THANTLANG, PU THANG THUM DUM CHUNGAH BOMB AN HMUH

Thantlang Bangla Sang ah SAC ralkap mortar bomb a puak rih lo mi hmuhchap. Thantlang Bangla Sang (Sianginn sang) ah August 25 lio kahdohnak ah SAC ralkap nih an kah i a puak rih lo mi mortar bomb pakhat nihin August 30 ah an hmuh than tiah kan theih. Khuachung Thura Van Lian lam cung ah a um mi Pu Thang Thum dum chung ah an hmuh.

A pawngkam zong ah hin a puak rih lo mi a um kho. Cucaah Sangmi le a bik in a kiangkap um mi kan i ralrin a herh i kan fale zong chimh an herh,” tiah Pu Ram Khar nih a chim.August 29 lio ah Sopum lam hlun Khuahelnak ah a puak rih lo mi 2 an lak cang i Pu Pu Uk dum ah pakhat cu vawlei ah a pil, a puakcia mi a si an rak ti.

August 25 Thantlang kahdohnak lio ah pa ngakchia pakhat a nunnak a rak liam i minung 9 an rak i hliam. August 27 ah SAC ralkap nih hman mi mortar bomb a tlolh mi a puak i pafa hna pahnih an nunnak a liam pin ah minung 11 an rak i hliam. Credit; The Hakha Times

Cabia Dang: Atak lenhloi (true novel) Non-CDMer ka Ṭa, mangṭha law, I theihter ti tuah hlah! A dih cang. Amah lawng pa a si lopi. Hi thil lengluang hnu ah zei khi dah na va ruahchan ngam ti. Nusal ti ngat,” tiin ka maw Iangiang bia hi ka caah hnemhnak bia an si nain CDM a tuah duhlo mi ka ṭa U Lian philhter ding a ka cawnpiaknak bia a si ca ah ka maw Iangiang cu caan zeimawzat ka rak unh (hrial). Atu ka umnak hi fiang in ka chim lai lo nain ramtang ah a si, ti cu ka theihthiampiak te u. Nu ka si.

Ramtang ah va zaam ka herh maw? MAH tepawl huat ding in thil ka tuah mi a um maw? A huat tah an ka hua maw? Tlaihkhih le thah ding tiang in an cung ah sualnak ka tuah mi a um maw? Bia kaa hal. A um lo. An mitsen in zoh awktlak sualnak ka tuah lo i keimah Sungsung hi aho ka si hmanh an ka thei bal in an ka hmu bal fawn lo ti cu a theitu le a hngaltu cu keimah lila ka si. Asiah, zeiruang ah dah ramtang ah zaam in MAH le amilaang pawl ka doh hnga? July 21 zing.

Kan i dornak pawng ah tlangval pawl nih tikhur an huah mi ah khin takkholh kaa tim. Nu kan tam pah ca ah artlang (a changchang) khin zinglei le zaanlei ahcun kan i kholh hna. Fikfa, cangvat, hmaisem lak a si i a kik fawn. Cu zing cu takkholh ding in kaa ready cang. Cu lio ahcun ka maw Iangiang cu kan chak tlang khin a rak tum pah in, “Ka maw, Sung…Sung…Sung…” tiin a rak au len. Ka mawte, zei hen si…hawi kholh timh lio ah, tiah ka hal (Kan umnak hi phone line siseh, internet line a umnak zawnte a um i va hngah hau khi a si.

Ka maw Iangiang hi cuka hmun ah caan a hman tam deuh). U Lian nih message an kuat mi na rel rua lo. Ni 6 a si cang i a zoh bal lo (seen aa ti lo), a ti i a message cu a ka forward i ka rel. Ka lau tuk i ka rak tlicolh. Heh, rel ngat! A mui he…,” a ti i a phone cu a ka pek. Sung, ka ngaithiam in ti ko ning. Ka chungkhar sining a thei biktu pakhat na si. Zung kan kai caan, kan tum caan ah bia kan chimh tawn kha na theih ko. CDM ka tuah duhlonak aruang zong na hngalh ko. CDM ka tuah lo ruang ah ka ti ko lai. Atu ka reng (rank) a kai.

Thlahlawh tu cu amin in an kan kaiter nain a chuah ni taktak ahcun cu hlan ning kha a si ko. Hiti ka chim tik ah na thinhun a zual lai ka theih ko. Nain, zeititha…kan ruahning le kan dirhmun a rak i khat lo. Pa ka si i a tha, ka ti mi na ka zulhpi duhlo ca ah atu bantuk in kan ṭiannak a si ko. Na zawn kan ruah ko. Asinain, na ruahning le ka ruahning aa khah ti lo ruang ah hi vial hin kan vawlei kan donghter a hau ko rua lai. Pakhat belte a um. CDM ka tuah ṭhan lo.

Kaa surrender ko, na ti ahcun keimah nih ṭuanvo ka lak lai i kan pule zong ka chimh hna lai. Cun, kan rak i tinh mi chungmang hna zong kan tlamtlinh ṭhan lai. Cuti na ruah khawh lo ding a si tu ahcun nang le kei cu zeitiṭha…,”Ka rel dih. Kum 4 chung kan rak zawhcia mi dawtnak lamthluan sin ah kar khat hnu kar khat in ka nunnak an pil. Kum 4 chung kan khuallam ah khan a har ah siseh, a nuamh ah siseh, Nu ka si ruang ah ka duhnak na rak ka zulh tawn ko. Atu cu, “Pa” ka si i ti mi biafang an lang cang.

Cu nakin ka sining dihlak kan pek cang mi kha fawi tein ka la ṭhan kho ti lai maw? U Lian, ka sining dihlak in dahkaw kan pek kha. Chim ningzak a si ka hngalh nain ka chim. Ka sining um-ekte kan pek. 2020 December thla dih lai Pre-wedding photo vialte kha mu. 2021 March thla chung ah ṭhit-umnak zong kan tuah lai, tiin kan biakam vialte ngai kha. Kaphnih chungkhar nih nihin ah zeitin an ruah ve hnga mu.
Kei kaa ruahchannak ahcun, ka dawt Sungsung hmanh nih CDM a tuah ahcun kei Pa ka si. CDM ka tuah a hau, na ti lai i cuticun kan khuallam kan peh ṭhan lai, ti khin ka rak ruahsual taktak ko.

Zarh khat voi hnih asiloah voi khat hrawng online ka kai caan ah, “Uu, zeitik dah ka sin na rat lai, na tlamtling maw, biachah naa harh tuk maw,” tiin message ka ṭialtak zungzal. Har ah harṭi, nuamh ah nuamhṭi ding in bia kan rak tiam mi vialte kha. A si ahcun, U Lian sin ah ka kir ṭhan lai maw? CDM ka tuah lo, tiin kaa surrender ṭhan lai maw? Duhnak, tlaihchanhnak, le ngaihnak hma an fak i chikhat cu ruahlo ka ruat taktak ko. Kaa surrender ahcun U Lian he kan i co lai, ti cu ka hngalh. Kan i dawtnak khuallam kan peh khawh ṭhan lai ti zong ka hngalh.

Asinain, Nusal, ka biakam le ka tlahṭem, fek tein ka tai kaa reek cang. Kei cu dawtnak vanchia le dawtnak zuuntlemtu sawhsawh lawng ka si. Ka miphun hawi minung tampi cu an thisen in ram an hum an him. Nunnak an pek mi ka ruah ṭhan tik ah kei ka tuarnak cu a vung din tuk rih ti ka hngalh. Fikfa, caangvat, khuasik le furpithu lak ah thinthi in merem khawhlo a tam. Sunghno ka nu chuanrawl ka hlam ve ko.

Zawtfah caan, ngaihchiat caan, lungretheih caan ah nulepa ka ngai hringhran ve ko hna. Mitthli hi zei can tiang an luan lai hngalh a si lo nain cu mitthli nakin thisen luan ding tiang nun ka thaap cang mi ah ka dirhmun a fek deuh. U Lian, nangmah bia bang, “CDM ka tuah lo tiin rak kir law rak i surrender. Cu lawng cu lam a um cang…” na ti bantuk in kei zong nih, “CDM na tuah i ka sin na rat lawng ah lam a um ve cang…” tiah kan cah duh ve. Zeitiṭha…kan zawh mi lam aa khat fam lo cu ta. Mangṭha law…U Lian.Mitthli sin raithawi zaan, Muihnak sin a faam mitthli, Dongral ah tarh sa hluan, Kei CDM Lengnu, Messenger catlang 11 sin in a rung luang mi Lenhloi a si By: Salai KB Laikhal. Laknak The Hakha Times.

Be the first to comment

Leave a Reply

Your email address will not be published.


*