EVIL GOOD TIMI TUKFORHNAK HI CHINMI ZUMTU NUN AH PHUNGDANG NGAIIN A RAK LUT

Biakhiahnak: 7. Evil good timi tukforhnak hi Chinmi zumtu nun ah phundang ngai in kan nunnak chungah a rak lut. Evil good timi cu sualnak kha kan i ziak tuk cang caah sual hmanh ah rel ti lo in a donghnak ahcun thilttha a si tiah ruah piak kha a sullam cu a si. Thiang Thlarau rianttuannak kha evil good lei ah a chak a kan merh piakmi hruaitu, phungchimtu tam lakte Chin miphun chungah kan um ruangah kan khuaruahnak kha dinnak timi chungah hram a thla kho lo.

Pathian nih sualnak chungin a kan luatter i dinnak sal sinak chung ah a kan luhpi tthan ti kha kan i cawnpiak duh lo (cf. Rom 6). Cutik ah pianthar hnu ahcun zeitluk in sual zong ah khamh a tlau kho lo timi cawnpiaknak, thianchehnak nih kan mino tamtuk lungthin a pial ter. Cucaah evil good timi hi hriamnam nganpi, meithal hmuahchih in kan sin ah a rak phanmi a si lo; kan chiattha thleidannak lungthin, kan biakhiahnak chung te ah khan, sual kha sual a si lo, ngaihthiam pei kan si cang cu timi te in a rak lut.

Rul bak a si nain, ngarul muisam in kan chung ah a rak lut, a rak luhning a fim tuk caah Baibal ca a cawngmi hmanh nih kan i chuahsual pi peng ko. Hi bantuk evil good nih a nun a hruaimi hna nih cun, an chirhchan caah Baibal caang phuntampi an i ngeih ve ko, asinain zeitikhmanh ah Khrih dinnak le Pathian thianhlimnak kong cu an chim duh theng lai lo. Zuri camp kan tuah piak hna i thilttha taktak a si.

Ngakttah kan cawm hna i thil ttha tuk a si.Baibal cawnpiak ning zong a si. Amah belte kan i ralrin lo ahcun, zukawk le ngakttah tu nih an kan cawm sual ahcun a poi tuk lai. Lih tel lo tein, Mother Teres te hna bantuk in nunthapnak le nunsiannak a zik he thilttha kan tuah ahcun a donghnak aphi chuak cu Pathian sunparnak a si ve ko lai.Anih cun hlawtmi hna chungah Jesuh Khrih muihmai a kawlmi a si.

Zuri-sabah kha kan cohlan taktak hna i kan hawi ah kan i chiah khawh hna i, ngakttah hna nih ka nu ka pa tiah an kan auh khawh taktak ahcun kan miphun kan dam chin lengmang ko lai. Thilttha kan tuahnak ah tlawmpal te mah ttangka-huihnak a um tik ah phuhrunnak kan ngeih khawh ti lo ahcun cucu evil good chung i luh hram kan i thawk a si ko. Phuhrunnak ngeih khawh hi ralrinnak a kan petu a si i hihi Thiang Thlarau nih a uk ahcun “Bawipa ka ngaithiam” timi chungah a kan luhpi tthan khawh.

Evil good chung in a kan chuah khawh lai i Pathian tthatnak tling ah kan nun aa hrawm kho lai. Atu lio te ahhin, dai tein um caan a si lo ti zong kha kan chiattha thleidannak nih a kan cawnpiak cuahmah lio ah daite in kan um ko ahcun, Adam dai tein a um kha sual a si tiah kan pa Van Lian pa nih a chimmi kha kan phan ve sual lai. Evil good fawh a si, kan doh a herh ti kha phuhrunnak lungthin kan ngeih khawh ding hi a biapi tuk ko ee. Laknak: IBC

Be the first to comment

Leave a Reply

Your email address will not be published.


*