PATHIAN NIH SALAI VAN BAWI LIAN HI MIPHUN HRUAITU AA KAN PEK MI ASI

CNLD party in MP aa cuh dingmi salai Van Bawi Lian hi kan vote hrimhrim awk asi. Politics kong hi ka theih lo nain ka theih mi cu kan CHIN ram hruaitu hi piangthar an si ahcun kan ram a tha lai timi cu fiang tein ka theih mi asi. Kan CHIN ram cu kan mah chin mi kan mah Khrihfa mi piangthar miding mifim nih an hruai awk asi ko.

Salai Van Bawi Lian hi zei ruang ahdah kan vote awk a si ka ti ngam ti asi ahcun a nih cu mifim mi thiam a si hlei ah miding piangthar a si ruang ahhin ka duh khunnak asi. Hi bantuk Pathian a ttihmi miding mifel nih kan ram ah hruaitu an si ahcun Pathian zong aa lawm lai i kan ram kan miphun a tthangchon hrimhrim lai i thluachuah kan hmuh lai.

Salai Van Bawi Lian hi Yangon ah sianginn tangkua ka kai lio ah ka saya tha nu le pa can unau can ah ka dir piaktu ka saya a si i, Pathian a duh dan le a dinfel ning le zumhtlak pasal tha a sinak hi fiang tein kut tawngh mit hmuh in ka theihhngalh mi asi. A fimthiam nak mi nak hmanhin piangthar Pathian aa bochan mi a si nak hi ram hruaitu ah ka duh khunnak le ka uar khunnak cu asi.

Zapi nulepa zong nih piangthar hruitu cu nan duh dih lai ka zumh ve CNLD pyithu hluttaw in thlantlang peng ah aa cuh ding a si caah kan mah thlantlang peng nih cun vote dingin ready kan si cang ko lai ti zong ka zumh i kan vote ding hrim2 zong a si fon. Salai Van Bawi Lian cu miding mifel a si caah a ral tha khun, pahrunnak a ngei lomi miding cu an ral a tha. (Phungthlukbia 28:1)

Miphun a lianngantertu cu dinnak asi tiah (Phungthlukbia 14:34) ah kan hmuh bantukin a nih cu miding a si i, miphun a lianngantertu a si lai.(Phungthlukbia11:9)miding hna fimnak nihcun mi kha a khamh hna. A ti bantukin a nih cun miphun chanchuahtu a si lai.(SALM 37:29 )miding cu ramchung ah him tein an um lai i ram cu zungzal in an ta asi lai. A tibantukin a mah thawngin kan ram cu kan mah ta ah a cang kho lai.

A nih cu dinnak kha ttangphaw ah a benh lai (Efesa 6:14). Miding cu Bawipa nih a ven hna (2Chanrelnak) 16 :9 Bawipa ven mi nih ram hruai ahcun ram cu a tthangcho lai tinak asi. Miding cu an dinnak nih a hruai hna (Phungthlukbia 11:3).A cunglei ka langhter mi dinnak nih a chuahpi mi vialte khi salai Van Bawi Lian nih a ngeih mi ti khawh an si.

Hi bantuk Pathian a ttih i fimnak a ngei mi hi Pathian nih kan miphun ca hruaitu ah a kan pek mi cu an si. Pathian pekmi minung hi a hman thiam cio hna u sih. Vote in dirpi u sih law thlacam nakin dirpi u sih. Moses nih a ban thlir i Aaron le Hur nih a ban in an domh bantukin kan nih mipi zong nih salai Van Bawi Lian hi thlacamnak le vote in tha zaang pe cio ko hna u sih. By, Tha Ceu Lian

Be the first to comment

Leave a Reply

Your email address will not be published.


*