THANTLANG PENG NIH THIM DINGMI CU AFIANG TAKTAK KO CANG HIH

Democracy cu mizapi/Mipi uknak a si i, mizapi/Mipi dihlak kha uktu ttuan awk a thatlo caah Mizapi aiawhtu ah minung pakhat thim a si. Kanmah Thantlang Peng minung dihlak aiawhtu ahhin Pyine ah Minung 2 kan thim khawh hna i, Amyotha ah pakhat le Pyithu ah pakhat tiah aiawh 4 kan ngei. Thantlang Peng mizapi aiawh caah thimmi Pu Henry Ven Thio cu Vice President a ttuan tikah,

Democracy sullam cun, Thantlang Peng mizapi nih Vice President kan ttuan ti ding khi a si. Pu Henry Van thio nih Kawlram caah siseh, Lairam caah siseh, Thantlang Peng caah a si ah, a ttuanmi le a tuanmi vialte khi Thantlang Peng mizapi nih kan tuahmi a si tiah hngalh a hau. 2020 ahhin Thantlang Peng mizapi aiawhtu thim tthan ding kan phan.

Aiawhtu ah kan thim dingmi minung hna hi zeibantuk ahdah an tthut lai? Zeidah an tuah lai? Zeidah an tuah/ttuan khawh lai? timi hi thimfung ngeitu nih ruahchih a herh ngaimi a si. Parties kip in mizapi aiawh si a duhmi vialte nihcun “kanmah hi kan ttha bik” an ti viar lai. Cucaah, thimfung a ngeitu lei in zoh a herhmi cu Kawlram politics boruak zoh tikah Chin State ah Cozah a tlaitu ding hi NLD Party an si tthan lai timi hi 99 % a fiang ko caah,

NLD in aa pemi Pu Chan Ham le Pi Ni Sui kha Thantlang aiawh/ No1& 2 ah nan thim ahcun, Chin cozah uknak ah Thantlang Peng kan itel kho lai ti a fiang. Asinain, Uktu ttuan cu um ko seh ti ahcun, CNLD in Chin Chin Pekthang or CNP in Pu LMC tbk nan thim hna ahcun Opposition/ Nawl ngeitu a silomi, 2015 lio ah Pu Van Thawng le Dr Hmuh Thang ( USDP) bantuk kha a si ve lai tinak a si.

Cun, Union ah a kal dingmi ahhin Pu Henry Van Thio nan thim nolh tthan ahcun Union Cozah ah Tlangtlang peng mizapi nih position/ dirhmun biapi pakhatkhat cu kan tin co tthan khawh men te lai. Zeicatiah, Cozah a tlaitu hi NLD in an si tthan lai tiah zumh cio a si caah! Politics cu local an ti bantuk in Thantlang Peng/mizapi hi uktu/riantuan khotu si kan duh ahcun, kan aiawh ah thimmi minung hna hi, uktu an ttuan kho lai maw? Rian an ttuan kho lai maw? tbk an dirhmun hi zoh a hau hnga.

Asinain, Townships dang nih uktu cu ttuan rih ko hna sehlaw, opposition/dotu lei ah i volunteer ko usih nan ti ahcun, Cozah a tlai kho lo ding, Party le Independent in aa cuhmi kha thim ding an si ko hnga. Uktu bak ttuan ve usih nan ti ahcun, Cozah a tlaitu ding Party in aa pemi candidate kha vote bak ve ding a si hnga. Uktu nan ttuan bak ve lai. Catialtu Zasang Cinzah.

Be the first to comment

Leave a Reply

Your email address will not be published.


*