KHAH TRUMP AHUA TAKTAK MI PA BIACHIM CU THINPHANG SI KO CANG

Republican Senator Mitt Romney biachim nih Republican upa cheukhat lungthin put a langhter ngai. Republican Senator Ted Cruz le a hawile pawl nih “January 6 Electoral College vote dohkalh an timh cu kalsual a si.Buainak zong a chuahter lai. A buai taktak khomi a si” a ti.A nih hi Trump a huat tuknak hi lungthin ne tiang in a chimmi a si i, hi lunthin put hi Republican upa dang pawl zong nih an lungkil cio cun an i hrawm lai tiah ka zumh. An phuan lo hna caah a si lai.

2020 US presidential thimnak cu a hmaan lo tuk ti an theih cio dih ko. Asinain an theihning cio in tan an lak i, Trump an tan pi ahcun Trump le a minung pawl an por lai i, Biden hnuzul pawl he buainak a fak lai ti hi an ruah cio. Cucaah buainak chuahternak cha cun Trump hi kal tak ah buainak a din deuh lai ti hi cheu khat upa pawl lungthin put siseh law ka dawhter. Mah ruangah Republican upa cheukhat cu, i hnek riangmang in daidep an kaa an cip hna.

Mitt Romney tu nih cun fiang ko in a hei phuan ko. Amah party hawi lila tiang a phomh hna. Mitt Romney nih a mah party lila a soiselmi hna hi cu Trump a huatnak in a chuakmi si i fak ngai in a bia lak awk a um lo. 2012 ah president a rak i cuh i Trump tan pinak a rak hal. Asinain Obama nih a rak tei. Trump president a van i cuh i a vun lar ngai khan huat hram le doh hram a thokmi a si.

2016 i Trump a vun tlin khan Trump policy a phomh thluahmah hna. Trump nih a phomh chih ve. Maisam in aa sammmi an si. Trump impeachment an tuah zong ah khan Trump sualnak vote a thlak. US tuanbia ah amah party lila a sual ko tiah vote a thlami cu Mitt Romney lawng a si. Asinain Trump kha a sual maw? Sual lo. Ukrainian President lila nih Trump sualnal a um lo a rak ti.

Mormon biaknak a zulmi a si i, a kalsual ngai. A party lila ah ei lo sa bantuk ah a cang. Chim duhmi cu, a cung i Mitt Romney bia khi keimah hmuhning ahcun US upa hna tampi ruahnak le lungthin put a si lai tiah ka zumh. Chim theng loin Trump hi zuhphiak tak ah lam tha bik a si lai tiah an ruah tiah ka zumh. A ruang cu Inn Raang cuhnak kutka hram ah an um cang hna tikah buainak cu hrial awk a tha ti lo.

Obama tuksawhnak bial pawl, Hillary Clinton nih a zei ti hmanh in sunghkhan lo ding tiah a chimmi te hna, election zan i State kip i Inn Raang ka lak hrimhrim lai tiah Trump doh in an aunak le an buainak te hna pawl vialte hi vun doh ding ahcun US a puak ding a si. Cucaah lungfim buin a sungh zong a sung lo i, a palh zong a palh lo nain Trump an zuhphiak tak thluamhmahmi hi lam tha bik cu a si lo nain US thatnak le himnak caah cun lam tha cem a si lai tiah ruah cio dawh an si.

US politics cu mit le hmaika bantuk cun kan zoh peng i, election hnu in Republican upa pawl lungthin put thlen ning cu laikeng zawng thlen bak in an thleng thluahmah hna. Mitt Romney bia nih ka khuaruah a harmi vialte a fianter chin lengmang. Tahchunnsk ah Justice Department an siah Intelligence bu lei an siah hlathlatnak zong tush loin “thimnak a him ngai ko; “US tuanbia ah a him cem a si” tiah zangtahlat in an chimmi te hna; Court fa he a ngan he zaang tuk in biachahnak an tuahning te hna.

2020 thimnak thawngpang pawngkam ah um hrimhrim a duh ti lomi Republican upa an tam lai. Trump dirpi le an ngamh fawn lo. Dirpi lo le mang chia nih a zelh peng fawn hna. An zam tak kho fawn lo. San kan tlai lo tiah sivang in an um men hna lai. Asinain raltha in ram daw le dinnak a tanhmi nih cun Trump an dirpi. An sungh zong ah upat phu an si. Tutan thil hi an kal tak khawh men te lai nain a ra laimi caan ah a zual deuh rih lai.

Keimah hmuhnak sawhsawh, tutan Republican upa, Bill Barr telh in cheukhat cu a tlolh lengmangmi meithal bantuk an si. Cakei hmuh zong ah tlolh; vom hmuh zong ah tlolh; nengpi hmuh zong ah tlolh; tlolh lengmang tlolh lengmang; den ding lawng bak a tang. Trump an deuh cikcik. A ngaingai ti cun Senate an thawn thanmi zong Trump thawng a si. Majority an si le si lo lam cu January 5 ah a fiang lai.

An fir than lai ti lawng an phang ko. House zong a thawnter chinchin hna. Majority cu a tlinter hna lo nain minung 14 teinak a hmuhter hna. A herh lio hna caan a zuhphiah tak. Supreme Court zong ah minung pathum a thutter hna i, a herh lio caan ah an deuh hoi. Supreme Court ah John Robert hi Conservative a si nain cinghngia tuu phaw khuh an ti. Conservative pawl a deuh lengmang hna.

Tuan deuh phone a chawnhnak bia a chusk (leak) sual i “2020 ahcun Trump kan thlak lai” tiah minung pakhat sinah a chim. Texas le states zeimawzat nih Swing States pali tazacuainak an tushmi zong a hnon. An bia ngaih zong a duh lo. Robert ruangah a si an ti. A tawinak cun, US daihnak a si poah cun dinfel lonak le fir zong nih kan dolh ko cang seh tiah sunghkhan he ka lawhter cang. Credit: Luthter Tin Hre

Be the first to comment

Leave a Reply

Your email address will not be published.


*