SANG HRE: CNF HI ZEITINDAH KAN TTHAWNTER NING ASI LAI?

CNF Hi Zeitindah Kan Thawnter Ning Asi Lai? CNF thawnter a hau. Lam pahnih ka hmuh mi: Pakhatnak. Ramleng a chuak mi CNF caah fund kawlnak phuu Chinland Club riantuan ning hi tharchuah a hau. Hakha-Thantlang sin lawng siloin kan unau hna Falam le Tedim lei tiang bia a ruah duh mi, a ruah kho mi le a sawm huam tu le a sawm kho tu pawl kha ram kip Chinland Club ah riantuantu an si a herh cang.

Pahnihnak. Chinram ah CNF nih bia tak tein ramri lei ah tangka an hmuhnak ding le hriamnam an zalh khawh ding ahcun san a tlai an ti mi business paoh an tuah a hau. Mipi tangka thawhnak lawng in Wah (O), KIA le Karen tbk a thawng kho lo. Zapi theih a si. Mipi thapeknak in CNF nih an tuah a herh ve cang. Note: keimah pumpak hmuhning le ruahnak. Idea tha tha zong van chuah cio ve uh. Credit: Sang Hre.

Relchih:CNF KAN SOISELNAK BIA HNA HI THUK DEUH IN RUAT USIH! CNF kan soiselnak bia tampi chungin pahnih thum ka vun char lai, 1. An ral a chia tuk… Tha tein ruat ve law “an ral a chia tuk” timi bia hi a dik hnga maw? An ral a chiat lo ruangah kum tampi thingtang le ramlak ah hriamnam tlaih in an vak! Mi ralchia nih mah bantukin an tuah bal lo! Cun anmah zawn an i ruah caah maw miralchia bantukin an um, mipi zawn an ruah caah dah?

Hi biahalnak hi tha tein ruat! Mipi kan in ven hna tiin hriamnam he chuak hna seh, ram-ui pawl khi kap hna sehlaw anmah nakin a tuar deuh ding cu mipi kan si! Cucu CNF hruaitu hna nih fiang tuk in an hmuh! Cucaah an ral a tha tuk nain miralchia bantuk in an um rih! Asinain an meithal an puah caan cu a phan te ko lai! Cutikah atu hi CNF miralchia a titu vialte cang-ai bang kua chungah lo diam kan luh lo ding a biapi!

Pahnihnak. Zeihmanh an si lo..! Zeihmanh a si lomi nih zeihmanh an tuah kho bal lo! Asinain CNF nih cun Chin miphun caah thiltha an tuahmi a tampi! Ramthumnak lanh khawhnak kutka an on mi le Chin National Day an umter khawh mi hi tlangcung hriamtlaibu dang hna hruaitu nakin thil an ti khawh deuhnak a si!Rakhine nih, Shan nih, Kachin nih, Mon nih, Karen nih National Day ngeih an duh tuk teh! Mizo zong nih an duh tuk si! Asinain atu tiangah an ngei kho lo! Kannih Chin cu CNF hruaitu hna thawngin kan ngei kho! Zeihmanh an si lo a titu hna nih an tuahmi hi kan tuah kho hnga maw? Ruah cikcek a hau!

Pathumnak. Midang an tluk lo….! Chawva le hriamnam, minung tlawmtam lei ah hriamtlaibu dang an tluk lo kho men ko! Asinain zeiruangah ti kan zoh a hau! Shan, Karen, Kachin le AA hriamtlaibu hna nih tangka an laknak bik cu bing le an ram chung lungvar mansung hna a si! Cu pawl cu kan Chin ram ah a chuak ve lo, a um ve lo! Cun an mipi nih chawva in siseh a minung in siseh an dirkamh tuk hna! Cucu an thawnnak a si ko!

Chin mi dihlak, rian a tuanmi paoh, business a ngeimi vialte nih CNF ah thawh dih tuah usih ca, CNF hi a thawng tuk ko lai! Mipi nih za ah za kan dirkamh ko hna buin zeihmanh huaha an si lo ahcun mawhchiat ding a si ko! Mipi nih kan dirkamh lo tuk hna bu hmanh in hitluk an cawlcangh khawh mi hi kan pale uar an um tuk ka ti! Atu hi a aukhuangmi nih CNF hi hruai usihlaw kum 5 kan kal kho hnga maw? Mi tlawmte dirkamhnak in kum 30 leng CNF an kalpi khawhmi le rian an tuan khawhmi cu thangthat an phu tuk!Cucaah cun CNF hi soisel, mawhchiat le thangchiat loin kanmah le ti khawhtawk tuin tha pe cio usih, dirkamh cio usih.Long live CNF…God bless CNF. Credit: Van Bawi Lian

Be the first to comment

Leave a Reply

Your email address will not be published.


*