua kan khaan, tiin an chim. Asinain cu khuakhannak a takin kalpi dingah cun White House nih nawl a chuah a hau hmasa. American le a dang NATO ralkap pawl Afghan ram chung i thah an tonmi zong tikah Russia nih Taliban pawl a dirkamh hna, ti a fiang ngaingai ko.

A tu bantuk i Russia nih Western ralkap pawl hnahnawh riangmang in a thlitein thahnawnnak a tuah hi avoikhatnak a si, tiin US le Afghan officials pawl nih an chim.Taliban he i kawp riangmang in Russia nih US ralkap a thahmi hi US he ral thawh dingin a ngiar hna bia a si. Cyberattack a tuahmi siseh, US kongah thawngpang diklo a thanh ning le, ningcanglo in a ralkap thazaang a hmanmi zoh in US a ngiartau duh bia a si cu a fiang ko.

A tu bantuk i US nih Russia sual a phawtmi kong hi Kremlin sinah thanh a si rih lo. Mi pakhat khat nih a tawnchommi a si sual ah cun, a cungah lehrulhnak kan tuah ve ko lai, tiin Putin i a press secretary a si mi Dmitry Peskov nih a chim.Kahdohnak kan tuahmi hi Russia he pehtlaihnak kan ngeihmi thawngin a si hrimhrim lo. Kan thangchiat an kan duh caah mah bantukin an chim hi a si.

Russia intelligence he pehtlaihnak nan ngei, an kan timi hi hrih le hram a um lomi bia a si. Minung kan thahnak le ralbawi pawl kan thah hnanak rian hi tuantein kan kalpi cangmi a si. Cu thahnawnnak kan tuahmi vialte cu kanmah thazaang tein kan tuahmi a si ko. American pawl he lungtlinnak kan ngeih hnu cun, cu bantuk thahnawnnak zong kan tuah ti lo.

Anmah zong an him, a do zong kan do ti hna lo, tiah Taliban aiawh biachimtu Zabihullah Mujahid nih a chim.Hi kongah Pentagon ah a ummi National Security Council siseh, State Department le CIA lei nih zei an chim rih lo.Russia cungah lehrulhnak tuah dingmi kongah White House nih biachahnak tuah ai rauhmi kongah US officials nih zei an chim len ve rih lo.

Russia cungah ai nemter ngaimi Trump le a hawi le pawl cu a cheukhat Trump a advisers pawl nih an soilem cuahmah hna.2016 US election hi Russia nih hnahnawh a pek ko, tiah US intelligence nih faakpi in a hmuhsak cang ko nain, 2018 i Helsinki, Finland i summit an tuah ah khan Trump nih Putin lei tang in bia a chim. Russian cungah phihkharnak tuah dingin Congress nih phung an langhter hnu ah Trump nih a min a thuut pah khin a lung a tlinpi hna lo nak kong a langhter.

Europe i Russia a tuahsernak thalo mi solhnalhpiak a duh caah Trump nih cun NATO pawl lehlam cu heh tiah a thangchiat hna.Tutan intelligence pawl nih an chuahpimi agenda hi biathli ngai a si caah, fawitein hi kongah thwngthanhnak tuah an i tim lem lo. Tapung pawl nih an i hmaithlaakmi ralkap lakah hin British ralkap zong an i tel ve caah British cozah he zong hi kong hi ruahti hau a si, tiah official pawl nih an chim.

Tutan US intelligence nih source an laakmi hi an tlaihmi Afghan tapung le misual pawl sinin an laakmi thawngpaang a si. Russia pawl nih zeitin dah cawlcanghnak an tuah, zeibantukin dah thah an duhmi pawl cu an thim ning hna a si, zeitindah Russia nih tapung kut ah phaisa a phaakter ning a si, timi kong belte cu an langhter lo. Russian ralkap pawl hi Afghanistan ram chung tiang an phaan cang maw, asiloah ram chung lut lem lo in ka khatkhat ah Taliban bawi pawl he tonnak an ngei maw, ti zong a fiang rih lo.

US ram chungah puaibainak a tlun salai ling pi ah a tu bantuk in Trump cozah kut chungah thil buai a vun i chap. Hi kong hi kum hramthok tein khan official kutah an phaakter cang ko nain, coronavirus ruangah ram chung phihkharnak a um caah nihin ni tiang an i chiah peng nak zong hi a si.Culawng a si lo, November i thimthannak ah Trump nih buan co a duh caah, Taliban pawl he remdaihnak tuah i Afghan ral hi donghter a duh ca zongah a si fawn.

Afghan ram a daih khawhnak dingah ramdang ralkap pawl thazaang an chuahmi vialte hnahnawhpek dingin Taliban tapung pawl cu Russia nih hriamnaam hmemi tor le cheng a bomh hna, tiin US le Afghan official pawl nih an chim. Russia belte nih cun biachokvai sawhsawh a si, tiin a leh hna.Afghanistan ah hin Russia he kan duhnak ai khat mi tete a um len.

US lei kan duhnak pawl a tlam a tlin khawh lo hi Russia nih ai tinhbik mi cu a si, tiah 2018 lio i Afghanistan i US ralkap an ralbawibik Gen. John W. Nicholson Jr. nih BBC he interview an tuahnak ah a chim.US le a ramdanghawi ralkap pawl hi ni kum thal le khuasik ah khan tha lo lakin tapung pawl kut an tuar ko nain, mi tlawmte lawng an nunnak a liam. 2020 awtka ah khan US ralkap 4 an thi, asinain February i lungtlinnak minsen an thutti hnu cun Taliban pawl nih American pawl hmunhma khuarnak cu an kap ti lo.

Coronavirus a tlun ruangah American ralkap pawl zong cu an camp lenglei ah an i chokvak tuk ve lem ti lo i, tapung pawl kah khawhnak hmun tiang an phan ti hna lo.American ralkap pawl thah dingin Russia nih Afghan tapung pawl hriamnaam tor le cheng a bomh hna, tiin US intelligence nih a langhtermi kongah US official pawl nih za ah zakhat in an zumh cang ko nain, Russia cozah nih hin zeitluk tiangin dah cu bantuk ngiartaunak rian cu a kalp, zei ko dah ai tinh taktak mi hi a si, timi kong belte cu fiangin an thei kho ruam rih lo.

2018 i Syria ah Syria ralkap pawl a tanhtu le phaisa phalh in hlaan khawmi Russia ralkap tampi American le NATO ralkap nih tamtuk an thah hna caah, Russia nih a tu bantukin lehrulhnak a tuah hi a si kho men, tiin a ruatmi zong an um len. Asiloah, Afghanistan hi US nih chuah taak kho lo in a chungah i tartahak peng sih, ti a duh caah Taliban he remdaihnak min a thutmi hi hnursuam, letter a duh caah a si kho mi a si, ti zong in a cheu nih an zumh.

Russia nih an thlahmi hna hi Unit 29155 an si theu lai, tiah US cozah lei nih zumhnak an ngei. Hihi Russia military intelligence agency an si i G. R. U, ti zong in theih an si. 2019 March i Salisbury, England, i British intelligence caah rian a tuanmi G. R. U former officer Sergie Skripal thihsii in a thattu pawl kha an si.Hi Unit hi Kremlin nih ai hman nak a sau cang i, Western ram vialte daitein um kho lo dingin tha le nawn, ngiartaunak chuahter dingin rian a fialmi hna an si, tiah Western intelligence officials pawl nih an chim.

2018 i minung thihsii in an thah lawng si lo in, 2016 lio i Montengro i buaibainak tuah a timtu phu zong an si. Cun, 2015 lio i Bulgaria i hriamnaam sertu mifim pakhat thihsi in a thatu zong kha an si.G. R. U hi Russia cozah nih a thlithup in riantuantu phu ah ai ngeihmi a si i, 2016 US election hnahnawhpe dingin rian an fialmi hna phu an si, tiin US intelligence officials nih an chim.

2016 i thimnak thok hlan deuh vak ah khan, G. R. U cerberunits pahnih a si mi 26165 le 74455 nih Democratic Party an servers an hack piak hna, cu hnu ah WikiLeaks an i hman i US cozah biathli pawl zong zapi theih dingin ca in an vun chuah, tiah US officials nih an chim.2016 thimnakhi Trump nih tei seh, ti an duh caah a tu bantukin rian an tuan hi a si i, Trump nih Russia le an President Putin a chomhbiak ning zoh dikah lung a hring ngai ko.

Trump nih teinak hmuh a duh ve caah, Russia i thlaak ai timhnak a cohlanpiak ko, asinain, Trump i a mithi lalang pawl hi Russia he thatilonak dirhmun phan taimai in pehtlaihnak an ngeih mi kong belte hmuh awk a um lo.Unit 29155 nih thatlonak tuah ai timhmi pawl hi 2016 lio i hack a tuahtu cyberunits pawl nakin tih an nung deuh ngaingai.

Unit 29155 i an officers a cheukhat pawl cu ralkap ah saupi a um cangmi ralkap chuak pawl an si hna i, a cheu le bang cu, 1980 hrawng i Afghanistan i ral a rak sung balmi Soviet Union ralkap hlun pawl hna kha an si. Hi Unit nih Wester ralkap pawl an thah hna tikah Russia cozah nih sual a phaw bal hrimhrim hna lo. Hi Unit hi Afghanistan ah cawlcanghnak an tuah hi kum tampi a si cang, tiin a cheukhat nih an chim.

2003 lio ah khan Taliban hi terrorist phu an si, tiin Russia nih thawng a thanh ve ko nain, kan hnung kum hrawnghrang khan cun an kaphnih pehtlaihnak hi thancho lei a panh ngaingai. Former president Hamid Karzai telhchih in a dang minthang Afghan upa pawl he Taliban officials pawl cu remdaihnak tuah dingin Russia lei tiang an tlawngti bal. Cu lio ton biaruahnak ah cun a tu lio Afghan cozah hruaitu le US lei minung pakhat hmanh an i tel ve lo i, US nih remdaihnak tuah ai timhmi vialte hi vun pah, zeirello in umpiak i tim hna sehlaw a dawh.

G7 meeting ah Putin ka sawm ve lai, tiin Trump nih timhlamhnak a ngeih cuahmah lio ah a tu bantukin thawngpang a than hi a si. US le Russia ralkap karlak i tithiamlonak cu a zuslhna chin lengmang ko cang.Russian raltuknak vanlawng nih international ramri ah le Alask in the Black le Mediterranean Seas tiangah US ralkap vanlawng le tilawng pawl cu nolhcip in a ngiartau hna. Catialtu: Chelsea Bawi