RALHRANG NIH KALAY MIPI AN THAHMI CU AN TAM KO CANG

Ralhrang kawlralkap nih hramhram uknak an lak hnu ah Kalaymyo nunnak aliammi cu an tam ko can. Ralhrang kawlralkap nih Kalaymyo mipi an kah thah mi hi minung 18 an si cang tiah an thanh. Ralhrang kawlralkap nih february nikhat ah uknak an lak hnu ah Kalaymyo khuachung mipi an thahmi hna hi minung 18 an si cang tiah an langhter.

Ralhrang kawlralkap nih nawlngeihnak an lak hnu March nithum in April ni thum, thlakhat chungah biatak tein Kalaymyo ah hruhru hranghran in cawlcanghnak an tuah i, mipi hna cu an kah hna. Hi konghe pehtlaiin Chinlung Today nih data collection a tuah mi chungah minung 18 an nunnak aliam cang tiah a langhter. Mah cazin lakmi ah hin hrelh sualmi zong an um kho i, hliamtuar zong zeimawzat an um.

Minung tambik an kahthahnak hmun hi Kalaymyo khuachung ah a si i, minung hleikhat an nunnak aliam. Hi chungah khuadang minung zong an i tel hna. Cun a vun changah Chaungkhua ah a si i, hi ka khua ah hin minung pathum an si. Mipi an thih tambik caan cu april nikhat kha a si. Kha ni ah minung paruk an nunnak a rak liam. Cun March ni 28 ah khan minung 5 an nunnak aliam i, March ni 17 ah minung 4 an nunnak arak liam. Credit:CT

May be an image of outdoors

Relchih: CNN Journalist Clarissa Ward nih Myanmar Kong a Chimmi Dihlak. Atulio vawleicung a ngan bik thawngzamhnak CNN in Chief International Correspondent a simi minthang journalist Clarissa Ward cu pumpak in Myanmar ram ah a rak ra i, atulio Myanmar ramchung sining kong vawleipi theih in nihin ah a vun phuan.Mirang holh aa harh deuhmi Laimi hna zong nih atulio kan ram kong ah Clarissa Ward nih vawleipi ah zeitindah a chim timi theih nan duh lai caah The Chin Journal nih Laica in a zapi in kan rak leh.

Clarissa Ward nih CNN thawngzamhnak in nihin ah a chimmi cu a tanglei bantuk hin a si:“November 2020 thimnak ah NLD nih fak tuk in teinak a hmuh i, Myanmar ralkap nih uknak an lak. Cucaah, Myanmar ram huap piin lamzawhnak fak piin a chuak. Fianghlang tein chim ahcun Myanmar ralkap nih mipi dirkamhnak a hmu lo. Lamzawhnak a fah chinchin bang in ralkap nih uknak a chuhmi kong ah rammipi an thin a lin chinchin.

Ralkap nih lamzawhtu pawl cu tuksum in a lehrul hna i, kan theih bang in rammi 550 leng an nunnak a liam cang. A thimi lak ah kumtlinglo ngakchia tampi an i tel. Myanmar ah ramdang in Journalist dang pawl luhnak nawl an pek hna lo caah hika hmun ah rat i thil sining taktak hmuhtheih hi a herh tuk kan ti caah ralkap nawl onhnak in kan rat hi a si.Myanmar kan phak tik ah zalong tein cawlcanghnak nawl nan ngei lai tiah ralkap nih bia a kan kam.

Cun, Yangon i nan duhnak hotel ah nan i tthum kho a kan ti. Asinain, hotel ah i tthumhnak nawl a kan pe lo; an kulh dihmi ralkap sakhaan tu ah a kan tthumhter. Leng kan chuah zong ah ralkap nih a kan zulh peng. A ni khatnak lebang kha cu ralkap motor paruk nih a kan zulh. Cu pin ah zei thil kan tuah poah ah kan cawlcanghnak pawl kha ralkap nih record an lak dih. Cun, bia kan ruahmi hna minung paohpaoh hman an thlak hna i record an tuah dih.

Ngaihchia ngai a simi cu camera kan i chuah i video kan thlak lecangka in mipi nih an run kan fuh i an kut zung thum an thlir. Democracy kan duh a kan ti. Kan ram ah daihnak a um lo tiah a kan chimh. Asinain, kan sin ah bia a chimmi pawl cu a rauh hlan ah an tlaih hna ti thawng kan theih. Zei ruang ah dah nan tlaih hna tiah ralkap biachimtu ka hal i, ‘Bia nan ruahmi hna nih mipi an hrihawh hna lai i buaibainak an chuahpi lai kan phang’ tiah a ka leh.

Minung 8 cu kan thlah cang hna an ti i kan hnga a ngam deuh. Asinain, atu bantuk in thlaihkhihnak a ummi nih thil sining pakhat a langhtermi cu Myanmar rammi hna nih an chim duhmi bia hmanh camera hmaika ah zalong tein an chim kho lo. Tihphannak in an khat. Myanmar rammi hna nih ttihphannak le tlaihkhihnak a um lomi hmailei le democracy rampi ser an duh timi hi a fiang ngaingai.Ralkap nih anmah lei thil sining kong langhter an duh ve ruang ah CNN hi Myanmar ah luhnak nawl a kan pek.

Atu lamzawhnak hi ralkap nih cun puarhrannak in a khatmi mipi cawlcanghnak bantuk in an hmuh. Lamzawhtu kut in hliam a pumi hna hmanthlak le thil an hrawhmi hmunhma pawl a kan hmuhsak.Thimnak zong kum 2 chung ah kan tuah tthan lai an ti. Sihmanhsehlaw, ralkap nih thimnak tuah tthan ding an timi cu Myanmar rammi mi tlawm taktak telawng nih an zumh.

Phundang in chim ahcun aluancia kum 10 chung ah Myanmar rammi hna nih an rak tem cangmi democracy uknak kha thlah hrimhrim an duh lo. A sungh pek an duh lo.Hika a hmunhma ah kan phan i thil sining kan cuanh tik ah kan hmuhtheihmi cu ralkap nih hin zeihmanh a ngei ti lo ti hi a si. Mipi dirkamhnak a hmu lo. Annih ngeihmi cu ralhriam tthattha le ralkap tampi lawng hi a si ko cang. Lamzawhtu mipi le ralkap karlak thazaang/sining cuaithlai tik ah ralkap nih tangka a ngei i, ralhriam zong a ngei.

Cucahcun, puarhrannak in i lehrulnak fak a chuah ahcun Myanmar ram ah thisen chuahnak fak tuk in a chuak kho tiah UN zong nih ralrin a pek kha a si.Lamzawhtu lei nih puarhraang deuh piin an lehrul taktak sual hna a si ahcun hi ram ah hin ramchung ral a tho kho,” tiah Clarissa Ward nih a chim. The Chin Journal

Be the first to comment

Leave a Reply

Your email address will not be published.


*