RALKAP THIMMI CHIN COZAH LE HAKHA BIAKNAK LEI UPA BIARUAHNAK AN NGEIHMI

Hakha Christian Minister’s Fellowship (HCMF) Le Chin State Administration Council Biaruahnak. Tu lio ralkap uknak nih tuanvo an pekmi hna Chin State Administration Council upa nih HCMF upa ton kan in duh ko hna tiah 2021 February 14 ah an kan ti. HCMF EC Upa le Church lutlai hna meeting kan tuah i tonhon lonak kan ceih. Azeipaoh asi ah tong ko hna uh tiah an kan ti caah 2021 February 16 ah HCMF EC Upa le Atu lio Chin State Administration Council upa pawl he ton biaruahnak cu HBA zung ah kan ngei.

An kan ton duhmi hi nihin kan ram sining ah mizapi duhlonak langhternak ah buainak (Ruhrang thiltuahnak) a um nakhnga lo Pastor te nih kan chimh piak hna uh ti asi. Hi biaruahnak cu anmah lei biachimnak, kanmah lei biachimnak, biahal le bialehnak in suimilam pahnih le a cheu chung kan ngei. Cu chung in mizapi nih kan theih tlak tiah kan ruahmi rak thei cio ve dingah thawngthanh siseh kan ti caah kan in thanh hna.

Pakhatnak: Lamzawhnak kongah, Anmah lei chimmi, Upadi ning cun lam zawh hi a hlan kanh in cozah sinah hal le nawlpek hnu lawngah tuah asi nain nihin tuahmi vialte hohmanh kham/tleih an si lo. Buaibainak thil chuah pi lo tein langhter ding asi lio ah buabainak (Ruhrang thiltuah) um lo tein pastor te nih kan chimh piak hna uh tiah kan in nawl hna.

No photo description available.

Pastor te nih kan leh mi, Kanmah pastor te zong, hi uknak hi, Bible ah Pathian nih a thimmi uktu hna, tiah kan pom kho lo. Cu caah a si lo dingmi thil a si caah kan cohlang kho ve lo. Mizapi sinah kan dir. Sihmanhsehlaw ruhrang thiltuah ( Acian phat chin) cu kan duh bak lo, tuah lo ding in kan chimh ko hna, nanmah zong nih an tuah lo bu ah palet/ralkap hmang in harnak pek cu kan duh bak lo, zalong tein tuah hna seh.

Pahnihnak. Civil Disocedience Movement Kongah, Anmah chimmi, CDM hi kan do lo. Cozah riantuantu cu politics ( Nainganzi party) ah aa tel lai lo ti a um caah kannih cu cozah riantuan dirhmun in rian fialmi kan si caah kan i tel lonak asi. CDM atuahmi pawl nih zung riantuanmi chuak hrimhrim uh an timi te hna hi phuah sihnasehlaw anmah nih an cawm kho hna lai maw? Cozah riantuan nih rian a tuan lo ahcun zapi kan har tuk lai.

No photo description available.

Pastor te Lehmi, CDM hi politics (Nainganzi party a si hrimhrim lo. Ram rian ( Ngaingan Ayi) a si tiah kan pom. Cucaah CDM hi kan pom i thla kan cam piak hna. Amah balte zung kai a duh lomi kha kham le tlerhro cu cu a hman kan ti lo, an kai lo a herhnak chim cu a hman, cun lungtho tein a kai lomi cu harnak pek bak lo ding anmah right a si.

Pastor Te Nih Halmi: Upa nih a tlerh hna, zaantim ah tlaih an timh ti hi a hman maw? A hman ahcun kan duh lomi asi. Anmah bialehnak, Kan tlerh hrimhrim hna lo. Cozah riantuantu zulhphung (zungkainak kongah) kan ngeih caah hmailei nan caah a tha lai lo tiah thawng kan thanh hna bia asi. Tlerh tlaih ding ti pawl cu a hman lomi a si.

Pathumnak. Palek Vahnak Kongah, Pastorte nih bia halmi, Zantim khuamang ah palek zah ruangah palek nih mizapi kan kilven nan ti ko nain mizapi thinphan tertu nan si. Cu caah zeiruangah dah an vah? Anmah bialehnak. Byiohahmu nih tuan ah khan 7:00pm ah voikhat, 12pm ah voikhat, le zing 7:00 am ah humhimnak in vah ter ding ati nain Yehmu nih Hakha adai tuk ko. Zaan ah vah a hau lo i zing 7 lawngah palek chawh ding kan ti. Cu zong cu mi tlaih ah asi lo, buaibainak a um lo nakhnga caah i chawh asi.

Palinak: Mizapi Nih Umkheng TUmnak In Duhlonak Langhtermi Kong, Pastorte halmi, Umkheng tum in duhlonak langhter tikah tlaihnak nawl nan chuah maw? An tlaih hna ti kan theih. An kan lehnak, Mah le inn cio in umkheng tumnak cungah tlaih ding kan ti hrimhrim lo, a pawngkam mi nih hna an kan hnawh tiah palek ah report pek a um lawngah tlaih khawh asi. Cun lam cung mizapi lam le khua lakah aukhuan le hnahnawhnak tuah ahcun tleih khawh asi i ni 8 thong asi lo le Fine Ks. 10,000 pek khawh asi.

Ralbawizik nih biaknak innlo zalong tein kan on piak hna, zawtnak zulhphung he aa tlak in thutdir din tiah a chim. Hi kongha HCMF nih zawtnak a thian hlan i kan thutdir bantuk in kan i pum lai ( Ngandamnak lei nih onhmi ning in). Zeipaoh zalong tein tuah uh an ti zong ah caan tha lak in tuah hrimhrim lo ding. Zawtnak a thian rih lo caah a hlan ning tein um rih ding kan ti. Cucaah Khrihfabu nih siseh, pumpak nih siseh inn le hmun le a dangdang kongah tulio uknak lami tang ahcun caanttha la in tuah lo ding kha HCMF nih tha kan pek.

Note: Kawlram ralkap nih thawngthanhnak ( Press Conference) atuahmi he cun aa dannak tampi a um nain Chin State Administration Council nih an chimmi asi. Kan zumh caah si loin kan biaruahnak theihternak asi.

Be the first to comment

Leave a Reply

Your email address will not be published.


*