TUCHUN HAKHA PI SUI TIN INN KANGH KONGAH THAWNGPANG FIANG

TV plug thalo mi hman ruang ah Hakha Chin Oo Si, Nazareth Sang Pi Sui Tin inn a kaang, thilri Ks.300,000 leng man a ciam. 2020 October 11 zaanlei suimilaam 1:55 hrawng ah Thantlang Peng Zeiphai khuami Saya Ngun Lian inn a hlangtu Salen khuami Pi Sui Tin te inn a kaang i, aa hliam mi an um lo, Meithat nih caantanh in a phalh manh.

Hi kong ah Hakha Peng Meithat Zung lutlai Pu Thian Nuam Maung nih, “Inn kangh aa thok ning hi TV plug kha aa long cang mi (achawng mi) in aa thok. TV an vun hon i a kaang. TV hi a haang ah aa cang dih. Chungkhar khuasa 5 (nu 3, pa 2) an si. An inn hi pe 16’x26’ kau a si. Inn kangh aa thok hi kanmah ruahnak ahcun zaanlei suimilaam 1:55 hrawng ah a si i, suimilaam 2:15 ah kan hmih khawh.

Caantanh in phan hlah usihlaw ni a lin tuk fawn, inn aa naih tuk fawn i innpa a tlaichih hnga. Thilri sungh mi hi kan tuah tik ah tangka Ks. 312,000 hrawng a si lai,” tiah The Hakha Times ah a chim. “Meithat riantuantu kan naule an fel tuk. Caantanh bak in an hung phan i mei an hmih manh. An fel tuk, kaa lawmh ngaingai hna.

Hi bantuk hi, mizapi zong nih kan i ralrin cio ding a si. Plug thalo mi cu hman bak lo ding. A thar in thlen hrimhrim ah a tha. Zeicahtiah, ralrin nakin a tha mi zeihmanh a um lo,” tiah Chin Ramkulh Cozah Lamsuul Minister Pu Sui Thio nih The Hakha Times ah a chim.

2020 kum fuurpi chung, Hakha Peng ah inn kaang hi voi 5 a cang cang. Aive khua ah voi khat, Phai ah voi khat, Chuncung ah voi khat, Hakha ah; Thingram Zung pawng, Pehtlaihnak Zung pawng le Chin Oo Si, Nazareth Sang tiin voi 5 tiang inn kaang a cang, tiah kan theih. Credit: Hakha Times Daily Newspaper.

Be the first to comment

Leave a Reply

Your email address will not be published.


*