SALAI VAN BAWI LIAN DIRPI HNA USIH, ARUANG A UM

2020 Thimnak: Salai Van Bawi Lian (Martin) Dirpi Hna Usih.2020 ramkomh Kawlram thimnak (General Election) ah Thantlang peng Pyithu Hluttaw hmunhma ah CNLD Party in aa cuh dingmi Salai Van Bawi Lian cu ruahnak in siseh, thazang in siseh, vote peknak in siseh dirpi hna usih. Salai Van Bawi Lian kan dirpinak ding a ruang bik a simi pawl tiah ka ruahmi a tanglei bantuk in lanh ter ka duh.

Salai Van Bawi Lian cu Chin Mino ramkhel riantuan a duhmi vialte caah hmaikal a si. Nihin Chin mino tampi ram le miphun caah riantuan a duhmi kan um ko. Asinain, ramkhel rian taktak ah i pumpek tak ding caah ake thling a zaami le lung aa awtawm mi kan tam tuk rih. Salai Van Bawi Lian le Salai Ceu Bik Thawng nih ral ttha tak le pumpek in lam an kan ser piak. Salai Van Bawi Lian teinak a hmuh ah cun Chin mino ramkhel rianttuan dingah kan ral a ttha chin lai.

Zumtlakmi Pasalttha Asi Ruangah: Salai Van Bawi Lian nih dinfelnak kha dirpi ding in ramkhel ka lut lai tiah bia a chah. Anih hi a kaa lawngin bia a chim sawhmi si loin tuah sernak in a langh ter zungzal mi zumhtlak pasal ttha asi. Mi nung pakhat zumhtlak asi le asilo theih na duh ah cun a hnulei a sining va zoh tthan ti asi. Kan hngakchia tein ka u bantuk, ka hawikom ttha bantuk in a theihhngalmi kan si i high school a kai in nihin tiang phaisa cazin fel tein a tuah i a chia zungzaltu asi. Amah bantuk mino ram hruai dingah kan thim ah cun Chin ramkulh ah eihmur (corruption) a zor lai.

MP Pakhat sinak he atlakmi fimthiamnak angeimi asi. Cawnnak sang a ngeih lawng si loin ramkhel rian he aa pehtlaimi theih hngalhnak (knowledge) le fimnak (Wisdom) a ngeimi asi. High school a kai lio tein ramkhel rian ttuan dingah saduhthah nganpi a rak ngei i ramkhel lei he aa pehtlaimi cauk tampi a rak rel. Rangoon ah sianginn a rak kai lio ah tangka a ngeih chun poah cauk cawknak ah a rak hman.

A hawikom a simi keimah,Tial Hnin, Sang Hre, tiin zaankhua dei inn khan pakhat chungah ah ca a rak rel ti tawnmi a si. Sianginn khar caan le zarhteni (Saturday) paoh ah Rangoon khuapi cauk zuarnak dawr kip luh in cauk a rak kawl i ca a rak rel tawnmi asi. Cu bantuk in ni khatkhat ah miphun le ram caah rian ka ttuan hrim lai timi timhnak le zumhnak he a rak i zuam. A rak i zuam bantuk in a sinak le a fimthiamnak nih ram rianttuan dingah a tlinh bak mi pasaltha asi.

Mipi he neihniam tein rianttuan a duhmi asi. Rangoon ah sianginn a rak kai lio tein sianginn khar caan paoh ah Laitlang lei kir in khua le ram tthanchonak caah a ti khawh tawk tein a rak i zuam zungzal mi asi. Tthalcaan paoh ah tthal ca cawnnak (summer teaching) Aibur khua, Thantlang tbk ah a rak dirhpi hna i man pek loin mino thanchonak biatek tein a rak i zuam.

Sianginn a dih hnu zongah, fimcawnnak le tthanchonak lei he pehtlai in laitlang khua tampi kal in ruahnak le a dang thil a ti khawh tawk in bawmh a zuam zungzal mi asi. Zei tik hmanhah Chinmi phun le Chin ram hnu a chittak balmi asi lo.“Dinfelnak le Tarualnak in Ram Sersiam” aa hmaitlak tu a si bantuk in miphun caah zumhtlak pasal a si caah dirpi cio hna usih.Dirpi tlak a sinak a ruang dang tampi a um rih. Hmailei ah peh chap ka rak i zuam lai. Cu caah a ra laimi 2020 Thimnak ah Salai Van Bawi Lian thimfung pek cio ding ah kan sawm hna. Rual Lian Thang