THINPHAN DAILO BAK SI CANG US LE TULUK TIMHCIA AN SI CANG

South China Sea Ah US le China Ai Kap Kho Ding Dirhmun In An I Ready Veve. A tu bantukin South China Sea lei panh US nih a vanlawng phurtu tinpawng pahnih (carrier) a kalter hi kum 6 hnu ah avoikhatnak a si.An i cuhmi rilikulh zawnah cun China nih a tii-ralkap thazaang langhter in raltukcawnnak a tuah caah, US carrier pahnih cu an vung phan colh ve. Kan i hammi rilikulh hi US nih chuh an kan timh.

Cucaah, US dironh dingin kan i manh peng ko, tiin Beijing state media nih a chim. Nimitz Carrier Strike Force min bunh in American carriers pahnih USS Nimitz le USS Ronald Reagan cu air defense capabilities thazaang thawnter dingin raltuk an cawng i, an tilawng cungin rili cung i lamhlatpi ah a ummi raal tilawng pawl kah khawhnak zong an cawn chih, tiah US navy nih an chim.

2014 hnu khan a tutan hi avoikhatnak US carriers pahnih thazaang an chuahterti hna hi a si. Cun, 2001 rii in hmunkhat te i raltu dingin an thlah hna avoihnihnak lawng a si, tiah USS Reagon ah tuanvo a ngeimi Lt. Cmdr. Sean Brophy nih a chim.International law nih a onhmi rili cung a si paoh ah cun zeibantuk ram hmanh nih zalongtein vanlawng zuanter khawh, tinbaw kalter khawh le riantuan khawh a si, timi dirpi dingin a tu bantukin US nih thazaang a chuah hi a si.

US nih Independence Day holiday an tuah lio pi ah, China nih caanrem an i laak riangmang i, Vietnam le Taiwan nih kanmah ta, tiin an i ham ve mi Paracel Islands ah cun ni 5 chung raltuk cawnnak a tuah.Raltuk an cawnmi ah zeibantuk dah an i hmaithlaak khun mi a si, timi cu China lei nih an chim lem lo nain, biatak tein raltuk cu cawn dawh an si ko rua.

South China Sea i raltuk kan cawnmi hi kan ram nih ai ngeihmi a nawlngeihnak (sovereignty) tang te ah kan tuahmi a si caah, ai dawhcahmi thil a si ko, tiah Friday ah khan Chinese Foreign Ministry lei nih an chim. South China Sea chung i 1.3 million square mile hi kanmah China nih nawl a ngeihmi chungah a um, cucaah, a kulh chungah a ummi islands tampi ah China nih kan ralkap sakhaan tampi kan sak ve ko hna, tiin Beijng nih a chim.

Ralkap sakhaan pawl an sakmi hna lakah hin island in rili cung raltuknak tinbaw pawl rak kahnak hriamnaam thatha an chiah hna. Hi hmunhma ah hin ralkap sakhaan pawl kan salai lo, tiin 2015 ah khan President Xi nih Obama a rak chimh bal ko nain, a sak thiamthiam ko.Tu kum chungah hin US le China pehtlaihnak hi a tumhchuk ngai i, US zong nih cun South China Sea lei ah a muihmai tamdeuh le cakdeuh in langhter hram a vun i thok colh ve.

Rili Tannak kong i Zalonnak phung i tlaih in China nih ai halhmi islands pawl khaarpiak viar dingin US nih karhlannak biataktein a tuah i, US Air Force bombers nganngan cu rili cungah a zuanter hna, Japan le Singapore hei ti bantuk a partner pawl he South China Sea lei ah cun raltuk cawntinak a vun tuahpi thluahmah hna.Asinain, tutan zarh i carriers 2 a hmanmi belte zoh tikah, US nih hin South China Sea i China a lornak hi zohsawh a tim ti lo, ti cu a lang.

Hi carrier vanlawng 60 veve a phur khomi an si. Nimitz le Reagan carriers hi vawlei cungah raltukti a thiambik an si i, US nih a ramdang hawi pawl an ramri himbawmnak runvenpi dingin bia ai kamh caah le, Info-Pacific velcheh vialte ah daihnak le thanchonak um kho dingin saduhthahnak a ngeih caah, a tu bantukin a hriamnaam thabik pawl a hman hna hi a si.

South China Sea i a tu bantukin US nih a muihmai a langhtermi hi buaibainak chuahpi a duh caah a si. A cheukhat ram pawl hi South China Sea he ai pehtlai lo mi (US bantuk) an si ko bu ah South China Sea lei ah vun ra riangmang in raltuk hna an kan cawnhnawh salam, cun an ralkap thazaang hna an kan piah salam. Cu bantuk tuahsernak cu South China Sea a buaibaitertu thil an si, tiin Chinese Foreign Ministry aiawh biachimtu Zhao Lijian nih Friday ah a chim.

US a Savo a Co Deuh. US nih cun a carrier 2 cu raltuk a cawnter hna i a thazaang a langhter khawh. Hi carrier 2 hi US Navy nih khualrang in an thlah salam mi an si, tiah US Pacific Command’s Joint Intelligence Center ah an director a si mi Carl Schuster nih a chim.Cikhat cu China nih carrier pakhat lawng ai ngeih rih. A pahnihnak an ser lio mi a um. Cun, China carrier 2 nih hin US carrier nih an phurh zat vanlawng an phur kho ve lo.

US carrier 2 hi cu naite zongah khan Philippine Sea ah USS Theodore Roosevelt he raltuk cawn an i limkaa te a si.China Navy thazaang le US Navy thazaang an i thlau ning cu ai thei ngai ko. US thazaang kan langhtermi nih hin China le kiangkap ram pawl sinah ralkap balahpiah bantuk a si. US Navy nih raltuk kan cawnmi nih hin ahodah a thawngdeuh, ti a langhter ko, tiah Schuster nih a chim.

Philipine Sea i kan carrier 3 he kan cawlcanghmi nakin tutan i kan carrier 2 te lawng he kan cawlcanghnak hi a hmual a fakdeuh mi a si, tiin Schuster nih a chim.Philippine Sea cu ai phah dul mi a si i, South China Sea belte hi cu vanlawng zuannak le rili hmunhma pawl karlakthlak in a um lulhnak hmun a si.South China Sea hmunhma ah hin a hnoksakmi hmun le hma tete an um caah, B-52 cu kan carrier in kan phurhmi raltuknak vanlawng pawl he cunglei in kan zuanter hna.

Hi bomber pi hi Louisiana in raltuk cawn ai thawh tawn. A ratnak hi nazi 28 a rau. Vawlei pumpi hmuh in US Air Force thazaang langhter dingin a rami a si.Tutan kan bomber a cawlcanghnak ning zoh tikah, kan ram (US) in vawlei cung a khua zeika zawn paoh kan phaak khawh, cun kan i tinhmi zong kan tuah khawh, cun hmai a suangmi kan ralkap pawl he zong kan ram in ai thawhmi vanlawng pawl hi caan tawite chungah rian an tuanti kho, timi zong a lang, tiah 96th Bomb Squadron ah commander a si mi Lt. Col. Christopher Duff nih a chim.

Caku Cakei. US carrier pawl tham cu China kutka baa i caku cakei menmen dawh a si ko cu, tiin China nih Global Times ah an chim. South China Sea rumvennak dingah China nih duhduhmama in thazaang kan i ngeih ko, tiin an chim.South China Sea hmunhma vialte hi PLA zapei hummi chungah a um dih. Cucaah, US carrier pawl an cawlcanghnak vialte hi thatein kan zoh khawh dih i, kan PLA he kan i ngiat dih cang hna.

Anti-carriers hriamnaam a si mi DF-21D le DF-26 pawl kan tunh dih cang hna. Hi hriamnaam pawl hi carrier killer, tiin min kan pekmi hna ansi, tiah Global Times nih a chim.South China Sea hmunhma i US carrier a cawlcanghmi vialte hi kan PLA nih thalo tuk in a kah khawh dih, tiin Chinese missile hmanthlaak he Global Times nih Twitter ah a tial.

The South China Sea is fully within the grasp of the PLA, and any US aircraft carrier movement in the region is closely watched and taken aim at by the PLA, which has a wide range of anti-aircraft carrier weapons like the DF-21D and DF-26, which are both regarded as ‘aircraft carrier killer’ missiles,” the Global Times report said.“Zei cu thla, kan Carrier 2 cu South China Sea ah pei an um ko hi. China lei in hnahnawhpeknak a um ruam rih tung lo” tiin US Navy’s chief of information nih a leh colh ve hna.Catialtu Chelsea Bawi.