SALAI LUNG THLI TUM NIH BULHNAK A TUAH CANG HNA

Salai Lung Thli Tum hi cu uar a umtuk hringhran ko ee, Hibantuk thawngpang theih ahcun ai tel lonak hi a um bak lo. Tutan ah kan farnu Sui Hlei Tial bulhnak ah tiah Salai Lungthlitum nih kut a samh tthan. Salai Lungthlitum hi cu tluk khawh ding hrimhrim a si lo. Pasal ttha taktak cu a si ko. Bawmhchanhnak kip ah akut a samh lengmang mi asi.

Tutan Sui Hlei Tial bulhnak konghe pehtlaiin Salai Lungthlitum nih hitihin ca a ttial.Kan farnu Sui Hlei Tial bulhnak caah keimah ti khawh tawk ting 2 ka bawmh ve hna, mah le ti khawhnak lam in ngaihchiat hrawmpi cio hram u sih. Tiah Lai pasalttha Salai Lungthlitum nih alanghter.

Cathanh an chuahmi relchih. Tutan thilcang kongah Thantlang mino hna nih ttuanvo lak dingin thawngthanhnak ca an thlah.Kan far nu Sui Hlei Tial ruak vuinak he pehtlai in fianternak. Tutan kan far nu ruak tawlrelnak kongkau ah Thantlang Mino Bu (TYA) a mawhchiattu zeimawzat um a si. Hihi TYA nan kan bochan caah a si i kan i lawm. Hi kongkau ah kanmah lei dirhmun zong a tanglei bantuk in fianternak kan hun tuah.

Hi kan farnu ruak hi Malay in Ygn siseh, Ygn in Laitlang lei zong a hun kai ko cang caah tlamtling tein a lut kho rua lai tiah ruah a si. Cucaah thlan zong timhcia tein chiahpiak cia an si. Nain, a thaizing ah thawngpang kan theih mi cu kan far nu ruak cu khuachung luhpi khawh a si lo i khua leng ah vui a si tiah kan theih. Hi ruak luhpinak ah peng huap Covid-19 Committee lei khenkhamnak le chungkhar he rak i caihhmainak, Laipawnglung i an buaibainak an ngeih mi kan rak hngalh lo ruang le thawngtheihternak a rak um lo ruang ah a si.

Thawngpang kan theih in TYA OC meeting kan tuah colh. Kan far nu hiti vui ko cu Laimi kan nunphung le kokek kan limhang he zong ai kalh tuk i a fak tuk mi a si caah thlan lei ah thial a si khawh nakding in cawlcanghnak ngeih ding kan i tim. Chungkhar lei siseh, khua nupa lei zong pehtlaihnak kan ngeih hna. Khuanu khuapa lei le chungkhar nih nawlngeitu zunglei tonnak an ngeih hna lio a si ko caah cu thawngpang a phichuak hngak in cawlcanghnak ngeih kan i tim, dide kan ngai.

Khua nu khua pa le chungkhar lei nawlnak cu cozah nawlngei lei nih an pompiak hna caah kan i lawm. A karlak ah thawngpang langhngan in thanh awk tha lo dirhmun in a um ca ah langhngan in thawngthanhnak kan tuah lonak a si. Kan khua kan ram ah kan nunphung upatpiak lo le kan limhang ruahpiak lo in khua leng lam kam ah kan far nu an vui mi cung ah biacaih khuakhangtu upa te cung ah kan ngaih a chia i kan lung zong a fak.

Hi biakhiahnak le tuahsernak hi cohlan khawh lo mi a si tiah kan ruah. Covid-19 lio a si tik ah nawlngeitu ca zong ah thil har ngai a si ko lai nain a lam kawlpiak ahcun a um hrim ko lai tiah kan zumh fawn. Hi bantuk in kan nunphung le kan khuaram sinak upatpiak lo le zawnruahpiak lo in biakhiahnak a um ti nakhnga lo TYA zong nih khuami hna he tang in kan i zuam lai.Upatnak he, Executive Committee.Thantlang Youth Association

Be the first to comment

Leave a Reply

Your email address will not be published.


*