A SUNGLAWITUK HRINGHRAN, US UM PU THAWNG HUP THANG THILTUAH CU

Tikir khuami US khuasa Pu Thawng Hup Thang ( Camaron Pa) thiltuah cu zohchuntlak taktak asi ko. Asunglawi tuk hringhran, Pu Thawng Hup Thang nih Christmas Laksawng ah tiah chungkhar 49 hna cu Thongkul cio a kuat hna. Kum pi kum khat kan i hngahhlang mi December cu kan phan cang. Khuapi lei panh in thilri duh herh zalh ah khuate leiin tthenkhat hna cu Khuapi ah an choi pah cang hna.

Christmas lai ko ahhin bawmchantu a ngeive lomi, a bikin Ramleng lei in phaisa kuatu le zohkhenhtu a ngei ve lomi hna chungkhar caah cun ngaihchiatnak, lungfahnak a um theu tawn i, Christmas zing Sacuai te cawk ding hmanh ah lungrethei mi ai um theu tawn. Cu lio ah Tikir khuami US khuasa, Saya Thawng Hup Thang nih Laihlum Bual chungah khua asami, bawmchantu a ngei ve lomi tiah ruahmi,

A bikin ramleng lei in phaisa kuatu zong a ngei lomi pawl,hna cu an voikhat Sa cuai cawknak tel ah a thathnempi hna hnga maw tiah Christmas Laksawng a chuah hna. Bual khuasa chungin khua khat ah inn tung zoh in minung (inn dawng) an thim hna i Chungkhar pakhat ah Ks. 20,000 cio Christmas Laksawng a chuah hna. An tthen phawtning hna cu a tanglei bangin an si.

Sialam khua in chungkhar 6, Hmunhalh khua in chungkhar 5, Banawhtlang khua in chungkhar 3, Tluangram A in chungkhar 4, Tluangram B in chungkhar 6, Belhar khua in chungkhar 6, Lulpilung khua in chungkhar 4, Vomkua khua in chungkhar 5, Salen khua in chungkhar 10 hna an si. An dih lak in chungkhar 49 an si. Acunglei langhter bangin chungkhar pakhat ah Kawlram tangka in thong 20 cio laksawng a chuah hna.

A tubantuk in Nuhmei, Ngaktah, sifak santlai lo cungah dawtnak a ngeitu Saya Thawng Hup Thang (Cameron Pa ) hi cu hlan zongah Bual cawlcanghnak kip ah bawmhchanhnak atuah lengmang mi le a kut asamh pengmi asi. Pathian tu nih ngamdamnak, nun khuasaunak chap chin lengmang sehlaw, thluachuahnak he lamhruai zungzal ko seh. Zohchunhtlak pasal tha a si.

Be the first to comment

Leave a Reply

Your email address will not be published.


*