SALAI LTT THEUTHEU ASI KO HIH UAR A UMTUK BIAFIANG APHUAN CANG

Hmawngtlang nih Pi Ni Sui Lian cu ‘MP ding ai tlak lo’ tiah’ NLD zungchoh ah report an tuah.MP Ni Sui Lian cu tukum thimnak ah Thantlang peng Pyine No.2 in i cuh than ding ah Thantlang peng NLD EC nih ticket an pek cang ko nain tuhi Hmawngtlang nih NLD zungchoh (Yangon) ah report an tuah.

Leitak khuami MP Ni Sui Lian cu Hmawngtlang le Leitak kar buainak kong ah ai thlak bal ruang ah Hmawngtlang khuami nih an duh lo i ‘NLD MP candidate caah ai tlak lo’ tiah NLD zungchoh ah ca an tial hi a si.Kan hnu April thla ah khan Pi Ni Sui Lian nih HMT vs Leitak buainak cu ‘milih hrawkhrol hna ruangah, Mynone nih ngerh-ngawih in zeihmanh an tuan lo ruangah,

Chin Pyine cozah hi mipi cozah an si nain kum thum chung zeihmanh an tuah mi a um lo ruangah hi thil hi a cang’ tiah bia fak ngai in buainak hmun a zohtu cozah zung upa U Tin Aung Win (Deputy Township Administrator) le a hawile a rak zai hnawh bal hna.Mizapi a huapmi MP pakhat nih hi bantuk buainak kong ah khua pakhat tanh in biafak a chim hi a phung a si lo.

MP tuan rih ding ai tlak lo tiah Hmawngtlang khuami nih report an tuah hi a si.NLD zungchoh ah report an tuah hnu in CEC nih kherhhlai ding nawl an chuah. Thantlang NLD upa nih felfai tein kherhhlainak an tuah i atu cu NLD zungchoh(Yangon) ah an hmuhmi report an kuat than cang.

Thantlang NLD upa nih zohfelnak an tuahmi report cu NLD CEC nih an zoh lai i ‘a sual ko’ an ti ahcun ai tlak an ti ning in dantatnak order an chuah te lai. MP cuh khawhnak ticket zong an hnon piak khomi dirhmun ah a um.MP Ni Sui Lian cu 2015 thimnak ah Thantlang peng Pyithu Hluttaw in a lut i teinak a hmumi a si.

Tukum cu pyine hluttaw ah i thial aa tim i Thantlang peng EC zong nih phung ning tein ticket an pek cangmi a si, CEC nih fehtermi cu a si rih lo.NLD nih MP Ni Sui Lian an thawl ve i independent or party dang in ai cuh than ve sual ahcun Thantlang peng NLD zong Chin party CNLD bantuk in an mee ai thenthek ngai ve te lai tinak a si. Credit: Salai Lungthli Tum.