MIZORAM AH A ZAMMI KONGLAM A PHUAN CANG

Kawlram buainak ruangah Mizoram ah a zaam mi hna hi minung 370 renglo an si cang tiah Home Minister Pu Lalchamliana nih a chim. Kawlralkap hna nih uknak an lak hnu ah Mizoram chungah a rak zaami konghe pehtlaiin Mizoram Home Minister Pu Lalchamliana nih a chimmi cu Home Department nih cazin alak ning ah cun kawlram ralzam hi minung 370 renglo an si cang.

Nun himnak ruah ah a rak zammi hi minung 370 renglo an si cang i, a si khawh chungin Mizoram mipi hna nih khuakip ah thatein an zohkhanh hna. Ministry of Home Affairs nih Kawlram ralzam a rak lutmi hna hi kawlram chungah kuat tthan an si lai tiah an chim timi hi zeihmanh cakuat kan hmuhmi a um lo tiah Home Minister Pu Lalchamliana nih a chim chih.

Kawlram ralzam arak lutmi konghe pehtlaiin Champhai siseh ramri khua tthenkhat hna nih ralzam hna hi mah leng cu an si ko cang lai tiah an zumh. An zumh ning le an ruahning ahcun ralzam hna hi minung 500 cu an tlin ko cang lai tiah an ruah. Thawngpang an lakmi chungah kawlram ralzam a rak lutmi chungah hin a tambik cu palek le meithat rian attuanmi an si tiah an chim.

Cun a dang hi cu cozah rian a ttuan mi Civil Disobedience Movement cawlcanghnak ah aa telmi hna an si tiah an chim. An rak zamnak konghe pehtlaiin an chimmi cu mipi thimtlin mi cozah siloin ralkap cozah nawlngeihnak tangah cun zeitik hmanh ah rian kan ttuan lai lo, ralkap cozah hi kan ttuanpi kho hna lo tiah an chim ti asi. Ralkap cozah doh ruangah ramchung ah a um ngam tilomi hna an si.

Relchih:Chin Miphun Nih Hruaitu Tha Kan Herh Bik Caan Asi. Chin mipi kan pawcawm nak nganbik hi cozah rianṭuan le lothlawh rianṭuan an si. 2014 census (သန်းခေါင်စာရင်:) nih Chin State ah cozah rian a ṭuan milu 15,697 an um tiah a ṭial. Nain nihin ah CDM tuah ruangah pawcawm nak nganbik pakhat asi mi a rawk. Cozah rian a rawh ruangah a dangdang sipuazi le pawcawm nak tampi zong an rawk, an ngol i kan mipi harsatnak fakpi an ton cuahmah. Cucu sipuazi lei harnak (economic crisis) kan timi cu a si. Kan mipi le mino hna nih lamzawh in Kawl ralkap cozah duh lonak an lanh ter.

Thlakhat le cheu bak ralkap cozah duh lonak (peaceful protest) an lanh ter cang. Lamzawh ruang le CDM tuah ruangah bochanmi kan mino hna tampi le cozah rianṭuan pawl tleihkhih, hrem le velh an ton cuah mah. A cheu cu ralkap le palek nih tleihkhih ding in kawl cuahmah an si.Mi tampi tihphang in an i thup, asiloah chungkhat nupi fa kal tak in an zam. Cucu ramkhel harnak (political crisis) kan timi lengmang mi cu a si. Hi dirhmun a simi sipuazi le ramkhel harnak kan ton cuahmah lio ah kan Chin ram le miphun a kilkam kho tu ding Chin miphun hruaitu le cozah kan herh hrimhrim. Cucu a tang lei bantuk in kan tuah khawh.

Pakhat nak, buukip le party kip fonh mi “Interim Federal Chin State Government” (IFCSG) (ကြားဖြတ် ချင်းပြည်နယ် အစိုးရ) kan dirh khawh. IFCSG kan dirhmi nih Kawl ralkap tangah kan him lo timi le kanmah tein kan ni zohkhen kho ko timi biafak kan chim a si lai. Pahnih nak, a fekmi federal ram ser khawhnak caah IFCSG nih “Federal” kan duh le duh lo lanhter nak“Referendum” kum khat chungah kan tuah piak seh. Referendum ah teinak kan hmuh ahcun federal cozah ser khawhnak “political legitimacy” kan ngei lai.

Cucu vawlei cung zei ram hmanh nih an kan al kho lai lo. Pahthum nak, nihin ah Kawl ralkap le CRPH nih Federal kan cohlan tiah fiang tein an chim. IFCSG dirhnak in Kawl ralkap le CRPH an thinlung kan hneksak hna zong a si ve. An ni biatak a si ahcun IFCSG an cohlang hrim lai. Kawl ralkap nih a cohlan lo zongah CRPH tal nih cun a cohlang hrim lai.Tulio dirhmun zoh tikah kan mipi nih miphun hrawitu le kilkamtu kan herhbik lio caan a si. Ngaktah bang mi phun dang hrawitu hnu a zul peng ding kan si ti lo. A donghnak ah nu ei pa ei bang buhṭhing le mehṭhing a kan eiter ṭhan ṭhiamṭhiam ding an si ko. A luan ci akum 70 kan tuan bia nih fak ngai in a kan chimh cang. Credit: Rual Lian Thang

Be the first to comment

Leave a Reply

Your email address will not be published.


*