RALHRANG NIH CHUNGKHAR MINUNG PALI AN KAHTHAH HNA

Zahanzan ah Kalaymyo Inyakung sang ah chungkhar umnak inn pakhat ah minung pali kahthah an si. Hi konghe pehtlaiin pawngkam a ummi minung pakhat nih a chimmi cu ralhrang kawlralkap pawl hna cu motor panga in an rak phan. An inn cu an kulh dih hnu ah lungin an cheh hna. Cutik ah inn chungin minung pakhat nih chuak uh tiah a au i, minung an rak chuak.

Cu caangka in meithal in an kahthah colh hna. Minung pakhat cu a mit ah an ngah i ralkap sizung ah an kalpi. Cu hnu ah inn chung thilri tthenkhat hna cu an fir. Cun apeh rih mi cu chungkhar nu bik le pa bik hna cu an kahthah hna .Cu lawng siloin an fapa le an khualpa pakhat an thah hna. Nu pakhat tucu sizung ah an kalpi tiah an chim.

Hi bantukin kahthahnak a chuah hnu zinglei suimilam pahnih hrawngah ralhrang hna nih minung pathum an tlaih rih hna. A nunnak a liammi hna hi ka pu le chungkhar an si i, mizei nih dah an thah hna, zeiruangah dah an thah hna timi kan thei rih lo. Athattu hi misual pawl an si atimi an um i, ralhrang an ttih hna ruangah biadik an chim ngam hna lo tiah theih a si.

No photo description available.

Thawngpang dang: Ralzam minung pasarih renglo an nunnak aliam cang. Chinram Mindat ah ralzam pawl hna a zohkhanhtu sibawi an um lo caah minung pasarih nak tlawmlo an nunnak aliam cang tiah theih asi. Mindat ralzam hna cu atu hi sii ai lei an chanbau cang. Khuachung ah sii cawk ah a kalmi minung panga zong ralhrang kawlralkap hna nih an tlaih cang hna tiah an langhter chih.

Mindat ralzaam a zohkhanhtu hi sibawi hi minung pathum cu an um ko. Sihmanhsehlaw an i daih bak lo. Cu lawng siloin sii le ai hman dingmi zong an ngei lo tiah thanhnak an tuah. Mindat ralzaam chungin kum upa a simi pakhat a thih hnu ah nau angei dingmi nu pakhat zong sibawi te an um lo ruangah a nunnak aliam tthan.

Hi konghe pehtlaiin tuan deuh zongah hngakchia pakhat zong a pawfah ruangah a nunnak aliam. Atu tiang Mindat ralzaam chungin a nunnak aliammi cazin an lakmi chungah minung pasarih an nunnak aliam cang i, hinak in a nunnak aliammi hi an si cang lai tiah an chim. An thihnak a ruang bik cu sii a um lo ruangah a si ko tiah ralzaam a zohkhanhtu pakhat nih a chim.

Furpi tlak lei a si tikah ruah a sur lengmang i, ralzaam pawl hna cu kihtlaih in a zawmi an tam hna. Atuhi sii le ai in zohkhanh an herhtuk lio caan a si. Mindat ralzaam hna cu khuate aw tthenkhat um hmun an khuar hna i, tthenkhat cu ramtang tiva le horkuang ah an um hna. Hi chungah hngakchia nutar putar le nau pawi tiangin an um hna tiah theih a si.

Be the first to comment

Leave a Reply

Your email address will not be published.


*