KAWLRAM LEI AH KYAW KYAW RUAK TLUN PINAK KONG THAWNGPANG THAR

Kyaw Kyaw Ruak Kawl Ram Leiah Tlunpi A Si Lai? Pi Ci Pen le Pu Dar Hei an fapa Kyaw Kyaw cu Sangua-1 YLA, Mizoram hremnak le vuaknak in a thih ko tiah theih Ni, 28 December 2020 Monday in nihin 16 January 2021 Saturday tiang ah Sangau YLA leiin siseh, CYLA lei zawngin siseh, Kyaw Kyaw hringtu a Nu le chungkhar hna sinah, ngaihthiam halnak maw, kan kut a luan sual rak kan theithiam ko u, timi kaakhat te hmanh theih ding a um rih lo.

Sihmanhsehlaw, a toinak in chim ahcun, Kalaymyo hrambunh Chin Association for Christian Communication General Secretary (CACC GS) Za That, Kalay-Kabaw Chin Funtomh nak Bu (CFB) Upa hna le Kalay Chin Baptist Association General Secretary (CBA GS) Khar Luai hna tawlrelnak in “Rem Nak” ser nak caah tiah “Sapi” canah Kawl ram phaisa ting-10 (1000000 kyats) an i put i Kyaw Kyaw chungkhat hna cu, “Sangau-1 YLA Cu Ngaithiam Ko Hna U” tiah a luan cia zarkhat ah khan Tayagone khua mi Upa dik lak hna hmai ah an ti hna.

An bia le hla a ngaitu dingah Kalay CHRO (Chin Human Rights Organization) an i tel ve. Hi tawlreltu ah hin USA khuasa Van Ceu Uk aa tel ve?Chungkhar lei nih an leh mi hna cu, nan mah cu Kyaw Kyaw a hremtu le a vuatu zawng nan si tung lo i phaisa zawng kan in hal mi hna a si lo, kan mah nih kan duh mi cu Sangau YLA le CYLA lei nih remnak ser an duh tak tak a siahcun, vawleicung khua zakip a um mi kan miphun vialte theih in “Kan Ngaithiam Ko U” tiah chim hna sehlaw,

Jesuh Min In Kan Ngaithiam Ko U, Kan Kut A Luan Sual” tiah kan ti hna sehlaw pei, chungkhar lei zawng nih kan ruah ve lai i thil tha cu a chuah lai cu tiah an ti hna. Cutikah, CACC GS Za That nih tuzanah kan chawnh hna lai i an hna a tlak ko ahcun, thaizing ah kan in chawnh than hna lai. An duh lo a siahcun Phone zawng kan in chawn ti hna lai lo, tiah a ti hna hnu ah Kalaymyo lei ah an kiar tah hna. Cuni thawk cun Sangau YLA si hna seh, CYLA lei si hna seh, kaa dangdang lei zawngin nihin tiang zei bia hmanh chawnh a um ti lo.

Cucaah, Kyaw Kyaw chungkhar, khua mi Upa hna le Tayagone Youth Fellowship (TYF) nih Kyaw Kyaw a ruak cu khua leiah tlunpi dingin Kawl ram cozah le Sangau YLA sinah siannak hal dingin a donghnak ah biachahnak tuah a si. Atu tiang ahcun, Kalaymyo Palek lutlaitu le Ngamdamnak lei lutlaitu hna nih cun, zalawng tein tlun kal khawh nak nawl an pek cang hna. Nizan 15 January 2021 Cacawn Ningani zingka ah Sangau-2 YLA President pa zawng Tayagone UPC Pastor pa nih a chawnh khawh cang i, rawl ei khawh in Meeting kan ngei lai i zanleiah thawng kan in thanh ve hna lai tiah a leh.

Culengah, an chimchap mi cu YLA nih Sangau khua chung luh an in sianh hna lo ahcun, chungkhat leiin Kyaw Kyaw a ruak cu tuanvo kan lak lai i Tipi tiang kan in chanh hna lai tiah an ti fawn. Sangau YLA hnatlaknak le siannak lawng hngah a si cang. Kyaw Kyaw a Nu nih ka ruak phumnak ding Tayagone ah ka fapa ruak zawng ka phum piak ve ko U tiah khua mi le Vawleicung ummi vialte a kan nawlnak cu Sangau YLA kut ah a um ti khawh a si cang. Hi vialte hi Kyaw Kyaw a Nu Ci Pen, chungkhar aiawhtu UPC Pastor Tial Mawng le Tayagone Youth Fellowshio Vice President Bawi Peng hna sinin theih mi a si. A herh ningin kan peh than te lai. Nihin in NI-20 a rau cang. Kaa Lawm! Salai PK.

Be the first to comment

Leave a Reply

Your email address will not be published.


*