CNLD CHUNGRIL AN THEIH LO CAAH A SI BY PU NO THAN KAP

A SELAM maw A THALAM: Party din san. Party pakhat lawng si lo, Party 100 lai umnak kan Myanmar Rampi ah, Party tin dinnak san hi a “selam” ah si loin, khuaram le miphun hrang “thil ṭha tuah” lamah zuamaw dingin dinmi an si thluh. Cui Party pawl sungin, mipi in kum 5 ah vei 1 an duhmi hril thei dingah hrilawk (election) tuah a si.

Hihi democracy ah “mipi thuneihnak” thuk le sanzia langternak a si. Curuangah “thil ṭha tuah” dingih zuamawk (hrilawk) tikah, zo zo khalin, Party le MP cuhtu Minung bulpak huatnak le hmin siatter tumnak thawn thu fehpi lo, nehnak khal co tum loin, Ziang Party in Chinram le miphun hrangah ziangvek tumtahmi a nei.

Cui a tumtahmi cu Chinram le miphun hrangah thupi le thil ṭul taktak a si maw, Cui Party sungin MP cuhtu in an party tumtah mi a ṭuan suak tum taktak maw, Rampi ah miphun 8 (Shan, Chin, Kachin, Karen, Kaya, Mon, Zakhaing, Bama/Kawl) in mai Hnam Party kan nei cio. Cumi sungah Chin Party ih danglamnak Ziang a si.

Hril dingmi MP cu Nipidaw (Union Hlutdaw) ah to ding a si maw, Hakha ah to ding a si, Nipidaw ih to ding MP cun Rampi Cozah President hriltu le 2008 Danpi remtu ah a tel ban ih Hakha ih to ding MP cu Chin Ramkulh Chief Minister lole Tlanghmun hotu (Assembly or house speaker) a si thei, ti teh kan thei fiang maw,

Mipiin an hril tlin a sile Chin Party hin Rampi Cozah dinnak (President hriltu) ah hmual nei zetin a tel ban ve ti teh kan thei fiang maw, Chinram ah ziangvek Party (Chin Party telin) cakin Cozah a din khalle Rampi le ramdang ihsin paisa lut cu a mal phah cuang lo ding ti teh kan fiang maw, tipawl hi a sinak diktak vekin theih tumin nehnak co tum sawn ding a si.

MIPI IN THEIH TUL KAN THEIH FIANG LO PANG LE, Kan thin a har thei, Kan hril sual thei, Miin in nautat thei, Miin in bum rero thei. Theih dingmi theih fiang cu democracy nawmnak le ṭhatnak a takin co ngah a si. Theih ding mi theih lo cu, mah le Innsang le khuaram le miphun tiangin Lamzin peng pan phahnak a si, a pawi tuk.

THEIH BET DINGAH. CNLD cu Tlangmi Shan, Kachin, Zakhaing, Mon, Karen, Kaya Partypawl thaw lawngin thuk zetin kawpaw, ṭuan tlang le ding tlang a si. Kawl Party 40 lenglo an um ih (NDF, NLD, USDP, NUP, telin), cui Party pawl siseh, Ralkap siseh, kawp mi a nei lo. A nei titu an um ahcun CNLD sung thu diktak an thei fiang lo tinak a si. Kawl Party le Ralkap thawn kawp awk le kawp awk lo ding thu cu, 2020 hrilawk hnuah, “Chin mipi duhdan” vekin CNLD in a fehpi leh ding. Credit: Pu No Than Kap

Be the first to comment

Leave a Reply

Your email address will not be published.


*