RALHRANG NIH KAN PASTOR TE MIN RAK KAN PE UH AN TI CANG

Hramhram in ram mipi uknak an kan chut tu SAC ralhrang nih Chin ram Biaknak inn cheukhat a hrawh hnu ah, Chin ram Pastor le Chin ramkulh ah a um mi Phungki pawl cu Thlakhat ah Ks. 180000 cio Lahkhah bantuk bawmhnak pek ding in a thah, Chin ramkulh Pastor nih min cazin pe cio uh law cazin a pe mi paoh bawmhnak thlatin pek nan si lai tiah an langhter hi asi.

Hi kong he pehtlai in Falam khua Pastor pakhat nih “Nihin ni tiang Laimi, Chinmi Khrihfa le Pastor hna hi Cozah nih bawmh bal mi, Cozah bawmh hau kan si lo timi kan i theih tuk. Khrihfabu kan dirh mi zong hi Cozah bochan le bomh hal ding in kan dirh mi asi lo. Cozah nih an kan bawnh ding kan si lo i kan herhbau nak a um sual ahcun Khrihfabu member nih an kan zohkhenh ko lai.

Cu ccu Pastor vialte nih kan i fiang dih ko” tiah Zalen sin ah a chim.Kawl Ralhrang, SAC ralkap nih Miakpi le Bomb an kah mi ruang ah Chin ramkulh Kanpalet khua pi Biakinn pahnih a rawk. Cun Falam peng khuate Biakinn zong zaan riahnak ah an hman lawng si loin thilri an hrawh piak dih hna. Cu Mindat peng khuate Biakinn pakhat zong an hrawh fawn.

Mindat peng Pastor pakhat nih “Chin ramkulh chung kan Biakinn an hrawh mi pawl hi ruah tikah zeitin dah ralkap bamwhnak phaisa cu ka va lak hna, lak awk hrimhrim a si lo” tiah a chim ve. Zalen nih a tarlangh ning ahcun “SAC ralhrang nih Chin ram Pastor le Phungki pawl thlatin bawmhnak kan i pek hna lai an ti ko nain cazin a pe mi cu a tlawmte lawng an si” tiah a langhter hi asi.

Min Aung Hlaing - Wikipedia

Thawngpang Dang: Nizan ah Council Ralkap North West Command Commander Gangaw a phan; Ralhraang lei nih raltuknak an thawk khawh ca ah ralrin a herh tiah an chim.Nizan, September 4 ah uknak chuttu Council kuttang ralkap bu, North West Command ah Commander (Taing Hmu) a tuan lio mi Brigadier General Phyo Thant cu Gangaw khua a rak phan i Kha-Lah-Yah Battalion No. 50 kulh chung ah Ralkap Council chungtel pawl he tonnak an ngei tiah theih a si.

COVID-19 le uknak kong ah a ra tiah an langhter ko nain a biapi in a rat hnawhchan cu raltuknak kongkau a si kho tiah rammi runvennak bu lei nih an chim. Gangaw kiangkap ah Council ralkap le PDF pawl i kahnak a um lengmang i Council ralkap lei in tampi an thi cang.A luan cia ni hnih hrawng ah ralkap helicopter aa helhum lengmang mi zong hi PDF camp pawl an kawl mi lawng siloin ralbawi a rat lai ca runvennak ah an i hrocer zong a si kho tiah tualchung mi cheukhat nih an chim.

Ralkap Command Commander pawl an rat ahcun raltuknak a fah khawh ca ah Gangaw le Yaw ram chung ah runvennak ralrin ngai a herh ti in tualchung media nih an langhter. Photo: North West Command Commander le tualchung Ralkap Council chungtel pawl an i ton lio (Credit: Gangaw Youth Voice). Credit: The Hakha Post.

Be the first to comment

Leave a Reply

Your email address will not be published.


*