RELCIO TUAH UH SALAI PAHNIH AN DIRHMUN HI A HMANTUK HRINGHRAN

Tukum thimnak Thantlang pengah Salai Lungthli Tum le Salai Dokhar hna hi mino te an si lawng si loin nupi le fa zong a ngei rih lo mi an si caah miphun caah ram rian an tuan nak ah zeihmanh donkhanh tu an ngei lo i an caan vialte mipi caah a pek kho bak ding an si. Cun independent an si veve tikah zei party le zei CEC hmai zong zoh loin mipi hmai lawng zoh in an sining dihlak in mipi caah a pek kho ding le riantuan kho ding an si.

Cun dingfel nak kha raltha tein a dirpi ngam mi mino an si tikah mirum le thil ti kho deuh nih duh poah in hlen khawh mi le hman khawh mi zong an si bak lai lo ti cu a fiang bak mi asi. Cucaah hi hna pahnih hi mipi nih kan thim hna ahcun biatak tein eihmuarnak nak zong an doh khawh lai. Zei thil poah a dik le a hmaan mi kha mipi sinah an phanh pi khawh lai caah a zei party MPs hmanh nih Thantlang peng ah duh poah in thil dik lo an tuah ngam ti lai lo.

Cu caah mipi covo le hmuh ding vialte mipi sinah tlamtling tein a phan dih lai i kan Chinram le miphun cu a zei lei poh in kan thangcho lai. Cun mipi duh lo ningin rian an tuan sual ahcun mipi nih duh caan poah an rian in phuah khawh chuah khawh an si fawn caah mipi caah a that khun nak asi. Dr. Andrew Ngun Cung Lian chim bantuk in party cu an chim ningin an tuah lo zongah party policy asi an ti ko.

I, mipi nih an cungah zeihmanh tuah khawh an si lo a ti i a hmaan taktak mi asi cucaah independent in a cuh mi Salai Lungthli Tum le Salai Dokhar hi mipi ralveng piak tu le mipi caah thil dik a chuah pi tu dingah an tlin ve hrimhrim a herh. Cu lawngah mipi nih a zeizong te ah hlawtling nak kan hmuh khawh lai. By Joshua Thang.

Kan Kawltung: Miphun Covo Khuakhirh, CNLD kong fianternak-4. Kannih party nih kan khelmi le kan hmuichon cu “Chin Miphun Covo Lakthan” ding kha a si. Aruang cu, cu kan covo(Self-Determination) midang nih an kan chuh caah kan kutcungah a um ti lonak kum 130 nawn a si cang. Mirang nih 60, Kawl cozah nih kum 70. Cucaah cucu lak/ngah than a herh caah a si.

Phundang in chim ahcun, kannih cu Chinmi kanmah le kanmah ‘idoh le ikalh’ kha kan pawlisi a si lo. Aruang cu kanmah le kanmah buainak ah a phi a um lo caah a si. Nihin Chin ramkhel hi tualchung(ing-kun) lentecelhnak puai a si lo i miphun dang he celhmi tual-leng(away-kun) puai a si caah a si. Cucaah kannih cu “zeitindah nuai 2 hmanh a tling lomi Chin miphun le nuai 20 hmanh a tling lomi tlangcungmi nih, nuai 35 hrawng a simi Kawl le nuai 52 leng a simi Myanmar rampi chungin kan miphun covo kan ngah than khawh lai?” timi tukha chunzan kan ruahmi thlanhri he kan khelmi a si.

Pumpak kehleng iphelh le itangthlak le coka i mah-le-mah buai len kha a niam tukmi ramkhel a si caah a si khawh chungin kan hrial. Pu Laldenga(MNF) nihcun “Mizo nationalism le Vai nationalism i donak a si” tiah a rak ti. Cu bia/hmuichon cun Mizo mipi kha federal ngah lakin a rak khelpi hna. ram a rak hranpi hna. (Kannih cu cutin chim usih law Wirathu ti kan si hoi hnga I kanmah miphun chung lila nih soisel le thahdeng kan si hoi hnga)

Panglong in kan biahren miphun mahte khuakhannak (self-determination) le federal hrangah Chin miphun kan ifuntom can a cu kan timi khi a si. Chin miphun covo khuakhirhnak caah Laitlang NLD le USDP nih an party ah siseh, Hluttaw ah siseh, Remdaihnak Cabuai ah siseh, an chimrel khawhmi pakhat hmanh a um lo caah kan sahngar-ar kanmah tein irungveng usih ti bia khi a si ko.

Chin miphun nih zeidah kan doh taktak i zeidah kan khel taktakmi ramkhel kawltung cu a si ti hi kan ifian a hau cang. Cucu ifiang dih usih law, mah miphun chungah, mah-le-mah, pumpak pakhat le pakhat i soisel le buai len awk a um hnga lo i Kawl nih NLD ah an vote an funtom(rih lai) bantuk in kannih zong MIPHUN ah kan thazang kan ifun dih ko hnga. By, Salai Ceu Bik Thawng

Be the first to comment

Leave a Reply

Your email address will not be published.


*