THAWNGPANG THAR A CHUAK. CNF NIH THANHNAK AN TUAH COLH

Chinram chung thawngpang alengmi kongah CDF nih cathanh an chuah. Tulio ah Chinram chungah ralhrang kawlralkap doh dingah nunnak pek in hriam atlaimi CDF le CNDF, ZFU an si. Atutan ah thawngpang a leng tthan mi cu Chinram chungah PDF kan dirh ve lai timi thawngpang asi. Hi konghe pehtlaiin CDF nih thanhnak an tuahmi a tanglei bantukin a si.

Ralhrang kawlralkap uknak lakmi doh ding le Federal Democracy uknak kan hmuh khawhnak dingah ramchung mipi kilvengtu PDF bantukin CDF cu a liamcia April 4 ah dirh a si i, NUG cozah ralhrang kawlralkap a dohmi phu hna bawmh dingah a si. Chinram chung lawngah siloin kawlram chung hmun tthenkhat zongah miphun le umnak min telh in mipi dirkamh kilvengtu bu dirh cio a si.

Hi bantuk dirhmun ah NUG nih a dirhmi PDF min pu lomi cu hriamnam pek an si lai lo tiah 2020 rampi thimnak ah teinak a hmumi party palai tthenkhat nih an nawlngaihnak langhter duh IN Chin mino tthenkhat an rak lemsoi hna. Cubantuk thil kan theih tikah kan lung attha lo ngai i, cubantuk party palai bu cu fakpi in kan dohkalh peng hna lai tihi kan in theihter hna.

CDF cu ralhrang kawlralkap uknak a dongh khawhnak dingah dirhmi a si i, zeibantuk party ca hmanh ah ral atumi kan si lo. NUG cozah nih thanhnak atuah bangin raltu dingmi kan si i, teinak kan hmuh hnu ahcun kan Bu CDF zong a dong ve lai. Curuangah CDM atuahmi siseh CDF ralkap si hna seh bu dang zong NUG cozah nih raltuk ni caan aphuan ding hi hngakcio dingah cah kan duh hna.

Chin miphun lakah tthencheunak a chuahter ding phun in cawlcanghnak tuah lo dingin zaangfah kan nawl fawn hna. CDF cu NUG, CNF le PDF le a dangdang bu hna he ral a tu dingmi kan si. Chinram chungah CDF nih a ttuanpi hawi CNDF le ZFU telh loin CDF umcia nak hmun ah PDF dirh in Chin miphun cungah tthencheunak a chuahtertu hoih in le nawlngaihnak duh ruangah cawlcanghnak tuah lo dingin theihter kan duh tiah an thanh.

Thawngpang dang:Switzerland nih ralhrang kawlralkap hruaitu lutlai biapi taktak a simi Minister panga hna cu dantatnak a tuah cang hna. Ralhrang kawlralkap hna nih hramhram le ningcang loin nawlngeihnak an lak hnu ah buainak a linsa chin lengmang. Hi ruangah Switzerland nih ralhrang kawlralkap hruaitu lutlai biapi minung panga hna cu dantatnak an tuah tiah an langhter.

Switzerland nih ralhrang kawlralkap hruaitu lutlai minung panga dantatnak a tuahmi hna cu Home Minister Deputy General Soe Htut le Border Affairs Minister Deputy General Thun Thun Naw. Cun Project & Finance Ministry Department le Ministry of Industry department Minister U Win Shine. Cun Natural Resources & Inviroment Reservation Minister Colonel Khin Maung Yi le Tranport & Communication Minister Navy General Tin Aung San hna an si.

Acunglei langhtermi ralhrang kawlralkap hruaitu lutlai biapi a simi minung panga hna hi Switzerland ram nih dantatnak an tuah mi hna cu a si. Asinain mah ralhrang kawlralkap hruaitu lutlai biapi hna hi Switzerland ram nih zeibantuk dantatnak a tuah i, zeibantuk phihkhar nak dah a tuah hna timi tucu langhter a si lo.

Be the first to comment

Leave a Reply

Your email address will not be published.


*