PHUNGHRAM REMH LOIN CNLD NIH COVO KAN LAK LAI AN TI HI NAI ZUMH MAW

CNLD nih 2008 phunghram remhlo bak in nuhrin covo kan lak lai an ti mi hi nai zumh kho maw? hei si kho seh law a ho dah a duhlo mi kan um hnga. thatein ruat tuah hna u sih. Tahchunhnak ah (1) catang awn hmai saloin a ho dah cozah rian a tuan bal (2) lei thuan hmasa loin a ho dah facang a phun kho bal (3) Jordan tan hmasa loin a ho dah kaanan ram a lut kho.

Cu caah CNLD nih asi kho hrimhrim lo mi kha kan lak lai an kan tipi mi hi i zumh ding hrimhrim khi asi kho lo mi asi. Asi asilo rumro mi khi asi ko. kawl phungthluk i lethe taihing soh (လေထဲတိုက်အိမ်ဆောက်) timi khi an si ko. Cu ti asi ko caah cun zumh awk ah a tha ti lo mi CNLD cu kal tak a hau ko cang. Cu ti asi ko ah cun khoika ah dah kan kal lai?

Kum 2008 phunghrampi letthal kho dingin a thawh cang mi ,zumh awk a tlak mi chin mi lawng hmanh siloin kawlram mipi a kan dawtu le a nunnak pek tiang in kan zawn a kan ruatu rinhcanh tlak DAWTU NLD ah ah panh dih hna u sih. By Sui Peng ( GRCM).

Hihi vunrel ve law zeitin a cung cabia he hin: Chin Miphun Kan Covo cu Ho Sinah Dah Kan Lak Lai. Myanmar Siangpahrang hmasabik cu Anawrahta a si. (AD 1044-77) kar Myanmar ram a rak uktu a si. Anawrahta chan ahhin Mon Siangpahrang cu Manuha a rak si. Kawl hlan ah Mon hi Siangpahrang, Biaknak, Caholh a ngei hmasami miphun an si. Anawrahta nih Manuha cu a tuk i a tei caah Buddhism biaknak cauk (Pittaka tungpung), Pali cathiam Mon Phungki pawl le kutzung thiam pawl a tlaih hna a tlun pi hna i Bagan ah Buddhism biaknak cu a rak tlunpi.

Cu thawk cun Anawrahta nih To be Myanmar, To be Buddhist -ဗုဒ္ဓဘာသာ မြန်မာလူမျိုး timi nawl a rak chuah i a pennak chung ummi paoh nih Buddha biaknak cu an rak biak dih. 1947 ah Kawl, Kachin, Chin le Shan nih Panglong hnatlaknak min kan thut hnu 1948 Jan 4 in ramkomh (Union of Burma) cu dirh a si. Hi ramkomh hruainak ah hmanmi 1947 phunghram cu U Chan Htoon (1906-1988) hruainak in tialmi a si. U Chan Htoon cu Kawl nih catial thiam minthang le kumzabu 20 chung Kawl Nationalist lak ah an i uar bik mi Thakhin Kodaw Hmaing (1876-1964) hnuzul a si.

Thakhin Kodaw Hmaing nih a rak chimmi cu Kawlram hi miphun pakhat, Biaknak pakhat, Caholh pakhat aa hrawm dihmi ah kan ser lo ahcun kan innpa ral in kan iveng kho te lai lo tiah Nation Building a duhning style kha a rak chim. Cu pa hnuzul U Chan Htoon hruainak in phunghram cu hun tial a si tikah, U Chan Htoon lila nih a hnu ah a chim than mi cu 1947 Phunghram hi Union muisam in ser mi cu a lo nain a chung taktak cu Unitary a si ee a ti.

Cu phunghram cu itlaih in Parliamentary Democracy System in U Nu nih 1948-1962 tiang a kan hruai. (1958-1960 kar bel kha အိမ်စောင့်အစိုးရ timi Newin hruaimi Ralkap nih caankar ram an rak hruai). 1961 ah U Nu nih Parliament chung bak in State Religion timi Buddhism cu rammi dihlak nih kan biak lai timi biatlang a hun chuahpi. Kha khan kan Pa Pu Hrang Nawl zong ramtang ah zaam in hriam a tlai. Kachin Miphun hriamtlai phu (KIO) zong kha khan an ithawk. 1962 in Newin nih a kan uk i 1966 ah National Language policy a chuahpi i tlangcung miphun pawl kan holh le kan ca thah hram an thawk.

Sianginn Textbook vialte aa thleng, aa nawnnok dih. 1988 rampi buainak hnu in Saw Maung nih a hun kan uk ve. 1989 ah Saw Maung nih cun Independence kan lak ka in kan hmanmi kan ram min (Union of Burma) cu Union of Myanmar tiah a thlen. Anawrahta, Thakhin Ko Daw Hmine, U Nu le Newin le hmaban kha pehzulh. Than Shwe hruaimi Ralkap nih Phunghran an ser i 2008 Constitution tiah kan auh. Khi Phunghram zong khi zoh tikah Kawl miphun i an identity a simi Biaknak, Caholh le Nunphung kha papek in le hrambunh in tialmi a si zia a lang.

Kawl hruaitu hna nih ram an serning (Nation Building) hi zoh tikah kan ram pi hi Nunphung, Caholh, Biaknak pakhat aa hrawm dihmi Miphun Pakhat ah kan ser lai timi Policy (Burmanization) an itlaih zia fiang tein hmuh khawh a si. Kan Miphun Covo a simi kan biaknak zalonnak, kan caholh le kan nunphung kilven le thanchoternak hna hi Ralkap uknak hlan Parliament Democracy chan tein kan sungh cangmi an si.Cucu kan ifian a herh. Karen le Kachin kan unau hriam an tlaih kha Ralkap chan ah a silo dahkaw! Burmanization doh ruah ah dahkaw ral an thawh iaii.

Cucaah tlangcung kan hawile nih an ifian dih cangmi kan Miphun Covo a kan chuttu hi hodah an si? Zeitindah an kan chuh? Zeitindah kan lak than lai tihi kan ifian a biapituk cang. 2015 NLD chan kan phan kan thimmi kan miphun palai hna kha hluttaw chungah kan miphun kong zalong tein chim kho loin an ttem hoi hna. Political right an kan chuh khi a si ko. Tutan thimnak zongah tlangcung kan unau 1.3 million leng thimfung thlaknak covo an ngeihmi an chuh hoi hna.

Tu ah Tlangcung miphun hna nih kan sungh ciami covo lak khawh thannak lam le kan ngeihchun covo pakhat te cu Miphun party in ramkhel ah kan luh khawhmi hi a si. Cu lam lawngah NCA lamthluan in 2008 Phunghram remhnak ah kan itel kho lai. Kawl hrambunh Party ah kan luh ahcun miphun covo kong kan chimrel kho lai lo, kan Miphun hriamtlai he kan ibawmh khawhnak lam umchun cu Miphun party nih thimnak ah teinak kan hmuhnak lawngin a si. Cucaah kan miphun covo aa fiangmi vialte nih cu kan sunghcia kan covo cu kan lak khawh than nak dingah kan Miphun ramkhel party ah kan thimfung hi pasal kuttum rengh le hacang rial buin thla cio dingah kan sawm hna!(Kan Miphun Covo lak than dingah Tizut loin Lungrual Caan Cu Riangmang cang lo maw?). Salai Ngun San Aung.

Be the first to comment

Leave a Reply

Your email address will not be published.


*