REV.DR. ZA HLUN THANG TE SIANGINN RALHRANG NIH AN LUH HNAWH HNA

Rev. Dr. Za Hlun Thang te sianginn cu nizan sml. 11:00 pm ah ralkap nih an luhhnawh hna i, a fapa, saya Pa Sui le midang pathum zong fak ngai in kut an tlak hna ti thawng kan theih cu kan lung a nuam lo taktak. An phone an check hna i, a fapa nih Miss Universe Myanmar kong a rak share mi post pakhat ruang bak ah fak taktak in an vuak chap.

Ahodah a si an ti i, ka fapa a si a ti ruangah an bawhter i, voi thum an tuk chap. Rev. Dr. Za Hlun Thang zong kupbil dingin voi hnih an ti nain, a bil duh lo pinah, nan lung si tiangin rak kan check uh, sualnak kan tuahmi pakhat hmanh a um lo tiah a ti hna. Rev. Dr. Za Hlun Thang te chungkhar hi atulio kan ram a har lio ah misifak le miharsa hna sinah an si khawh tawk in a bawm mi hna an si pinah kan Chin mi ralzam hna zong a zuanhnawhmi an si i, hi bantukin sualnak ngei loin an luthnawh hna i an naule tiang in an tukvelh mi hna cu lung a fak taktak ko.

Tutan an luhhnawh hna mi a ruang hi Hmawbi ah sianginn kai kho lo dingin a cawlcangmi hna lakah Chinmi an um tiin report tu an um ruangah ruahdamh in an luthnawh hna hi a si. Rev. Dr. Peter Za Hlun Thang he phone kan i chawn i, a fapa zong a pasal ngai caah kaa lawm. Kan si khawh tawk in kan ram ca thlacam le harsami hna caah kan i zuam hna a hau tiah a ka ti. Rev. Dr. Za Hlun Thang te chungkhar Pathian nih in veng ko hna seh. Credit: Saya Thawng Tha Thang

Ralrin Taktak Kan Hau Cang, Kawl Ralkap Tapung Pawl An Sual A Chuak Chin  Lengmang Cang. Inncung Luh In Phaisa le Sui An Chuah Hna - Daily Hot News

Thawngpang Dang:Nizan zanlei suimilam pathum hrawngah ralhrang kawlralkap kut in a nunnak aliammi KIA hriamtlai minung konghe pehtlaiin khuami pakhat nih thil sining a chimmi cu lung a fak ko. Nizan ah KIA hriamtlai hna cu Kachin ram, Phakan peng Shiaduyut khua i, inn pakhat ah an kal. KIA pawl an kalnak inn hi ralhrang kawlralkap lei minung a rak si diam. Curuangah KIA lei pali an thihnak zong hi a si.

Hi thilcang konghe pehtlaiin khuami pakhat nih a chimmi cu KIA an rak ra lai timi hi Zaw Min Thant nih a rak theih cang, Zaw Min Thant hi pitusit a si. KIA an ra lai timi a theih cia caah ralhrang kawlralkap hna cu a chawnh hna i, ralhrang kawlralkap hna cu minung sawmnga hrawng an si. Ralhrang hna nih KIA cu an bawh dih cang hna. KIA cu motor in minung pasarih an rak phan, Cu ahcun an kah colh hna i, KIA lei pali an nunnak aliam tiah a chim.

Mipi leirawitu Zaw Min Thant hi ralhrang kawlralkap hna nih an kilven ngaingai mi asi i amah lila zong ralhrang kawlralkap caah a thlithup in rian a ttuan pengmi asi tiah an chim. Ralhrang kawlralkap nih an kilven taktak mi asi caah ritnak siithalo tiangin azuar i a hmuhmi lila zong ralhrang kawlralkap a pek tawn hna tiah an langhter chih. Cupin ah amah hi KIA ngiathlaitu ah an chiahmi asi i, midang zong tangka in KIA ngiathlaitu ding afial rih hna ti asi.

Zeithei loin KIA minung pasarih hna cu leirawitu Zaw Min Thant inn an rak phak inn kulh chungah an luh bak ah ralhrang kawlralkap nih an kah colh hna. Ahmun ah minung pali cu an nunnak aliam i, a dang minung pathum tu cu vanthat ah an zaam manh. Leirawitu ruangah a nunnak aliammi KIA minung pali ruak cu KIA lei nih an lak khawh cang hna tiah an langhter chih.

Tuchun ah ralzam pawl ei le din a va lakpiak mi Mino pahnih cu ralhrang kawlralkap nih an kahthah hna tiah theih asi. Kaya ramkulh Demawso khuapi pawngah a ummi ralzam hna caah tiah mino pahnih hna cu khuachung ah ei le din lak dingin an kal. Cu ahcun ralhrang kawlralkap hna nih an kah thah hna. Demawso ah hin PDF le ralhrang kawlralkap karlak ah biatak tein i kahnak a chuak.

An i kahnak ah hin ralhrang kawlralkap lei in minung tampi an nunnak aliam ti asi. PDF hna nih ralhrang kawlralkap lei hi minung pali an tleih rih hna. Atu tiang theih khawh tawk ah ralhrang kawlralkap lei a nunnak aliammi hi minung pakul hrawng an si cang tiah an langhter. Tukdohnak a fah tikah ralhrang kawlralkap nih cunglei raltuknak vanlong tiang an hman cang.

Hi bantuk in i kahnak a fahtuk caah khuami mipi hna cu a thonghra hrawng an zam cang ti a si. Apeh peh in an i kah tikah khuami hna cu khuachung zongah an lut ngam ti lo. Cubantuk in ralzam an tam tikah mino pahnih Alfred Ludo le Patrick cu khuachung ah ei le din cawk ah an kal. Mino pahnih hna cu tuchun ah ralhrang kawlralkap nih an kah thah hna tiah an chim.

Mipi zawnruahnak in khuachung akalmi mino pahnih hna hi ralhrang kawlralkap nih biahalnak zong an tuah hmasa hna lo. Zeihmanh bia chim loin an kahthah hna pin ah an ruak zong ralhrang kawlralkap hna nih an kaltaak hna hnu ah mipi nih an ruak cu an char tiah an langhter. Ralhrang kawlralkap hna nih sualnak ngeilo minung an thahmi hna hi a tam ko cang.

Be the first to comment

Leave a Reply

Your email address will not be published.


*