SALAI LUNG THLI TUM A UM KHO TILO, BAWMHNAK APEK CANG

Salai Lung Thli Tum ttheu ttheu hi mi a dirkamh mi le milung thin a hnemtu lengmang a si ko. Uar hrimhrim a um khotuk. Tutan ah Salai Lung THli Tum nih ngeihchia le lungkuai in a ummi kannu Pi Van Bawi Hnem cu angeihchiatnak hrawmpi nak caah tiah kawlram tangka in tinghnih bawmhnak a pek colh.

Salai Lung Thli Tum hi hibantuk thawngpang Laimi nih kan ton caan paoh ah chawva in a zuang colh hmasa peng mi asi. Tuan deuh kannau pa vuak a ton caan zongah a zuanhnawh colh. TUtan zongah a si le rianrang in a zuan hnawh colh tthan. Pi Van Bawi Hnem cu Hakha sipin nih a Aithing tam taktak an lak piak i, an rialpiak dih.

Hi konghe pehtlaiin Salai Lung Thli Tum nih atang lei bantuk in cabia tawite in a langhter mi cu a si. Hakha sipin nih zawnruahnak ngei lo ngai in Pi Van Bawi Hnem a aithing an hrawh piak timi thawng ka theih cu i ka lungtha lo tuk. A vapa siiman caah tiah phaisa ting 2 bawmhnak kan va pek ve. Salai Lung Thli Tum.

Relchih aduh mi caah theihttha ngaingai mi cabia a si.SIFAAK NGAKTAH LE KHUAL A DIRKAMHTU KAN SI AWK A SI. Naite Aug 25-26, 2020 ni Hakha Market i Sipin riantuantu hna nih Tlanglo khuami Pi Van Bawi Hnem aithing tun 10 le tan an hrawhpiakmi kong ah kan ngaih a chia tuk hringhran. Hngilhlo in zaankhua ka dei bak. Pathian dawtnak in Hakha cu Chinmi vialte i kan khualipi a si. Hakha i khua a sami ca lawngah a si lo, khuate vialte i an khua zong a si hi philh awk a si lo.

Chungkhar khuasaknak thil le ri an i zalh cio nak, fale sianginn kainak, zawtfah tik i sizung an fuhpanhnak, puai an zawhnak – cu vialte nakin a biapi deuh rihmi cu an zuatkhalh satil arva le tisik an hnah le cintlak vialte an nun pawcawmnak caah an rak zuar cionak, an khua a si.Atu sipin nih thil a tining hincun khuate mi vialte hmunhma an ngeih ti lo ti ta.

Khuazei ahdah an thil an zuar ve lai? Zeitindah an paw an i cawm ve lai? Zeitindah an fanu le an fapa le sianginn an kai khawh ve lai? Zeitindah Hakha cu “kan khua” tiah an ti khawh ti lai? Zeitindah kan khualipi tiah an ti duh ti lai?Media le pumpaak aw-aan tampi kan theih cia ko cang caah tlawmte in langhter ve ka duh.

Pakhatnak. Ka tuah khawhmi a um lo nain ka lungthin dihlak in sifaak, ngaktah, hmeinu hmeipa, khual ka dirkamh. 2. Ka dawt tukmi ka khua le ka ram Hakha khua i hi thil a can hi ka ngaih a chia taktak. Kan pi kan pu hna nih “mipem daw law, sathlai daw law” tiah thla an rak camnak vawlei a si. 3. Pi Van Bawi Hnem, na ngaihchiatnak kan in tuarpi. 4. Cozah zung i rian a tuanmi vialte nih sifaak, ngaktah, hmeinu hmeipa hna le khuate mi hna cungah zaangfahnak le zawnruahnak ngeih i zuamcio hraam u tiah kan nawl hna.

Hihi Pathian bia a si. Nan thluachuah a si. A thawngtha ciami cu na bawmh lo zongah amah tein aa tuah khawh ko lai. Santlailo kha nangmah bawmh awk ah Pathian nih na sin ah a rak phakpimi a si kha philh hrimhrim hlah. Na techin fapar chan tiang Pathian nih thluachuah pek an duh kha Thlarau mit in hmuh khawh i zuam.

Panganak. Laimi cu mi tlawmte kan si. Pakhat le pakhat aa bawmchan ding lawngte kan si. Miphundang i an kan sersat le kan hmun le kan ram ciacia i an duhpoh i an kan ti hi kan lung fah awk a si. Kanmah le kanmah cu kan i dirkamh awk hrimhrim a si. 6. Pi Van Bawi Hnem caah bawmhnak program a tuahmi nan um ahcun kei zong ka tel ve lai. Credit: Sang Hre

Be the first to comment

Leave a Reply

Your email address will not be published.


*